文凱婷挑戰雲浩影翻唱女聲版《黑玻璃》 評價「差天共地」
文凱婷翻唱《黑玻璃》 被狠批「唱k水平」
文凱婷日前在《J Music》中翻唱洪家豪的《黑玻璃》,雖然獲得部分歌迷留言稱讚,不過大部分網民都對於文凱婷的表現不太收貨,認為文凱婷無星味又多懶音、唱到似唱K咁,紛紛留言狠批:「佢比賽果陣都知佢係唱得差架啦,完全冇期望佢會唱得好聽,果然冇令人失望」「唱k水平 chorus聽落有啲hea添」「好難聽喎」「原唱好聽得多」等。
![文凱婷 文凱婷翻唱《黑玻璃》 被網民洗版狠批(圖片來源:YouTube@TVB 綜藝)](https://imgs.orientalsunday.hk/wp-content/uploads/2024/08/photo_6208551505166973846_y_88962358666c5425370a89-1024x576.jpg)
雲浩影版本獲好評 評價「差天共地」
相反,在今年5月初在ChillGOOD TV的《Music Panda》中,同樣翻唱過《黑玻璃》的靚聲歌手雲浩影就獲得一致好評。翻唱版本在短短三個月就錄得過百萬的點擊率!網民都大讚雲浩影唱功好,成功演繹出個中的甜蜜感覺:「呢個 key 一聽就有聞到成陣新車味」「呢個version 真係狂loop,我鍾意雲姨把聲」「繼衛蘭後,很喜愛的聲音」等。
![文凱婷 相反Cloud嘅版本就反應極好!(圖片來源:YouTube@ChillGOOD TV)](https://imgs.orientalsunday.hk/wp-content/uploads/2024/08/d67f4181-b580-456c-ad8b-f8a8632b15e2_69855808766c56c04818f2-1024x576.jpeg)
即睇兩個女聲版本:
文凱婷玩忘年師生戀 傳做小三搞散正室
去年4月,有消息爆出當時22歲文凱婷激玩師生戀,男友大足自已17年,身份疑是唱歌導師湛耀東(Waye Cham)!消息愈爆愈勁,有指文凱婷仲「越級挑戰」嗒人男友,消息話對方有位拍拖多年的正印,捱得義氣陪湛耀東走過低谷,但自從舊年文凱婷殺入兩人戀情,搞到當時湛耀東嘅正室苦苦不樂,令男方與女友分晒手飲恨收場。自此文凱婷得米升晒檔次做正室,更與湛耀東開心歐遊嘆世界!
![文凱婷 師生戀男方真身!大足17年照撻著!(圖片來源:IG@wayecham)](https://imgs.orientalsunday.hk/wp-content/uploads/2023/04/whatsapp-image-2023-04-18-at-3.48.58-pm_355228467643e4b8890889-1024x1024.jpeg)
文凱婷疑冧掂「奶奶」 獲認可
消息指文凱婷與湛耀東曾前後腳赴澳洲嘆世界,把臂同遊勁甜蜜,惟「神隊友」的湛耀東媽媽唔覺意將「合家幅」上載至社交平台,搞到呢段忘年師生戀斷正曝光。消息話湛耀東媽媽刻意用emoji幫文凱婷遮臉,更言:「一家人齊齊整整!」此舉疑反映文凱婷升晒檔次,短短時間融入親家冧掂奶奶獲晒認可,更被認定家人,發展厲害!惟事後湛耀東媽媽疑想「補獲」,火速下架照片!
文凱婷認陷忘年師生戀 堅決否認做「狐狸精」
消息震撼網民,22歲文凱婷對事件亦有回應,承認搭上大自己17年嘅前歌唱老師,仲指戀情處蜜運階段,但堅決否認自己做「狐狸精」整走正室:「我同我男朋友一齊嘅時候,大家都係單身狀態!」
文凱婷懶理負皮心情靚爆po相狂曬名牌入門級皮帶
雖然網民矛頭指向文凱婷做狐狸精,迫走湛耀東正印,出招冧掂親家奶奶「邪花入宅」,但係文凱婷心情依然靚爆,完全唔理負評,仍然開心喺IG分享靚相,又伸晒條脷出嚟,一時又笑到四萬咁口,畀網民話春心蕩漾,仲大曬Gucci皮帶一副貴族女嘅感覺,擺明show Off畀你睇!經過翻查資料,我哋發現文凱婷戴住嘅GUCCI皮帶唔算高檔貨,只係屬於該牌子嘅入門貨色,盛惠港幣$4000元,但以文凱婷不受大台重用,出騷錢向來唔夠炎明熹同姚焯菲撼來計算,呢條皮帶已經算係落重本!
![文凱婷 仲伸出撩人嘅舌頭!(圖片來源:IG@aerenman)](https://imgs.orientalsunday.hk/wp-content/uploads/2023/04/unknown_342727122_197698066373921_74294604876807038_n_1198625686445fe98ee9fa-819x1024.jpg)
疑做小三惹公憤 網民留言鬧爆
文凱婷今次疑似做小三嘅消息流出,搞到班聲夢Fans都唔幫佢,仲話文凱婷影衰晒聲夢,拖累炎明熹同姚焯菲等人嘅正面形象,加上文凱婷依然我行我素po靚相,搞到網民完全嬲嬲豬!我哋一齊睇吓網民點樣鬧文凱婷:「不知所謂的人!歌唔係唱得好,人品又差,早日退出娛樂圈」、「唱首第三者聽吓」、「如果文小姐仲有良知,唔該你立即同東sir分手,同埋開記者會向支持聲夢既粉絲、aeren專屬粉絲同埋火雞道歉」、「我最擔心係其他聲夢14個因你1個壞份子而影響佢地,因為其他聲夢學員都係好純品,希望tvb高層嚴肅處理此事」、「文小姐心虛啊,刪我帖,我身為聲夢粉絲,對你今次做既所作所為極度失望,聲夢之恥!」