未來音樂祭︳門票售出不足三成 網民怒斥5大死因 素海霖有份最趕客
未來音樂祭︳TONE Music千字文告急：只賣出3成門票
TONE Music主辦一連兩場的《未來音樂祭 TONE MUSIC FESTIVAL 2023》即將舉行，參與歌手都相當有睇頭，當中包括：謝安琪、Marf@COLLAR、周國賢、韋禮安、安溥、絵麗奈等。不過竟然出現告急的狀況，TONE Music昨日喺IG千字文出post，直指目前為止只賣出不到三成門票，更指原本唔打算告急，但亦承認冇得選擇，希望打慘情牌谷飛。
網民力數5大死因：
未來音樂祭︳無人睇原因1. 太多新人 live唱得唔好聽
雖然TONE Music出晒千字文，但似乎網民都唔多受落，留言反指音樂祭的問題。首先有網民留言指出雖然主打鼓勵樂壇新人，但真係多得濟，無乜有gimmick氣氛好嘅單位，仲話因為去過之前嗰個搞到無晒信心，因為搵埋啲出名唱live唔好聽的歌手，更點名女團lolly talk，真係完全入唔耳，但今年係headline，表示：
「pop又pop唔哂，indie又indie唔哂，兩頭唔到岸」
「本地indie fans都幾失望，少咗一個音樂節可以去玩。lineup嘅嘢冇得改應該冇得救，希望下年再搞好啲我會再買飛支持」
未來音樂祭︳無人睇原因2.素海霖有份被轟「九唔搭八」
另一方面，大家仲留意到AV女優「繪麗奈」素海霖都在名單之上，網民認為素海霖「九唔搭八」，明明是女優，不明白點解請她。不過，素海霖早前與樂隊P.R.O.J.E.C.T. 9一齊合作的《只想有人令我呼叫》，至於被轟「九唔搭八」，素海霖回應傳媒指自己要有突破，亦多謝音樂祭俾機會，更透露會唱一首歌，其餘就同其他人合唱。她更笑指可能未出嚟已經被人噓，但希望大家給予機會，表示每個人都有第一次，雖然未必熟悉音樂，但會努力同鍾意。
未來音樂祭︳無人睇原因3. 門票太貴 接近$1000
《未來音樂祭 TONE MUSIC FESTIVAL 2023》價格分別為Block A單日 $880，兩日 $1480，Block B 單日 $780，兩日 $1380 。網民指出門票太貴都係其一死因，認為一張門票接近＄1000，但只係得企位，去睇其他演唱會$1000有得坐仲有機會係握手位。叫TONE Music考慮吓唔好定價咁高，覺得食水太深。不過呢點就唔算好多網民認同，認為呢啲騷好多都無得坐，要休息可以坐地下，同埋而家閒閒哋睇個騷都600起跳。
未來音樂祭︳無人睇原因4. 上一次體驗太差 全企位太辛苦
另外除咗價位外，都有網民指出上一次的體驗太差，同埋今次搞全亞博企位真係考起觀眾體力，唔係個個觀眾都咁好體力支撐到成晚「亞博困死喺度咁長時間又冇地方食飯。唔係人人都有咁嘅體力啊」「上次體驗好差，所以不了。都唔講價位先，overrun到失晒預算，所有人9坐，問題你都講得出，唔再俾機會亦係觀眾嘅選擇。無可能全部嘢啱聽你搞全企位真係得啖笑，其他音樂節我都可以走去其他台聽吓，而家真係同你罰企咩。」「連續困響兩日冇嘢食冇水買，根本就唔應該去亞博搞」
「見到全企位，真係搞唔掂，企唔到咁多個鐘」「因為你變咗全企位，時間咁長，無得坐下，問題我一行星開買吓嘢食去吓Toilet我無咗自己個位，遲啲入場又唔得，行開吓又唔得」「咁快唔記得嗱？上年買優先內部飛嗰啲劃位劃到一pat野咁，去到現場俾你哋當波咁踢黎踢去，我地都講過只要係你哋主辦嘅就唔會再買飛，我哋仲記得呀」「音樂節咁長時間需要場地配合到先有得走動/休息/食飯/chill，但上年感覺完全係被困亞博，唔係果個vibe」
未來音樂祭︳無人睇原因5.舉辦日子撞亞其他音樂騷
再者，未來音樂祭舉辦日子在9月30日、10月1日撞正中秋節等假期、而且香港其餘場地分別有sukekiyo及LE SSERAFIM演唱會、安孝燮見面會等。不少網友表示會揀睇韓國女團，而放棄未來音樂祭。
未來音樂祭︳TONE MUSIC FESTIVAL 2023詳情
《未來音樂祭TONE Music Festival 2023》
日期：2023年9月30日、10月1日（星期六、日）
時間：16:00-22:30
地點：亞洲國際博覽館 Arena
門票現已於KKTIX公開發售：
https://tonemusic.kktix.cc/events/tonefest23
Block A｜單日 $880 / 兩日 $1480
Block B ｜單日 $780 / 兩日 $1380
