李君妍《特技人》同方紹聰激咀玩「車震」金髮打女再搶鏡
撰文：東方新地｜圖片：Instagram、《特技人》截圖
《特技人》李君妍演金毛𡃁模
李君妍就喺劇集《特技人》中演飾演𡃁模「袁丸」一角。雖然都係以一貫三、四線角色登場，但今次角色確係亮眼，一頭長金髮相當突出，而且攞正牌走性感路線，似乎比女主角傅嘉莉仲搶鏡喎！
Bra Top打拳搶風頭
早前劇中李君妍著住黑色Bra Top與傅嘉莉打拳，喺鏡頭前露出深長事業線！該幕一出隨即搶去傅嘉莉風頭，仲被網民稱該幕為「全劇最醒神亮點」！
觀眾們睇《特技人》除咗有女主角朱晨麗有機會騷身材外，原來做配角的李君妍都有份晒線！
擺正牌晒線的李君妍真係禾桿冚珍珠，單單著住件運動Bra Top已經有「逼爆」效果，難怪成功突圍搶鏡！
大Deep V唱〈明知故犯〉
日前《特技人》講到李君妍遭連番打擊，心情跌到落谷底，於是約埋一班有錢仔唱K劈酒消愁，睇佢唱〈明知故犯〉唱到幾咁傷心！不過同場的有錢仔自然另有目的……
方紹聰英雄救美
之後李君妍被人帶到後巷，幸好方紹聰(飾演糯米) 及時趕到將佢救走，但英雄救美並唔係咁有型，方紹聰亦被人打到豬頭咁！
《特技人》中李君妍與方紹聰係童年好友，李君妍做藝人後被方紹聰連番相救，而且自己失意時，對方永遠都陪伴在側，係女仔都感動啦！
夜媽媽跳芭蕾舞
原來李君妍想重現當年小學雞跳芭蕾舞的自己，於是隨著《天鵝湖》音樂翩翩起舞～
激咀方紹聰
李君妍對方紹聰本來已有好感，呢一刻夜闌人靜又醉醉哋，感情一發不可收拾，即時攬住對方激咀！
玩埋「車震」！
之後兩人咀到上車，「車震」都玩埋！
兩個人喺車度咀成咁，有下一步行動其實都好正常，見到李君妍右手緩緩移向方紹聰身體下方，以為準備拉下拉鍊之際，方紹聰竟然上手阻止，果然係個正人君子！
李君妍成功簽約做親生女
今年26歲的李君妍喺09年入無綫電視藝員訓練班，本身有武術底子，11年參加《功夫新星》後獲得不少演出機會，但都只係三、四線角色。捱咗接近10年，李君妍做過路人、記者、食客等閒，近年先開始有配角演。
值得同大家一提，入行將近十年，李君妍今年三月終於正式與TVB簽約，成為「親生女」！
李君妍坦言成為親生女後有人工加，而且同公司傾過，表達自己想行型格路線，佢仲對公司好有信心，相信會有更多新工作，而角色方面亦會越來越好！捱足近十年，希望李君妍嚟緊會有多啲演出機會啦！
身材勁有睇頭
雖然話係靠打入行，但其實完全唔覺李君妍係粗魯男仔頭一類，佢樣子端好，細細粒不過身材勁爆，無論拍劇定私底下都絕不吝嗇騷身材，難怪喺網上有咁多男粉絲啦！
