盤點12對圈中恩愛藝人夫妻 請不要放棄愛情！
盤點12對圈中恩愛藝人夫妻
1.張繼聰 謝安琪 高調放閃
張繼聰同謝安琪不經不覺已結婚12年，二人遇有一仔一女，，不過仍然經常喺各大社交平台放閃，人前人後都非常恩愛，網民更成日硬食閃光彈！
上個月，謝安琪為音樂頒獎典禮擔任表演嘉賓，不過因耳機失靈，而全程「估估下」的狀態下演出，心情極度徬徨下更於表演後於台下一度激動落淚。愛妻號的張繼聰亦立即於IG留言力撐太太，當對方傷心失望時馬上支持太太，難怪多年來二人依然甜蜜！
2.羅仲謙楊怡 珍惜相處時間
2016年3月，拍拖五年的楊怡同謙謙係英國古堡舉行Wedding Blessing儀式，同年8月，正式宣佈婚訊，並在同年10月2日在香港完婚，豪擺五十圍，廣邀圈中好友席，結婚3年幾，甜蜜指數有增無減﹗
二人結婚兩週年紀念時，楊怡晒出她和老公的背影相，二人作狀似互打大耍花槍，非常甜蜜；而另一張相則是羅仲謙抱著老婆依偎並坐，看著前方的美好風景，溫馨無比。二人亦不時在網上放閃，而且羅仲謙更經常為楊怡花心思製造浪漫驚喜，相當錫太太！
羅仲謙為給太太楊怡最好的生活，不惜密密開工搵真銀，而羅仲謙這幾年在國內亦愈撈愈掂，難怪楊怡完全冇後顧之憂，可以輕輕鬆鬆過生活，不是北上陪老公開工，就是周遊列國，好梳乎之餘，亦非常珍惜大家相處時光！
3.朱茵 全力挺夫
多年來朱茵對阿Paul的支持未停過，近年她復出幕前依然吃得開，更不時出面力撐阿Paul的所有演出與工作。當時阿Paul與夏韶聲、單立文等人在紅館舉行一連兩場《搖滾大俠奏HKBAND演唱會 》，右眼爆微絲血管的朱茵唔止帶埋黃鶯捧場，仲讓囡囡上台獻花，阿Paul接過花後跪低抱著愛女，父女更當眾錫錫。
近年朱茵阿Paul簽同一經理人發展，早前夫妻檔拍廣告，仲出動埋家中愛犬，主力sell溫馨。
恩愛20年
每年大時大節或朱茵生日，阿Paul都在社交網po相示愛，盡顯鐵漢柔情一面。
17年12月，朱茵憑內地電影《二次初戀》勇奪中美電影節影后，阿Paul在慶功宴上啜爆老婆。
上年情人節，阿Paul又寫詩冧朱茵，閃爆社交網。
4.劉青雲 郭藹明慶瓷婚
劉青雲同郭藹明(Amy)這對圈中模範夫妻，自94年拍拖，98年6月17日拉埋天窗，早前正正係二人結婚20周年，恭喜晒！這對令圈內、圈外人人羨慕的夫婦，結婚20年依然恩愛甜蜜，兩人婚姻的保鮮秘技，原來要多得雙碩士港姐老婆郭藹明，持家有道之餘仲溫柔識撒嬌，成功將老公治得貼貼服服！
結婚20年，劉青雲和郭藹明這對今年步入「瓷婚」的圈中模範夫妻，至今行街仍會甜蜜拖手，恩愛羨煞旁人，能夠令婚姻保鮮，劉青雲坦言全靠老婆郭藹明功勞，他大讚老婆說：「太太係我人生最好嘅禮物，佢好聰明，我鍾意咩、唔鍾意咩，唔使講佢都一清二楚！」
人生最大膽一次