演出單位：
𝟑𝟎.𝟎𝟗.𝟐𝟎𝟐𝟑 (𝐃𝐀𝐘 𝟏)
謝安琪 Kay Tse x The Hertz | 韋禮安 WeiBird [TW] | 岑寧兒 Yoyo Sham x moon tang | KAHO 洪嘉豪 x Zpecial | maniac x Marf@COLLAR | Yack Studio x 摩四青年 | Instinct of Sight | Naked and lay | Jaime 張天穎 • kayan9896 • Kiri T | dessy 守一 • KALAI 家麗 • Young Hysan
𝟎𝟏.𝟏𝟎.𝟐𝟎𝟐𝟑 (𝐃𝐀𝐘 𝟐)
安溥 ANPU [TW] | 周國賢 Endy Chow x Lolly Talk | Gareth.T | 艾粒 ILUB x N9 | ToNick | Hardpack | P.R.O.J.E.C.T. 9 x 絵麗奈 x 鹽焗雞 $alty Chick | Invisible Architecture | Novel Friday x 及時雨 Rain In Time | Cloud 雲浩影 • Dark Wong 黃明德 • Gwenji | Helen So • 盧華 Lowa • THAIMAY
未來音樂祭︳TONE Music千字文
離未來音樂祭不足一個月，我們暫時只賣出不到三成的門票。
告急？唔敢。但唔告急？似乎已經沒有選擇了。
自疫情開始，TONE Music 的我們一行人闖了一關又一關，在整個市道低迷的兩三年間上天確實待我們不薄，辦了不少演出，認識了不少好友，更重要是有你的支持，還實現了我們「膽粗粗」辦年度音樂頒獎禮的願望。
這個 「未來」 都是機會，是突破，是屬於我們、屬於你們的時代。
然而，正當我們以為新的時代要開始了，現實讓我們遇上從未遇過的難關。
想當初是因為疫情為了維生才萌生了TONE的想法，然後一步步得到觀眾的支持…
因為有你們支持，音樂節由online去到實體；
因為有你們支持，我們由Star Hall去到亞博；
因為有你們支持，我們還膽粗粗，用音樂祭的收入all in搞個以音樂類型(Genre)劃分的頒獎禮。為的是希望藉此表彰長久以來被遊戲機制排除在外、被忽視的創作人及幕後單位，我們認為他們也值得被尊重和認同。話時話，可能好多人唔知，TONE音樂選這個頒獎禮和TONE音樂祭其實是唇齒相依的連體嬰，免費睇直播的頒獎禮是靠音樂祭的門票收入去維持，拆開做就是希望頒獎禮不需要考慮票房及保持得獎名單保密和公平。
回想我們這幾年在TONE做過好多突破性的嘗試，例如 line up 加入乙女新夢等平常少接觸的單位、以KOLOR、RubberBand音樂節打頭陣、撮合不同音樂單位進行有真正交流的crossover…… 目的也是希望由觀眾到表演者，都可以睇到香港音樂有更多有質素的可能性。
因為有你們支持，本地indie和次文化漸漸讓更多人看見；
因為有你們支持，音樂圈開始得到更多人重視音樂性及了解音樂類型；
因為有你們支持，電影、電視中出現更多不同音樂創作人的作品；以上種種對未來音樂圈有重要影響的功勞，其實不屬於我們，全部都因為有你們支持才做到的～
當然在實際操作的過程中，總會有不夠周到、未能取悅所有人的地方，我們都虛心聽取意見，每件事盡可能權衡取捨，
上年飲食排長龍，所以今次增添飲食攤檔，有嘢食之外還有足夠的啤酒同cocktail給大家盡興；
上年有好多觀眾離開自己位走上台前，所以今年做全企位仲set埋mosh-pit區讓大家跳盡佢；
上年overrun問題，汲取經驗今年在流程編配會作更好的安排；
上年山頂的觀眾嫌離台太遠，所以今年個台打橫放，希望拉近觀眾與表演者的距離；雖然可能都未能盡如人意，都係果句，繼續盡做、落力去做。
票房告急，所以都容許我們hard sell一下吧，如果你未買飛，可以隨時到連結買飛，再好點就請邀請多幾個朋友一齊來睇show 吧！當然，幫手轉發貼文/Story亦非常感激！如果有什麼疑慮或意見都歡迎留言或DM我們。
最後想說的是，當初我們用「未來」，是在想無論將來如何也好，你們是我們的伙伴，一起在這遍土地前行！
我們TONE Music 團隊會盡全力給你兩日美好回憶之外，希望有更多「因為有你們支持」而繼續產生對未來有正面改變的蝴蝶效應。
9月30日、10月1日「未來音樂祭2023」，來現場同我們見個面、拎住杯啤酒say cheers，好冇？
TONE團隊上
