大方分享B女得意樣！李亞男：同奶奶餅印樣…
原文：Sunday kiss │編輯：東方新地│ 圖片：新傳媒圖片 、Instagram
李亞男大方分享B女得意樣
繼日前Gabrielle被媽咪公開了個靚樣之後，呢日亞男又再於她的ig post了Gabrielle的多張靚相，攝於不同角度且有多個造型，全部都好趣緻㗎，相信亞男已經化身做狂曬B女的媽咪了。
李亞男：同嫲嫲餅印一樣
李亞男喺Instagram分享多張Gabrielle嘅玉照，其中一張係佢同嫲嫲嘅對比照，仲未足月嘅Gabrielle原來同嫲嫲真係好似樣，連李亞男都忍唔住留言表示：「Gabrielle, watching you grow up have been the best thing that has happened to me #myangel #同奶奶餅樣」而其中一張相，就是以Gabrielle的樣子來跟祖藍媽咪個樣做對比，望落兩人的輪廓確是幾似的，唔怪之得亞男都話囡囡同奶奶個樣是餅印啦。
囡囡出世未有即時出樣
王祖藍同太太李亞男結婚3年，一直Keep住甜蜜！小祖藍終於喺上月出世，而當時王祖藍和李亞男同一時間，係IG公布B女已經出世，分享一家三口拖著手既相，但未有揭盅BB囡究竟似爸爸定媽媽。王祖藍古惑表示，「個樣太似我，所以唔俾你睇」，而媽媽表示，「我們很高興地宣布，Gabrielle是我們收到的最好的聖誕禮物！對我們三個人來說，2018年真的是特別的一年。」更祝大家冬至快樂！
待產靚媽李亞男，今日就係IG分享幾張大肚照，仲好感性留言「與BABY GIRL每一刻都是寶貴的」，無錯啊！媽媽真係要好好珍惜BB，仲喺媽媽肚裏面的時間。而網民都發現靚媽嘅腳有水腫，但除此之外手都好纖瘦。此外，大家都好期待BB究竟似爸爸定媽媽！
早前王祖藍今次一改搞笑嘅態度，再冇扮鬼扮馬，同李亞男影咗一輯Sweet爆孕照，留底美好回憶。王祖藍仲抵死留言「我都就生」，皆因自己都有個大肚腩，同李亞男肚入面個BB相映成趣！
李亞男：婚姻就是各有犧牲
之前李亞男接受本刊，大談佢同祖藍嘅相識到拍拖及結婚的經過！
從拍拖到結婚，王祖藍固然爬得快，而他和李亞男這一對也讓不少人跌眼鏡。不過恩愛之餘，前年底還是傳出祖藍太忙、亞男太依賴，於是亞男因為驚恐症入院，亦疑似患上抑鬱：「驚恐症係真嘅，不過抑鬱係假嘅，係結婚冇耐我因為腸胃有事入咗院，當時祖藍喺內地拍緊電視劇《哪吒》，實在請唔到假返唔到嚟陪我，我就真係覺得好down。外界話佢為咗事業忽略我，我想話其實係佢為咗我犧牲咗好多至真。嗰次以後，佢真係除咗綜藝節目再唔會接內地電視劇、永遠出trip都一定唔會超過三個月。我覺得婚姻就係要互相珍惜互相犧牲，佢講得出做得到，所以我本來想去日本九個月考個藍帶章，依家都暫時放低咗呢個目標，冇可能淨係佢一個為咗呢段婚姻努力。」
14年台慶夜，王祖藍失驚無神跪地求婚，翌年情人節， 兩人在迪士尼酒店大宴親朋，正式結為夫妻。
李亞男 爹哋鼓勵19歲選美
33歲的李亞男在上海出世，9歲舉家移民加拿大溫哥華，她說自己小時候被外公外婆湊大，長大則學校、教會、屋企三點連線，從來不出門、從來沒有自己的社交圈，21歲認識祖藍之前，也只交過一個男朋友：「其實拍得兩個散拖，咩都冇做過，我都唔知算唔算正式一段感情。」
要澄清的時間線
一坐下來，其實李亞男一直高呼，要幫她澄清一下和祖藍拍拖的時間線：「好多人以為佢開始紅我至同佢一齊，其實05年我哋對大家有feel嗰陣，佢仲係兒童節目主持、仲未幫《東方之珠》郭晉安代唱、仲未演《同事三分親》個樓華。」李亞男和王祖藍的初邂逅，就是在藝人之家。「當時大家對大家都冇感覺，淨係覺得佢細細粒幾得意。識佢以前，我鍾意嘅明星都係王力宏、黎明嗰啲⋯⋯」簡單嚟講，即是一概白馬王子型，並且高度一定要在李亞男之上，那些年，有排都未輪到王祖藍。
藍媽媽 推波助瀾
