現身香港街頭 靚媽昆凌 嫩口似少女！
昆凌介紹香港特色
難得嚟到香港，原來昆凌除咗出席電影宣傳活動，都抽空拉大隊去咗中環石板街錄影節目介紹香港特色。結婚四年、已經係一仔一女之母，留意番，其實昆凌同周董拍拖時18歲都未夠、呢個月12日至過25歲生日咋。呢啲咪人生勝利組囉，生得靚、嫁得好、進軍荷李活工作前景一片光明。
周董唱歌及名氣早已衝出國際，不過講拍戲就冇老婆咁威水，可以躋身荷李活大片，昆凌仲要得天獨厚，生完兩個都仲係保持得一副少女樣貌同身型，娶著呢個靚老婆，難怪周董不但唔介意老婆名氣愈來愈大，早兩日仲忍唔住隔空放閃，喺老婆IG度留言：「我是在跟高中生交往嗎？」
一場嚟到香港宣傳新戲《高凶浩劫》，The Rock襲港三日後先行離去，昆凌就留多兩日，去咗中環拍節目介紹香港。
日前昆凌化行妝著得靚一靚，被黑衣大漢、黑色房車載到去中環，原來要客串做主持拍節目。
落車行街黑口黑面？幻覺嚟啫！其實唔使埋位時昆凌同工作人員有傾有笑，不知幾好相與。
等埋位時，昆凌仲同工作人員紮辮消磨時間，一睇就知平時幫開囡囡小周周扮靚，係熟手技工。
皮光肉滑仲有一副少女身形，夏天為大地帶來一對大長腿，不過就被周董周杰倫一早私有化。
本月12號滿25歲，結婚四年生咗兩件，個樣都係拍得住當年14歲做《黑澀會妹妹》時一樣咁嫩口，難怪老公周董都忍唔住讚老婆似中學生。
21歲已經嫁畀亞洲天王，昆凌唔願做少奶奶，反而繼續發展演藝事業，今年就同巨星The Rock合拍荷里活大片，帶挈老公都有得去美國探班又參加首映。
昆凌進軍荷李活大銀幕 周董竟然係跟得老公
「天王嫂」昆淩進軍荷李活啦！第一次挑戰荷李活大銀幕就加盟由巨星The Rock 狄維莊遜（Dwayne Johnson）領銜主演嘅動作片《高凶浩劫》（Skyscraper），早前仲同一眾演員現身香港出席電影全球記者會。天王嫂喺多次訪問都講得一口流利英文，仲引得網民叫佢教下老公周杰倫（周董）添！不過，周董呢排成日都跟埋老婆去唔同地方宣傳新戲，潛移默化咁耐佢啲英文點都有啲進步掛！
《高凶浩劫》講咩？原來關香港事
《高凶浩劫》嘅故事背景設定於香港，而主角The Rock今次嘅任務就係要喺世界最高、共有240層樓的驪珠大廈的大火中，搶救被困嘅妻女。而擋喺佢面前嘅，除咗無情烈火，仲有一班趁火打劫嘅恐怖份子，逼佢要從高樓中偷出最不可告人嘅機密，作為交換妻女安全嘅條件。而昆凌則演出冷豔女殺手，除了同主角有對打戲份，仲會同女主角莉芙金寶（Neve Campbell）在車上激戰，突破以往甜美嘅少女形象！
全程講英文 仲要做打女
日前一眾演員嚟到香港宣傳新戲時，昆淩更以一口流利嘅英文表示自己好榮幸可以再次來到香港，並為電影宣傳：「故事是從香港開始的，很開心可以在香港和大家分享。」佢仲話《高凶浩劫》係佢拍嘅第一部美國電影，令佢很緊張，因為佢知道要全程講英文，唔係太習慣，但大家都很親切，帶著佢融入，教咗佢好多嘢，成家人咁！
第一次拍攝荷李活電影就可以和咁多好演員合作，昆凌都覺得好似上咗一課一樣，令佢十分高興。
戲中飾演女殺手嘅昆淩回憶起一場喺車廂入面嘅打鬥戲，就話因為場地比較狹窄，佢同另一個演員為咗場戲排練咗成個月，就係希望可以安全咁拍攝成功。
產後即試鏡 做冷酷女殺手
原來當初昆凌係喺生完第二胎、產後第三天就透過老公協助，喺醫院走廊坐住輪椅咁完成拍攝試鏡帶，最後獲選加入《高凶浩劫》嘅演出陣容。最意想不到嘅係，最後昆凌嘅角色竟然係同以往女神形象大相逕庭嘅冷酷女殺手！為配合角色形象，昆凌仲喺去年十月仲忍痛剪去長髮添！完全睇得出昆凌為咗今次嘅角色，都犧牲不少，精神可嘉㗎～
昆凌飾演寡言嘅冷血女殺手，台詞雖然唔多，不超過二十句，但係戲份都唔少㗎！有著深邃嘅五官、冷傲嘅氣質，昆凌收起溫柔笑容，加上武術特訓嘅成果，睇落都頗有架勢，十足係個嬌小幹練嘅女殺手，差啲認佢唔出啊！
昆凌都有喺自己Instagram上傳同The Rock喺片場嘅合照，多謝呢位巨星喺台前幕後對自己嘅照顧之餘，仲話好開心可以同呢位又Warm又專業嘅紳士合作～
而喺呢條官方短片入面，昆凌更加係氣場全開，轉身舉槍開火，毫不拖泥帶水，完美演繹片中女殺手嘅角色，令人期待佢喺電影入面嘅精彩演出！
周董做「跟得老公」
其實周董一向鍾意喺老婆昆凌嘅Instagram度留言曬恩愛㗎啦，今次仲做埋「跟得老公」，陪住老婆去完北京宣傳，又跟埋去紐約首映會支持愛妻。次次都上傳照片幫手宣傳電影，仲讚老婆做反派嘅演技夠好，搞到成場觀眾睇到昆凌被人打嗰時都拍哂手掌咁喎～ 呢個老公都幾唔話得啵！
之後喺紐約宣傳嘅時候，昆凌自己都有上傳兩公婆同朋友喺中央公園忙裡偷閒踩單車嘅影片，見到周董咁跟得，都睇得出佢哋夫妻有幾Sweet啦～
昆凌英文流利 網民叫佢教下周董
因為今次挑戰荷李活大銀幕，昆凌都接受咗唔少外國媒體嘅訪問，網民都大讚佢講得一口流利英文。其實本身昆凌係台澳混血兒，英語流利都唔出奇啊！有好些網民都叫佢教下周董講英文咁話喎！
早前昆凌嚟香港宣傳電影，以英語接受媒體訪問，話自己鍾意做壞人多過好人，因為日常生活都係做緊「好人」啦～ 講到角色，又提及自己剪掉留咗十年嘅長髮，同埋喺眼角點咗粒痣，話覺得會更加令人有印象。
&feature=youtu.be
睇嚟今次昆凌都為角色做咗唔少功課！大家又點睇喺新戲入面嘅嘗試呢？
