拍《特技人》裸跑博入屋 關楚耀帶女上樓
關楚耀 一洗頹氣
現年35歲的關楚耀，06年出道時，因為外形被指似譚詠麟，聲線亦不錯，一度被封為「阿倫接班人」，加上有個殿堂級唱片監製老竇關維麟背後發功，贏在起跑線，事業發展一帆風順。
不過，09年同當時女友衛詩在日本藏毒被捕，雖然最後無罪釋放冇留案底，但形象事業插水要退出娛樂圈一段時間洗底。幸好機會冇離他而去，近日更有機會拍無綫劇，在新劇《特技人》演反叛富二代、Chok爆新導演入型入格，吸到唔少電視粉支持，成功一洗頹氣。
據知情者透露：「呢幾年TVB小生係咁走，惟有不停搵外援，班歌手都多咗機會，唱片公司就睇準時機幫Kelvin (關楚耀) 發圍，知道拍劇可以入到屋增人氣，就不停同高層及監製引薦Kelvin拍劇，好彩終於畀佢遇到《特技人》呢套劇，個角色仲好有發揮，為咗成功入屋Kelvin更加博到盡，知道劇中有一場要佢裸跑嘅戲，拍之前不停健身操fit，就算著住底褲拍佢都唔介意，覺得最緊要出到位！」
單身只係煙幕
同衛詩分手九年，關楚耀一直不愁寂寞，同圈外女友Megan拍過兩年拖，分手後同韓籍內衣索模Miu Kim拍拖一年，去年分手，近來出活動被問及戀情，他都聲稱單身，但原來單身只係煙幕，近日同C奶台妹演員安于晴過從甚密。據知情者透露：「其實一路佢都有識女仔，感情生活絕對唔寂寞，但佢已經唔敢高調。」始終經一事長一智，當年藏毒事件一度激嬲老竇關維麟，好彩獲唔少圈中世叔伯幫口講好話，又得阿倫出面力撐，才有機會再出碟重新出發，令他更珍惜每個機會。
據知情者透露：「件事可以話係佢人生一個好大嘅打擊，佢阿爸一度嬲到要佢返加拿大，好彩阿倫幫佢講盡好話，Kelvin答應會反省，唱片公司高層又好撐佢，繼續幫佢出碟，咁難得先有機會翻身，Kelvin都想成功洗底，就算拍拖都玩地下情，唔想外界仲覺得佢淨係識媾女！」
秘密來港
不過，日前關楚耀被本刊斷正約會，原來新歡C奶台妹安于晴近日秘密來港，8月9日下午，關楚耀同有小林依晨之稱的台灣演員安于晴孖住出巡，唔知係咪怕被發現，在大街大巷一齊行時，關楚耀都刻意同新歡保持兩三個身位距離，又左顧右盼兩頭望，表現緊張，然後二人上咗大坑一棟大廈，短敍後安于晴仲陪關楚耀開工，關係非一般朋友。
據知情者透露：「佢同Charlene三年前喺朋友介紹下識，因為Charlene好玩得，佢兩個好快就玩得好埋，仲會約埋一齊出嚟，有時Charlene會由台灣飛嚟香港探Kelvin，但佢哋見面會好小心，而且Charlene之前同徐若瑄姪仔沈建宏又傳過緋聞，佢哋啲關係好神秘，Kelvin喺朋友面前都冇認拍拖㗎！但睇到佢哋啲親密行為，明眼人都睇得出佢哋唔係普通朋友咁簡單。」人生有幾多個十年，走過高低起跌的關楚耀，事業能夠再現曙光，當然行每一步都要特別小心，明嘅！
撇女借衫
關楚耀同新歡上樓短敍後，再一齊坐車入電視城接工作人員，原本一齊去銅鑼灣借衫，不過，泊車期間因為發現記者，他刻意在另一層停車場先放低台妹，然後只同助手一齊入店揀衫，以為神不知鬼不覺。
不停睇手機
在店內揀衫期間，關楚耀不停睇手機，似同新歡聯絡。
同助手借完衫，一齊行去附近停車場攞車，關楚耀將車駛上地面先放低助手，然後駕車一個人返回北角半山寓所。
徐若瑄姪仔玩伴
16年9月，安于晴被拍到與徐若瑄姪仔沈建宏同逛清邁夜市傳出緋聞，上年再被拍到在酒吧消遣完一齊返回沈建宏台北寓所，關係親密。
徐若瑄14年嫁富商老公李云峰，姪仔沈建宏到賀兼在社交網留言恭喜。
肉照一籮籮
現年28歲的安于晴Charlene，在台灣有小林依晨稱號，演出經驗唔算多，不過其個人社交網就有唔少性感肉照，經常大晒C奶及床照。
在第一部電影《最完美的女孩》，安于晴獻出熒幕初吻。
經常谷盡C奶誘惑停不了，盡顯台灣辣妹本色，難怪夜蒲玩伴多，緋聞亦停不了！
