拒聽張繼聰禁令 「飛船」謝安琪偷走喪食
廣告
謝安琪 (Kay) 與張繼聰的小公主將於今個月底出世，為了安全起見，緊張老公張繼聰早已下令個肚籮咁大的Kay乖乖留家待產。不過Kay見悶悶哋，日前竟犯禁出街食魚蛋粉，之後仲閒逛商場作最後血拚！快將40歲的Kay屬高齡產婦，臨盆在即就應該好好休息，依家仲着住對4吋厚底鞋周街走，阿聰真係要睇緊啲啦！
「飛船」謝安琪
Kay去年宣布停工，造人成功再陀B女，食好住好轉眼就懷胎十月準備卸貨，阿聰更以「飛船」去形容太太個巨肚！話就話第二胎不用太緊張，不過張繼聰好穩陣，早前驚Kay患妊娠糖尿，禁老婆進食過多澱粉質與糖份。預產期將至更把禁令升級，近月唔俾Kay獨自出街，恐怕囡囡隨時搶閘出世。
阿聰下禁令
有傳Kay的預產期是在3月20日，不過早前B女未掉頭，有可能要剖腹生B，好彩最後虛驚一場。據知Kay一直都想自然分娩，依家B女掉咗頭都安心啲。不過Kay個肚大得好誇張，陀住幾十磅肚，都咪話唔辛苦。另外，醫生話B女已經夠晒磅，再加上第二胎可能會早啲，所以阿聰上個月已下令唔俾Kay出街，不過Kay留喺屋企好悶，想行多啲易生啲，所以會偷偷出去行吓食吓嘢，阿聰呢排忙住拍劇，都理唔到咁多。
四吋厚底鞋好牙煙
早前Kay在母親陪同下，又在大埔鬧市出巡，先到相熟的麵店食魚蛋粉，再步行十分鐘去大埔中心幫大仔買泳褲，期間仲走入零食店掃貨。雖然Kay身形變腫，個肚大到被張繼聰笑指似「飛船」，但現場所見佢行起路仍相當輕盈，但腳踏的厚底內增高白色鞋，最少有四吋高，真是戥佢牙煙呀！
「飛船」Kay回應
對於隨時生得仍然周街行，Kay笑笑口回應：「我ok喎！其實已經準備好，冇乜嘢要擔心，多謝大家關心。」Kay陀B期間保守估計重了40磅，V煞下巴消失，「飛船」身形恐怕在產後亦難以變回「舢舨」，其經理人夏森美早前亦向傳媒坦承，Kay將投放更多時間照顧BB，不諱言會無了期停工。老公張繼聰變成經濟支柱，Kay生完一於繼續做女皇。
、