事實上，當年鼓起勇氣追求現任劉太，劉青雲曾表示這是他人生最大膽一次。據知情者透露：「青雲同Amy 拍《大 時代》嗰時仲未拍拖，佢兩個喺埋一齊都係多得周慧敏撮合，94年Vivian開演唱會，因為知道青雲對Amy有意思，就邀請佢兩個一齊去睇演唱會，幫青雲製造機會，不過之後青雲再約會Amy，都要鼓起好大勇氣，始終當時Amy有學識又靚，而青雲事業先啱啱起步，冇車冇樓，第一次約 Amy去街，青雲仲硬住頭皮叫Amy揸車去接佢，然後一齊食飯，所以到依家佢都成日提起，好感激老婆當時冇嫌棄佢！」
復出要問准老公
眾所周知，郭藹明是美國南加州大學機械工程學雙碩士，當年Amy為青雲放棄工程師工作。想不到人妻婚後至今，仍然為陪老公放棄復出；三年前《大時代》翻播，一眾演員被炒熱，當時就有唔少人邀請Amy復出。Amy友人透露：「嗰時同無綫都出嚟傾咗幾次，不過除咗睇角色， Amy最著重係時間，講明一定要就咗老公檔期先，最後都因為怕困身陪唔到老公，所以傾唔成！」事事老公行先又識得撒嬌，相信就是郭藹明維繫甜蜜婚姻最佳秘技！
5.吳岱融 鍾淑慧 結婚23年
吳岱融與鍾淑慧結婚23年，婚姻也曾因摩擦出現暗湧，年初他曾推出情歌〈回去愛你十億秒〉送給他眼中賢良淑德、默默付出的老婆鍾淑慧，更夫妻檔拍MV，情到濃時咀嘴，MV更由囝囝負責剪片。
互相扶持23年
89年拍拖，95年結婚，吳岱融與鍾淑慧經歷23年的婚姻，感情亦曾有過高低起伏，97年兒子Justin出世，二人忙著工作，兒子從小由婆婆湊大，不過近年他們一直把他帶在身邊，早年在國內奔波，夫婦二人決定定居番禺，安排兒子入讀當地的國際學校，前年Justin要返新加坡服兵役，吳岱融又陪仔返老家定居兩年，一家三口感情深厚。現在到吳岱融要留港搏殺，妻兒都在背後支持。
6.苗僑偉戚美珍 恩愛28年
外表睇唔出已經「登六」嘅三哥苗僑偉，同老婆戚美珍原來結婚已有28年，依然咁恩愛，三哥嘅大女苗彤亦都27歲大個女，前年仲成為港姐嘅御用攝影師，而24歲嘅囝囝苗俊就長駐喺加拿大。
一定照顧她一生一世
其實從以前開始三哥畀人嘅感覺已經係好瀟灑、成熟穩重，82年苗僑偉同戚美珍合作《飛越十八層》擦出愛火，90年結婚至今已經28載。雖然三哥間唔中都會傳出緋聞，但戚美珍依然相信三哥，三哥接受本刊訪問時曾經講過：「佢 (戚美珍) 為我生小朋友，每個人年紀都會大，樣貌會變，冇理由生完小朋友就丟咗佢，做男人要學識承擔，同你生活咁多年，唔可以半途拋棄佢，結婚時已經係一個承諾，我同太太經歷過好多風浪，一定照顧佢一生一世。」深情告白，難怪兩公婆能夠恩愛如此。
當年嘅三哥同三嫂！
82年 拍《飛越十八層》定情
82年苗僑偉同戚美珍喺《飛越十八層》擔任男女主角，三哥更一人分飾兩角，劇集大受歡迎，除令兩人走紅外，亦係兩口子定情之作。
87年29歲嘅三哥三嫂繼《飛越十八層》後，喺古裝劇《天龍神劍》再以情侶檔姿態示人，劇中兩人著古裝奉旨談情，份外溫馨甜蜜。
苗僑偉、黃日華半裸露點同師妹戚美珍大玩3P型格合照，當時已同戚美珍拍拖，相中黃日華仲keep住《過客》髮型，當年男星未流行爆肌，難得一見二人騷胸肌，勝在罕見。
7.梁家輝同老婆恩愛31年
