日本旅行再開生日派對！郭可盈、林文龍大搞賀囡囡9歲生日
撰文：Leo Fu(原文刊於：Sunday kiss)｜圖片來源：郭可盈微博
郭可盈、林文龍賀囡囡9歲生日
只見津津着上粉紅色的紗裙，化身成可愛的小公主，可盈及文龍更同愛女一齊切蛋糕，仲齊齊向佢獻吻影相，真係幸福滿瀉，好冧呀！
有家長見到津津的生日佈置後，都認為他們生日會花了不少錢，可盈也回應指單是L.O.L. Surprise的玩具已經不便宜，今次更以此作布置，絕對價值不菲。
其實，在囡囡生日前一日，他們一家三口就已飛到日本大阪遊玩，更暗示「next trip is… …」睇嚟陸續有來，難怪網民們都說津津十分幸福呢！
49歲郭可盈全家齊慶生
就快踏入50歲嘅美魔女郭可盈，昨日渡過了最後一個4字頭的生日。11月28日係郭可盈49歲生日，佢喺微博分享咗多張慶生照片，似乎全家總動員為她慶祝生日，連弟媳熊黛林都帶著一對雙胞胎囡囡齊齊出席。
美魔女郭可盈49歲生日，佢喺微博分享了兩張與老公林文龍和女兒津津的溫馨自拍合照，並Sweet爆留言：「我要我愛和愛我的人，每年都一起《共同渡過》！」
雖然郭可盈近年已經淡出娛樂圈，亦甚少出席活動，連弟弟郭可頌與熊黛林結婚後話題度都高過佢。
不過，《刑事偵緝檔案》中的高婕，《談判專家》中的簡潔，網民對呢位TVB曾經家喻戶曉的當家花旦依然留在不少粉絲心中。而郭可盈劇中女強人的形象與她生活中的形象亦十分貼近。不少網民留言祝福「高婕」生日快樂！
現年49歲的郭可盈無論樣貌，身材都沒有太大變化，難怪一班網民紛紛大讚佢係「凍齡美魔女」！
郭可盈更晒出全家大合照除了老公林文龍同女兒津津之外，連弟弟郭可頌、弟婦熊黛林以及他們一對雙胞胎囡囡孖女Kaylor同Lyvi 都齊齊出席生日會，場面非常熱鬧！而枱面仲擺著三個蛋糕及大壽桃，仲有個巨型發光煎堆同「勁浮誇」拉糖絲超吸睛！
延伸閱讀：
郭可盈 遭林文龍捍衞婚姻禁出山
無綫去年在午夜神劇時段播出23年前經典作《刑事偵緝檔案》，飾演沙展的陶大宇與記者「高婕」郭可盈因此劇成為一代經典熒幕情侶，除掀起無限集體回憶，仲勾起一段師奶殺手與當代女神的當年情。
陶大宇與郭可盈當年拍足三輯《刑偵》，戀足三輯點會冇投入真感情？早年仲再續前緣拍多套《青出於藍》，內有連場濕吻，二人多年後更不避嫌直認曾過電，又曾約會睇電影《侏羅紀公園》，舊相好公開打情罵俏，陶大宇失婚寡佬就話啫！郭可盈大大個老公林文龍喺度都咁大膽，結果觸動醋夫神經，近年雖有不少監製力邀郭可盈拍劇，當中有人想搵她與大宇再合作，但林文龍為捍衞婚姻，以湊女照顧家庭為由，禁老婆出山拍劇。郭可盈無機與陶大宇再合體，惟有狂煲舊作，回味往日情啦！
撰文：東方新地｜圖片：新傳媒圖片庫
郭可盈 陶大宇 火速入戲撻著
一對經歷23年的熒幕情侶陶大宇和郭可盈，95年至97年間拍過三輯達100集的《刑事偵緝檔案》，當年郭可盈參選93年港姐大熱倒灶，最後三甲不入，只獲「最受傳播媒介歡迎獎」及「最佳演藝潛質」兩個獎項，不過好快就簽下無綫經理人合約，新晉小花擔正《刑事偵緝檔案》的「高婕」一角迅速走紅，當年第一套劇就拍住青靚白淨性格開朗的陶大宇，二人很快便傳出緋聞。