當時李亞男沒有考慮過王祖藍，連王祖藍後來也對李亞男承認，選美冠軍是自己能力與想像範圍之外，兩個人的關係開始起了微妙變化，多得祖藍媽媽推波助瀾。
「我記得有一次藝人之家燒嘢食，祖藍媽媽第一 眼見到我就讚我靚，跟住燒完隻雞翼又講『李小姐你好靚！』、燒完條腸又講『李小姐你好有氣質』，成晚讚完我十次八次之後，夜晚又返去同祖藍講。祖藍都話嗰晚開始留意我，然後有一次發現我個手袋隨身袋住本聖經，至真正刮目相看，覺得呢個女仔唔同其他選美出身嘅人，都幾虔誠唔係淨係追逐名利。」
一對一教學
也就是那一晚以後，王祖藍開始給李亞男教廣東話。話說多才多藝的祖藍一直在藝人之家教演技、教 唱歌亦教語言，不過人人都是大班教授，唯獨李亞男一個可以特別享受一對一教學：「嗰陣時冇諗太多，依家諗番，係喎？得我一個嘅？又好似係有小小追嘅成分。跟住係佢約我去主題樂園玩，大家喺Space Moutain入面坐過山車，驚驚吓就拖咗手仔⋯⋯不過嗰次之後我哋冇即刻一齊，反而係去咗問牧師意見。」
冷靜期 三年零四十日
李亞男說，祖藍在遇到自己以前情路上有過不少波折，並不敢貿然開始新感情，而自己則是經驗太少，不敢自己做決定：「尤其係身邊有朋友提醒我， 我一個女仔嚟到陌生地方，第一個喺身邊出現嘅任何男性都有機會被我依賴，我都怕對祖藍嘅係感動唔係感情，最後傷害咗佢。所以牧師叫我哋畀自己四十日冷靜期先，四十日之後我哋兩個喺電話分手，大家都講到喊⋯⋯其實咩都未做過、完全未開始過， 咁都一齊喊，諗番轉頭都覺得好cute。」
身高差距
那一年不敢開始的原因，李亞男承認，其中一個顧忌的正是身高差距，兩人衡量過利害關係，始終還是怕惹人話柄。「真心嗰句，如果唔使顧及人眼光，我哋應該會更早一齊。其實自己幸福就得，又唔係犯法，事實證明，之後真係公開戀情，(身高差)都唔係寫咗好耐啫！」
一起傳教重燃愛火
冷靜期一過就是三年，兩人因為一起到美加佈道會傳教而愛火重燃，一回港、李亞男收到第一封Email就是王祖藍徹夜趕工寫成的歌詞《墮入凡間的天使》，然後正式拍拖：「分開嗰三年，我哋真係放低咗，我甚至有睇吓身邊有冇其他人適合⋯⋯我 嗰陣時都以為係，我嘅世界可以好大，甚至喺身邊搵吓有冇其他人可以發展，不過慢慢都係發現冇人比祖藍更適合我。」
我哋價值觀一致、好多嘢都一凹一凸，佢快我慢，佢複雜我簡單， 我鍾意飲紅酒佢鍾意飲朱古力奶。我自細慣咗畀人照顧，而佢係阿哥，爸爸早走十幾歲就要孭起頭家，對住屋企好有責任感，我細個好想要哥哥，佢會教我會幫我揸fit，唔好睇外形，佢內心好強大，從來唔會驚青。仲有佢好有才華，喺藝人之家教得好好，事實上係可以做教授嘅人，畢業咁多年好多嘢依家都仲可以拋書包，同埋我最敬佩佢，係咁叻都可以好謙虛，會放低自己學新嘢，又會聽我意見 ……」講到老公，就讚到冇停口！
李亞男讚祖藍好謙虛肯聽人意見，我問亞男，做了老闆以後、結婚以後，王祖藍是不是還肯聽老婆意見？李亞男弱弱答道：「佢追我時係聽晒我所有意見，結咗婚後，我嘅意見真係唔多，佢都知我放心畀佢安排晒所有嘢⋯⋯」
被岳父母誤會無禮貌
從被高攀，到如今成為成功男人王祖藍背後的賢內助，李亞男說，眼前的小個子其實沒有變：「人係會成長，我都做唔到以前嘅我，佢表面上變咗，但係本質係一樣，我知佢好多嘢做又做老闆，無時無刻都好多嘢諗好多嘢度，最開頭連我爹哋媽咪都誤會佢無禮貌、點解成日講電話⋯⋯作為佢身邊嘅人，知道佢同一時間處理緊幾多嘢，可以做嘅就係返到屋企時畀佢盡情放空、畀佢落台嘅時候可以做番自己，當佢忽略咗身邊嘅嘢時，提一提醒佢，幫佢去留意見唔到嘅嘢。」
順道一提，李亞男說王祖藍個子雖小，喜歡的東西卻都偏大：「所以佢揀咗我做老婆，又喺大埔買咗依家呢個三千幾呎嘅屋企，喺出邊做嘢辛苦，佢真係好需要一個屬於自己嘅地方好好放鬆。」
記得當時跟剛剛因為代唱冒起頭來的王祖藍第一次做訪問，他就說過要買 大屋、要給媽媽最好的生活，十年而已超額完成，這就是為甚麼個子小小的他，為甚麼身影總是很高大。