60歲梁家輝與太太江嘉年87年結婚，至今恩愛足31年，早前5月20日，囡囡Chloe同Nikkie特別為兩人親手炮製咗一個靚靚蛋糕嚟慶祝，梁家輝仲一邊攬實老婆，一邊伸晒脷咁同老婆鬼馬合照，動作充滿童真。
之後佢又捉實老婆手仔一齊切蛋糕，認真sweet！
31年前嘅擺酒相，值得紀念！
仲有梁太江嘉年後生時嘅靚相，相當珍貴！
日常嘅恩愛照。
好sweet呀！
8.馬德鐘同太太 結婚25年
日前6月27日係馬德鐘50歲生日，翌日又係佢同太太張筱蘭結婚25周年紀念(銀婚)嘅大日子，馬太喺微博上載咗多張二人由拍拖到結婚嘅相片，並留言話：「由12歲開始認識你，到今天與你結婚步入4份1世紀，感恩一直同行。人生就是要將今天活得比昨天好。銀婚快樂！」
連當年前G4馬德鐘學堂畢業照都有！
而馬德鐘亦有轉載太太嘅發文，仲留言回應番老婆：「必須要每天都過得比昨天好。」好恩愛啊！
9.杜汶澤田蕊妮 相愛結婚19年
杜汶澤與田蕊妮這一對，在1999年還有亞視的年代開始拍拖，到2005年結婚，至今結婚13年，多年來二人遇過的感情危機及杜汶澤患病，患難見真情，攜手跨越障礙，多年情確實得來不易。早前阿澤同阿田慶祝結婚13周年，阿澤有感而發話：「今天是我們的結婚周年紀念，曾經有人跟我說，婚姻就是將錯就錯。感謝你這十三年來的將就，祝你健康、快樂！」
今天是我們的結婚週年紀念…….有人跟我說過，婚姻，就是將錯就錯。 感謝妳這十三年來的將就，祝妳健康、快樂！
杜汶澤（@tochapman_1999）分享的貼文 於 張貼
田蕊妮16歲識阿澤
93年田蕊妮獲得亞視節目「末來偶像爭霸戰」金獎而入行，未幾偶遇杜汶澤，當時的阿澤已是爛賭成性，他曾自言：「我18歲已經賭錢，輸到要走路去台灣，之後返嚟香港，入咗亞視做藝員，諗住亞視少人睇，況且冇諗過自己可以紅，點知拍咗《我和殭屍有個約會》多咗人留意，俾貴利佬打去報館追數。」
最後他被追債百萬的新聞成為娛樂頭條，焗住開始了賺錢為還債的生涯，阿田呢？當時阿田已認識阿澤，老友力阻下仍三番四次借錢畀阿澤還錢，心地善良的她認為，應急是必需的！二人順理成章走在一起⋯⋯
杜汶澤求婚30次
二人的結合，並非想像中的順利，田蕊妮曾指阿澤整天嬉皮笑臉，又將求婚掛在嘴邊，臨瞓前、睡醒、吃飯時、朋友聚會間，總之無時無刻都將求婚二人掛在嘴邊，田 蕊妮當時覺得太不靠譜，根本沒放在心上，而且當時年屆27歲的她，覺得女人30歲結婚最適當，還有三年不急吧！也沒有顧着杜汶澤的臉子和士氣，直至第31次求婚…
杜汶澤 探訪災民學懂珍惜
直至有次，杜汶澤去斯里蘭卡探訪災民，過程中令他改變了人生觀。認識到不以消極態度面對災禍，反而可以令自己變得更加積極，要珍惜眼前人。同時，在杜汶澤去 斯里蘭卡探訪期間，由於曾有報道指當地會再有餘震，令田蕊妮憂心如焚，更擔心他一去不返，突然好害怕失去他，田蕊妮非常後悔以前他求婚多次都不答應。
我們結婚吧！