做演員要入戲就要投入真感情，據知當年陶大宇與郭可盈戲裡戲外都像真情侶一樣，每次出席宣傳活動都像拍住拖開工，二人更多次獲頒「最受歡迎熒幕情侶」。
知情者透露：「當年劇組見大宇同可盈感情真係好好，嗰時大宇已經係一線小生，可盈就係新人，不過好快佢哋都好投入角色，每場感情戲都由大宇帶可盈入戲，冇人會信佢哋冇動過真感情囉！不過全行都知大宇好花弗，好多人都勸可盈拍戲要識抽離，唔好太認真對待呢段關係。」電視台男女感情瓜葛複雜，當年陶大宇其實已有拍拖多年的圈外女友阿寶，00年二人結婚，但敵不過七年之癢，07年陶大宇搭上郭羨妮拋棄糟糠。
自爆有遐想
當年的師奶殺手陶大宇並非浪得虛名，不少異性暗暗死在他手上，03年他與郭可盈再合作拍無綫劇《青出於藍》，戲中更有多場濕吻戲，當年拍《刑偵》的陳年感情又再回湧。事隔多年，二人竟在一次公開訪問驚爆曾過電，只差一步便能發展感情，郭可盈還笑指陶大宇不夠積極，但陶大宇卻指當年的郭可盈卜卜脆，令他曾有遐想，郭可盈還主動相約睇《侏羅紀公園》，不過散場就冇下文。
二人又提及再拍《青出於藍》時，當時已婚的陶大宇在一場廚房戲問郭可盈如果拍《刑偵》時媾她會怎樣？因當時郭可盈與林文龍已拍拖但未公開，陶大宇竟再進一步問如果林文龍沒有出現，他會唔會有機會？其實整個電視城都知郭可盈名花有主，陶大宇咁問擺明當林文龍冇到。
而當時林文龍亦收到風，此後一直當陶大宇是眼中釘，知情者透露：「大家都係男人，文龍點會唔知大宇想點？人哋大大個男友喺度佢自己又結咗婚，仲講呢啲！文龍唔嬲就假，當時佢睇得可盈好緊，驚畀人乘虛而入，但可盈同大宇仲有一套《心花放》要拍，次次見到佢哋出活動都拖晒手勁親密，真係睇到眼火爆，佢唔想可盈再同大宇合作，唔想節外生枝。其實咁多年嚟都有人搵可盈同大宇再合作，不過可盈知道老公唔鍾意，佢亦應承咗呢幾年要陪住個女，所以拍劇呢啲長時間嘅工作佢都唔接，只接短時間唔困身嘅工作。」
照顧女兒半退出
為免夜長夢多，04年林文龍娶郭可盈，婚後郭可盈繼續拍劇，其後再沒機會與陶大宇合作，直至10年誕下女兒林天若(Tania)，她應承老公留家專心照顧女兒，只偶爾出席公開活動。至14年，郭可盈與陶大宇參加內地節目《年代秀》演出，多年後再碰頭，據知一直避見大宇的可盈，度了三年期才造就那次同台，事前亦要得到林文龍批准。
近年林文龍拍劇中港兩邊走，又與黃玉郎合作投資娛樂公司，而郭可盈就負責照顧家中大小事務，幾乎每日都親自駕車接送女兒天若返學放學，廿四孝人妻人母做到足。
上周三(18日)，郭可盈如常駕車接女放學，之後再去九龍法國醫院接林文龍，現場見他拎住個細篋離開醫院，然後一家三口直返西貢匡湖居寓所，雖然未知文龍入院所為何事，但翌日見他踢完波去湊女放學，相信身體並無大礙。
郭可盈與林文龍現在婚姻美滿，有個又靚又乖的女兒，可盈應該好慶幸當年冇跌落陶大宇的糖衣陷阱，那些年的過電，咪當夢一場囉！
