有片！小三朱智賢聯同謝東閔現身拆局 道歉但谷唔出眼淚 未回應勾引人夫黎振燁

撰文：東方新地 圖片：東方新地、朱智賢facebook

朱智賢臉色蒼白，淡妝由男友謝東閔陪同現身，氣若游絲慢七板道出以後感言：

「對唔住！對唔住！我知自己做錯，我對唔住錫我嘅人，我對唔住俾機會我嘅人，我辜負咗你哋辜負咗公司，喺呢度我想向喺呢件事受到傷害嘅人講聲對唔住，真心對唔住。」

被問到「有否向黎太道歉」，朱智賢不發一言，由男友謝東閔護航下離開。

「事發後佢(朱智賢)有同我講番件事、交待番，我會陪佢一齊度過。」

過程中由始至終未能谷出眼淚，末段一派女王姿態向被出賣的男友點點頭示意離開。

車廂幽會 謊稱對劇本

早前被傳媒斷正，黎振燁駕車到屯門女方寓所接載後，到僻靜處在車廂內齊齊歎心形蛋糕，記者上前拍照，黎振燁立即將手上蛋糕拋在車廂地上，而朱智賢亦極為驚訝擘大個口得個窿，然後推說二人準備開工所以要對劇本，但據知《食腦喪B》已於兩周前拍攝完畢，狗急跳牆胡言亂語。東窗事發，黎振燁被記者問到是否與朱智賢一齊，他一直口窒窒唸唸有詞否認，然後極速回司機位駕車在屯門市中心位置放低朱智賢再飛奔返將軍澳無綫電視城，找高層自首兼拆局。

黎振燁與太太識與微時 據傳拒絕現身交代

黎振燁同太太喺中學時代已經開始拍拖，一直都夢想要做演員嘅佢，都得到太太支持，曾經入過訓練班，但係都係做啲唔起眼嘅小角色，到後來入咗港視，以為會有出路，點知港視又因為牌照問題，開台不成。2016年，黎振燁參選港男自爆已婚，憑「好老公」形象成為大熱，喺拉票環節中表示參選港男係人生奇迹嘅開始，喺台上對老婆發表「愛的宣言」，成功打動觀眾！

朱智賢電視城憔悴現身解畫

事發當日，偷食男女主角均潛水唔見人，連ig都轉為私人瀏覽，直至今日下午近五時，勾人夫女主角朱智賢終於在電視城現身開記招。

「素顏妝」扮誠懇之下、一臉憔悴的朱智賢，未敢以勝利小三姿態示人，一副楚楚可憐，以抖震的聲線謂：「對唔住。」

但強谷一分鐘都未見眼淚，反觀旁邊的謝東閔就深情守護女方，擺明唔忍心被夾出場面對公眾。整個回應草草收場，其後朱智賢及謝東閔再接受無綫獨家採訪，在公司布局下，進一步解說自己的感受⋯⋯

「抽離唔到角色」、「我都接受唔到自己」、「大家畀機會我」

事後二人接受自己公司的獨家訪問，進一步解說自己的「迷失」：

我覺得自己係一個唔專業嘅演員，我係因為拍劇而導致咁，我承認自己係因為唔夠專業、演戲經驗唔多，所以搞成咁時今日咁⋯⋯我覺得自己抽離唔到個角色（索鼻）⋯⋯同埋 好多謝Brian呢段時間陪住我，因為我知佢承受咗好多⋯⋯

堅持係「我一個人嘅事」 唔肯同人哋老婆講對唔住

主持人再追問朱智賢除咗謝東閔仲想同啲咩人道歉，畀晒位佢向黎太講Sorry ，但似乎佢依然唔肯講出呢句說話，仲扭波轉話題，講自己嗲哋：

我最想就係同屋企人講對唔住，我唔想因為自己嘅事影響到屋企人，我即時send短訊畀嗲哋，我唔想因為我一個人嘅事影響到屋企人。同埋我想同劇入面演員講對唔住、對監製講對唔住⋯⋯因為我影響到套劇，我真係好後悔、好內疚，我都接受唔到自己犯呢個錯⋯⋯