最後杜汶澤因為這場災後景象對他震撼太大，而決定再次向田蕊妮求婚，他謂：「當時就覺得，其實人最珍貴的是那些真正對你好的、你愛的人。我突然就很想念田 蕊妮，那一刻，我拿起手機就給她打電話，說了句我們結婚吧！」正因為這場災難，促使兩人結束6年愛情長跑，攜手步入教堂。
田蕊妮 陪夫走過破產
婚後，兩人既是恩愛夫妻亦是知心好友，杜汶澤曾兩度破產，田蕊妮卻一直默默陪伴其身旁，未曾離棄。田蕊妮坦言那段時候有曾想過離開他，可是當時杜汶澤經歷大 起大落，如果那個時候真的離開他，會對他造成很大打擊，所以最後打消了這個念頭。一段感情確實需要彼此之間去維繫，互相支持。
婚後杜汶澤叫老婆別再捱夜工作，全職做少奶奶，期間 田蕊妮做過一年電台主持。初時以為會好開心，實情是相反，每天睡醒就約朋友飲茶，飲完茶就打麻雀，打牌打到夜晚又搵人食飯。如是者過了幾個月，慢慢覺得自己好似 個廢人，而且她不喜歡收老公家用，但買東西又要向他要錢，就連 田蕊妮 的屋企人都變成他的負擔。此刻， 田蕊妮發現她的性格根本不適合做少奶奶，至06年決定加入無綫，創開另一片天！
擊退小三
06年加入無綫，阿田一劇接一劇，自命是工作狂的她曾過了三年她自覺是廢人、別人眼中是少奶奶的生活，不過，安逸的生活沒有為阿田帶來半點快樂，與世界脫節的 感覺日漸加深，混雜負面情緒，間接影響夫妻關係，最後小三出現了，她曾謂：「我知道邊個係小三，當時想逃避唔去面對咪繼續去打牌，個人好迷失冇晒重心，唔知點處理夫妻之間嘅關係。」大部分做老婆的，發現小三的存在只有兩個方案，一是離婚一是扮唔知啞忍，阿田亦有想過離開。或者是上天的安排，她想離開之際阿澤的事業急轉直下，身邊朋友走得就走。
田蕊妮 選擇等
由有錢有名有利變到一無所有，重情重義的杜太竟可將小三問題暫且放埋一邊。「呢樣嘢真係整定，如果嗰時我走咗去真係好冇義氣。最心痛唔係有個女人出現，而係我好明白佢點解會咁，我好重視呢個人好愛佢先嫁畀佢。一個人冇端端由冇人理嘅茄哩啡，努力加埋運氣，名利財富一齊嚟。我知佢仲好愛我，但當時見佢乜都冇晒，咪同自己講等佢好番少少先走。」面對老公出軌，做老婆的不但沒有一走了之，還寬容到諒解身邊人背叛自己的原因。婚姻關係上的衝擊，令阿田阿澤明白到大家所需要的很簡單，彼此能夠手牽手到老已足夠。
患難見真情
後來，在杜汶澤40歲時被診斷出患上了一種罕見的米勒費雪症候群，嚴重的話會導致四肢癱瘓、甚至窒息致死。由於患上該病， 杜汶澤 急需停止所有工作，被迫留在家中養病。當時在寧波拍戲的田蕊妮知道後如五雷轟頂心急如焚，更在微博指：「當你病時，不能在你的身邊照顧你，還反過來要你安慰我！佩服當你遇到逆境時還能如此安然松坦的去面對！在你身上，我學習到很多！你是我心目中的巨人！」期後田蕊妮回到香港之後，日日夜夜在醫院照顧杜汶澤。杜汶澤亦曾公開表示：「以前誤會以為成功就會得到女人，但原來得到一個好的女人就等如成功。」這就是患難見真情。
10.黎耀祥結婚近21年
