新歌〈乸〉流出 Eric Kwok首位女徒弟 Eye Fung 起底
Eric孖神秘女聲 唱乜乸嘢？
早前《東方新地》FB專頁發布一段疑似Eric Kwok新歌〈乸〉的MV，但並沒有歌詞，只有Eric同一把女聲「喇啦啦乸」地唱出歌曲， 令人大感疑惑，甚至懷疑係demo流出。同時網民亦十分好奇，呢把陌生但又好聽的女聲， 究竟屬於邊個呢？
Eye Fung – Eric Kwok首位女徒弟
事不宜遲，即刻為大家揭曉，其實呢把靚聲出自Eric Kwok徒弟Eye Fung！ 呢個名都幾有趣，究竟點嚟呢？ 佢中文全名叫馮珩孜，本來有一個較正經的英文名Lorraine，但自覺英文名唔太好聽，所以中學畢業後就改名為Eye Fung。「Eye Fung」呢個名除了同大家用緊的iPhone同音外，原來都同佢屋企人有關！因為佢爸爸叫Michael Fung (與microphone同音)，而哥哥亦有趣地叫Tele Fung（與telephone同音），所以佢就搞笑自稱Eye Fung (同iphone讀音相同)！
音樂人成長之路
Eye Fung自小熱愛音樂， 6歲已經開始學小提琴、鋼琴，後來再另學長笛、結他等等，真係百足咁多爪！從前Eye Fung主要學習古典音樂及考級，然而佢認爲古典音樂「有啲悶」，所以10歲就開始彈流行曲，到後來更加做埋創作，寫吓歌， 整吓demo，發現自己十分鍾情流行曲，故此中學時已立定目標，希望將來成爲音樂人。
因比賽結緣 遇伯樂陳奕迅
去到2015年暑假，Eye Fung由網上得悉「無條件唱陳奕迅」的歌唱比賽，佢作爲Eason忠實fans，又熱愛唱歌 ，所以毅然遞交了自己錄的cover參加比賽。比賽中Eason親自挑選參賽者，而Eye Fung順利晉身5強，更有同Eason交流的機會，覺得好榮幸︰「可以喺一個音樂會度同佢傾計 ！嗰時覺得好開心，因為第一次夢想成真，見到偶像傾音樂。」
得Eric Kwok賞識 音樂夢成真
事隔一個月，Eye Fung在Eason的鼓勵下，決定參加Eric Kwok的寫歌比賽及遞交自己的所寫的作品，抱著「唔試嘅話就一定唔得！」的心態參加比賽。比賽要求選手續寫一半的歌曲，最終Eye Fung表現出色，在比賽中奪冠。更令人驚喜的是，Eric 十分賞識Eye Fung，收埋佢做徒弟！所以今次新歌〈乸〉佢都有份參與。Eye Fung覺得成件事「好夢幻」，完全無諗過會喺大學生涯夢想成真，故十分感謝Eric幫佢實現夢想！
棄做教師 投入幕後音樂工作
Eye Fung現時就讀英文及英文教育雙學位，今年將於大學畢業 ，但佢早認清教師職業唔適合自己，而且實習時頗感吃力，所以唔打算向教育工作方面發展。反而係希望有朝一日，自己可以成為一個全職音樂人！
雖然有把靚聲，但Eye Fung比較喜歡幕後工作，創作令人有共鳴的歌曲。佢直言唔享受做歌手的方式，自由度唔大而且好大壓力，加上佢認爲做歌手不但要有實力，仲要考慮外貌、性格因素等等。所以，Eye Fung都選擇向幕後方面發展，希望可以寫歌比俾自己鍾意的歌手，好似陳奕迅、張敬軒同林二汶等等，希望佢可以快啲寫多啲好歌俾大家聽啦！
