攰爆陪囝囝去嘉年華 張栢芝 陪玩飛天 嚇到面青
撰文：東方新地
圖片：新傳媒圖片庫
張栢芝 攰爆陪囝囝去嘉年華
張栢芝計劃明年開戲做導演，近期已忙於籌備，早前公開招募新演員，最近又忙於搞自家服裝品牌生意，不過點忙都好，栢芝一定留大量時間畀兩個兒子。 12月26日Boxing Day，栢芝帶兩個仔去中環「歐陸嘉年華」玩。據知情者透露：「因為計劃明年做導演，栢芝呢排都有好多嘢要籌備，加上內地有商演，聖誕都仲要開工，但因為上年帶過兩個仔去嘉年華玩，兩個仔玩得好開心，當知道又有得玩，已經嘈住要去，栢芝咪趁做完嘢，陪兩個仔玩完再去食飯囉！」
去中環嘉年華
當日傍晚約六時許， 栢芝帶住Lucas及Quintus， 約埋髮型師好友Marvin，到達中環「嘉年華」會場，甫入場就拖住兩個仔，急急腳迫排隊玩攤位遊戲，7歲細仔Quintus見到啲毛毛公仔已經非常雀躍，捉住栢芝玩拋呼拉圈遊戲，只見栢芝拖住Quintus，細心教他拋出呼拉圈落啲公仔度，不過兩兄弟一直掟唔中，為幫兒子贏公仔，栢芝就落力掟，好彩最終贏得兩隻戰利品。
玩完攤位遊戲，她再陪兒子玩機動遊戲「飛天韆鞦」，不過細仔Quintus驚驚唔敢玩，於是栢芝頂上陪Lucas兩個人玩，而髮型師Marvin就帶Quintus去買棉花糖，邊食邊等媽咪同哥哥，Quintus更加食到啜埋手指，十分可愛！
陪Lucas玩「飛天韆鞦」
啱啱開完工的栢芝似乎冇乜精神，但仍頂硬上陪兒子玩機動遊戲「飛天韆鞦」，開始時仲見栢芝笑晒口！
Lucas全程玩到笑唔停，反而栢芝愈玩愈驚，成個樣硬晒軚，仲要用手撳住個頭，直至機動遊戲停低才有番笑容。三母子玩了個多小時，才盡興離開。
Lucas幫手撩牙
去完嘉年華當晚，栢芝就在lG晒相，除表示去了嘉年華玩，又放了一張吃完飯攰到瞓著覺嘅相｜大讚Lucas十 分乖巧，知道媽咪攰到瞓著，一直陪在她身邊，仲幫佢撩牙，栢芝更感動表示「教我如何不愛你」。
工作湊仔兩邊忙
假期期間，栢芝要返內地工作，就帶埋Quintus陪開工，Lucas要出席同學仔party才未有同行。放完聖誕新年假，稍後又要為兩個仔學校考試忙碌，栢芝真係廿四孝媽咪。