三屆視帝黎耀祥同老婆梁耀蓮(Julia)結婚近21年，一直咁恩愛，問黎耀祥夫妻相處之道係點？佢話：「我哋相處係OK嘅、舒服嘅。學習啦，我成日覺得做人都係不斷嘅學習，做老公、老婆、仔女都好，因為無經驗，大家都係嚟到呢一世先識嘅啫，上一世點做我又唔記得咗，所以教仔嘅方法、同老婆相處嘅方法，其實每日都學緊。最緊要大原則要好相同，譬如對錢銀、人生嘅步伐要同步或者近似。其實大家都知婚姻去到尾真係一個伴，個伴要啱，先至係一個伴，如果唔係盞搞，搵個人嚟喺身邊嗌交，咁不如自己一個好過啦！」
有break就返屋企食飯
講到黎耀祥夫妻將親子關係做得好好，同囝囝都好close，黎耀祥直言：「OK㗎，其實我好著重，因為我成日覺得，好多人成日話為家庭做好多嘢，但到最尾忘記咗家庭，我分好多時間畀屋企，好彩我個人冇乜應酬，我唔係好鍾意應酬，又冇乜朋友，以前我收工就返屋企，有個break就返屋企食個飯，變咗我同個仔相處嘅時間好多，到佢大個，就會同我哋close好多。」
11.姜大衛李琳琳結婚44年
姜大衛同老婆李琳琳結婚44年，出名係圈中模範夫妻，11年李琳琳患上大腸癌，姜大衛停工悉心照顧老婆，陪她捱過最辛苦的化療期，姜大衛坦言：「嗰段時間我的確係好擔心，唯一可以做嘅就係共同面對，40幾年感情，其實唔需要講出聲都知，大家都係冇咗對方唔得！」
早前姜大衛就陪老婆恩愛出巡，當日John哥駕車同老婆到又一城，原來是約了岳母及老婆家人吃越南菜，即使全女班，John哥亦唔介意融入女人堆，同班女人有傾有講，之後老婆想行街，更做跟得老公陪老婆去揀化妝品，任老婆慢慢揀慢慢試，等足半小時一樣毫無怨言，然後再做司機接載大家，老夫老妻仲咁恩愛，的確羨煞旁人。
12.姜皓文同老婆殷寧 恩愛18年
姜皓文與殷寧(原名金慧英)結婚18年，人前人後表現恩愛，去年結婚周年紀念日，黑仔更送上檳城一層樓給殷寧，揚言要與摰愛「牽手相伴甘苦與共」。黑仔對於老婆多年來的遷就更是感恩，雖然時有嘈交，不過二人很珍惜這段關係。
拍拖行名店
黑仔笑言同老婆結婚十八年嚟成日嗌交：「初初結婚唔識得點去珍惜，唔識點去處理婚姻生活，兩個人生活，唔係咁簡單，唔係話住埋一齊，你就我、我就你，真係有種節奏喺度，大家要配合得好好。我覺得最忌一樣嘢，兩口子點樣發脾氣、點樣惡都好，唔好講啲真係太傷人嘅說話，一次就你、兩次就你，三次就真係唔得㗎嘞，唔可以郁啲話離婚、分開，千祈點嬲都要忍住唔可以講，除非你唔想段婚姻長久落去啦！老土啲講句人氹人係OK嘅，個節奏咪大家盡量去配合囉！」
去年10月，姜皓文趁結婚18周年，喺馬來西亞檳城買樓送畀太太。
愛玩煮飯仔
問佢閒時同太太做咩多？黑仔回答：「我有我，佢有佢，哈！佢鍾意啲花花草草，好鍾意魂遊太虛諗啲佢自己世界裡面嘅嘢，但係每年我哋都會一齊放假去旅行，因為我哋生日同結婚周年連住幾日，平時就一齊煮吓飯，依家我唔鍾意出街，飲酒又唔揸得車，我依家都少飲，因為我好控制唔到自己，我會追酒飲，飲完亂晒籠，又斷片，好恐怖㗎，試過同朋友返內地飲酒，飲到唔見咗我，我去咗第度唔知同邊個飲，瞓醒褲袋一大疊咭片，所以好危險。」
