新歡張馨月得寵示威 林峯拒吳千語𢱑翻撻

撰文：東方新地｜圖片：新傳媒、Instagram、微博

林峯三月承認與吳千語分手

林峯今年三月出席活動時，承認同吳千語其實已經分開咗一段時間，希望大家俾啲空間佢哋；至於感情方面則是隨緣，會集中在工作上。林峯又強調只會講埋今次，私人事以後唔會再答！

吳千語：完全放下實在不容易

而身為女主角的吳千語亦喺社交網亦承認分手一事，佢留言：「感謝各界朋友短訊關心和支持，請原諒我選擇以社交平台作一次性的回應。五年間全心全意投入的感情，要完全放下實在不容易，大家請給我空間適應，未來我會勇敢面對。希望今後大家會繼續給我支持，並多留意我的工作。」

張馨月得寵

曾經被林峯捧在掌心愛錫，要風得風要雨得雨的吳千語，隨著去年暗交前全國政協施子清長孫施伯雄，與林峯的五年情終畫上句號。今年三月，林峯被影到與27歲的內地索模張馨月同遊海洋公園，戀情曝光後二人繼續穩定發展，相比吳千語，同樣被林峯寵愛的張馨月更加識做人，就連林峯的家人及身邊朋友都對她讚不絕口。

舊愛不如新歡

據知情者透露，吳千語個性自我，擺出嚟個樣已經係寸，同林峯拍拖時只想獨霸男友，唔想應酬其他人。相反張馨月長袖善舞，好識氹人，唔會成日黐身，畀好多私人空間男友；但見面時又會小鳥依人，性格同千語差天共地。所以據知林峯好早已經帶佢出嚟見人，張馨月同個個都有話題，好順得人。

堂妹契姐成閨密

唔止堂妹林夏薇、就連好友楊怡同契姐周勵淇都好鍾意張馨月，嚟香港時都會一齊行街食飯。拍拖一年，二人感情一日千里，今年初農曆新年，林峯帶張馨月返廈門過年見家人，二月林峯要留港繼續趕拍網劇《 PTU機動部隊》，張馨月為更靠近男友更專登留港陪開工。

林峯亦融入女家

林峯亦早已經融入張馨月家中，今年9月張馨月胞弟在江蘇鹽城娶老婆，林峯都有現身婚禮，接新娘時林峯在新房企埋一邊笑晒口㖭！更被po出與一對新人的合照，關係咁好大有機會一家親。

進駐林宅晒Body

女友千依百順，林峯當然不會待薄另一半，之前與吳千語拍拖時有求必應，對張馨月一樣寵愛有加。在張馨月的社交網可見，與林峯拍拖後的她生活悠閒又奢華，一身名牌、手袋盡顯衣食無憂，暑假期間更著三點式在林峯帝景園寓所的私人泳池晒身材，與吳千語早年唔使做的闊太生活如倒模一樣。

林峯開心會友

林峯 － 倒模七愛方程式：

林峯每次拍拖都善待女友，每個都享受公主一樣的生活，與吳千語一樣，與林峯拍拖後的張馨月，工作量少之又少，但經常周遊列國。

吳千語增肥出山搵食

相反，過去五年掛住拍拖唔憂做的吳千語近年就要靠自己，今年開始再活躍幕前。據知情者透露，吳千語同林峯拍拖時瘦到好似火柴人咁，好多客都嫌佢太瘦，依家肥番長肉唔同晒，著衫都靚啲。感情事好難講，始終現時男友都未肯公開承認拍拖，所以千語都要為自己打算，放風想接多啲嘢做。

林峯拒吳千語𢱑翻撻

吳千語以前畀林峯當女皇捧上天，依家要偷偷摸摸又冇名份，有比較之下當然冇咁開心。不過就算千語有幾後悔、有幾想翻撻都冇用，因為據悉林峯對佢已經完全心死，依家同張馨月 一齊不知幾舒服，唔會再受千語氹！

千語後悔甩拖

早前吳千語25歲生日，在橫店拍戲一個月的她與助手及大班好朋友一齊慶祝，雖然不見男友施伯雄在身邊，但收到五個蛋糕，收穫非常豐富。吳千語又不時在社交網轉帖有關愛情的文章，早前她在微博對一篇寫舊愛的文章讚好，被指不知不覺流露出對林峯的念念不忘。

失去才懂珍惜

吳千語在微博對一篇寫舊愛的文章讚好，文中提到「就好像我喜歡你的時候你不喜歡我，你喜歡我的時候我身邊已經有別人了。我對你好的時候你不珍惜，等你回過頭來後悔的時候我已經被別人寵成小公主了 …… 錯過一個人，只需要一秒，就夠了。我錯過你了，你也錯過最好的我了。」不少網民看到即猜測她對林峯的戀情有所感慨，仍未放得低。吳千語依家先知林峯好？怪就怪自己身在福中不知福，將林太之位拱手讓人。

新歡未認愛

有指吳千語移情身家過百億的「富三代 」施伯雄(Brian)，但上月27日生日的她，男友卻冇影，只獲一班好友與她慶生，其中一張切蛋糕相更在片場影。新歡有米有家底，吳千語未被承認女友身份，雖然早前被踢爆與Brian蜜遊歐洲，仲配合男友慳家性格，坐經濟機位返香港，但她一日未有名份亦唔敢高調，更焗住收斂愛晒命性格。

早前千語罕有地在IG作出澄清，貼咗一張滿身名牌嘅相片後留言：「#包包品牌送 #房子自己租 #別亂寫啦。」但繼續被網民抨擊解釋都冇用，搞到吳千語嬲豬索性連個post都刪除埋，只剩下靚相。