戀講嘢｜CC曹思詩為前度還千萬債 網友驚訝「翻版唐詩詠」變「厚唇崔碧珈」

《戀講嘢》CC 曹思詩 已轉行做時裝商人

ViuTV節目《晚吹 – 戀講嘢》日前第53集以「百萬情債」為題，請來現年30歲的曹思詩（CC）做嘉賓，節目介紹她現時的職業為時裝商人，目前戀愛中，在節目中她透露現在已經還清了所有債務，不過原來全部債務加埋息不止有幾百萬，而是有過千萬，全因前度係借財務公司，每個月光是利息已要還十幾萬。

193出賣Dee哥喜好

當CC出場時，浩南即形容她的外貌屬於歐美系，193就指她的朱唇應該好得外國人鍾意，CC就問193亞洲人如他鍾唔鍾意她這類長相？193初時避答：「呢啲嘢百貨應百客嘅啫！」最後還是說：「我鍾意啲好白嘅女仔，你呢啲歐美系係另一個界別，就係我隊友Dee哥鍾意嘅！」

CC曹思詩14歲邂逅大7年前度男友

CC憶述令她負債的前度，是一位負責搞party的老闆，已經搞了很多年，曾經亦搵到好多錢，那時CC只得14歲，被朋友帶了去party，因此認識了對方，直到她16歲那年，兩人開始拍拖。CC形容對方大她7年，當時仍在讀大學。她指當時對方像一個大哥哥一樣照顧她，她也很依賴對方。

CC曹思詩曾在前度建議下參加TVB藝訓班

原來CC在2013年約22歲時報讀TVB第27期藝員訓練班，也是因為這位前度的建議。她憶述當年有近一萬人去報讀訓練班，這位前度就教她在面試時如何對答，才能更勝一籌地取得當中一個席位。但其後他開始變得野心勃勃地去涉獵不同範疇的生意，包括搞貿易和賣空氣清新機等，旗下足足有7、8間公司，但CC指他的專長只是搞event和marketing，和這些生意無關，因此令他資金上開始出現問題。

CC曹思詩被申請信用卡套現兼按樓

CC指前度開始問她借錢，是在她18歲時，他為申請了一堆信用卡，然後用她的信用卡去「碌卡」，她指當年他賣空氣清新機，有一部收款用的「碌卡」機，他便直接用那部機去套現，但那時他在「碌」完卡，很快就還了錢，所以她也未有太在意。

直至CC首次獲家人支持置業，這位前度就想將她的物業拿去做按揭，最後她還是選擇繼續幫他，把那層樓按了。CC形容自己當時的確太蠢，蠢到完全無同屋企人商量過就借了錢給他，她憶述當時是想還人情給他，同時他的說話技巧也真是「無敵」，曾令到CC的保險經紀也借了過百萬給他。

CC：覺得直頭好似畀佢落咗降頭

CC憶述當年：「我覺得直頭好似畀佢落咗降頭咁樣，就算係分咗手，佢都死𦧲爛𦧲，不斷求我幫埋佢最後一次。（分咗手都照問你借錢？）係，分咗手照問我借錢。（你有冇催佢還錢？）緊係有啦，日日夜夜都不停催，佢就話『遲啲還、好快還、聽日有、聽日入票、今日入票』咁，每日都用唔同藉口！」

CC又指當時她的前度更用她作為藝人的名義，向一些二、三線的財務公司借錢：「因為佢show晒我哋啲親密合照畀人睇，咁就好似連簽名都唔使簽就借到。」話一出3位女主持即爭相要同193合照，話要用他的名義去借錢。

CC曹思詩最後賣樓還債

CC指當時前度向十幾廿間財務公司借了錢，在他失蹤後，每日有幾百個電話向她追數，甚至追到她屋企和公司樓下：「佢哋話『你唔好扮嘢啦，你同佢一齊呃錢，你哋攞晒啲錢去邊呀』咁，因為一間還唔到，就會有十間一齊爆煲，所以係好恐怖，我驚到嗰個禮拜喺屋企日日喊。」CC指她當時是賣了層樓去還債，但之後都仲有債務未清，她就用了幾年時間去工作還債。

現任男友陪伴度過難關

CC當時已有另一個男友，她不敢和對方剖白欠債的事，她指當時是一位TVB同事帶她去他家開party，從而認識了這位男友，她形容對方大隻、靚仔、好Man完全是她喜歡的類型，在她欠債後，他也成為了她的精神支柱。她補充指他是一個南非人，職業是飛機師，兩人曾一起去南非爬山，過程十分驚險，令她經歷過後，感覺有如重獲新生，兩人至今仍在拍拖。

CC話而家一蚊都唔會借畀人，亦想話畀所有女性聽，唔好咁易借錢畀另一半。對前任男友，她表示希望他不要再周圍作故仔呃人，而對現任男友，她就話很多謝他幫助自己度過最困難的時刻。最後她擺低現任男友寫給她，叫她永遠不要放棄的字條，希望能為這件事做個了結。

CC：「到死嗰刻都唔會原諒佢」

節目出街後，CC在社交網發文公開表示：「幾年前畀前度黃X光呃咗過千萬，壓力大到連遺書都已經寫好，不過一諗起父母就即刻打消左呢個念頭，今時今日佢依然做緊縮頭烏龜，我要賣樓還債，同媽咪嘅所有積蓄冇晒，同媽咪要住劏房，佢一句對唔住就離開咗香港，真心希望佢無再周圍呃人，呢個人我到死嗰刻都唔會原諒佢！佢係我見過最可惡嘅人，今生遇見佢係我嘅不幸！」

她續說：「在此再一次多謝曾經幫過我嘅人，真心感激，我亦捱過最困難的時刻，而家只有一個目標就係努力工作，希望可以畀屋企人一個舒適嘅生活，呢個係我最大嘅願望，亦相信喺依件事上所有有份去欺騙我嘅壞人最終會得到佢嘅報應，而好人亦都會得到上天的眷顧。想藉住我呢個遭遇勸告一啲諗住借錢畀人嘅人，無論佢點樣楚楚可憐地游說你，喺攞錢畀佢之前，喺簽任何文件之前都要諗清楚，同埋記得同屋企人商量吓，唔好好似我咁，咁天真幼稚，有時你以為最親嘅人，都會出賣你！」

即睇《戀講嘢》CC曹思詩細訴坎坷情史：

CC 曾是 Yama Girl 山系女孩 被封「翻版唐詩詠」

CC是模特兒出身，曾出版個人寫真集，2009年在香港動漫節「ACG IMAGE GIRL大賽」取得冠軍，2004至2013年間曾簽約亞視，到2013年考入TVB藝員訓練班，與劉溫馨、陳偉琪（現改名陳思圻）、張詩欣等為同期同學，2014年因主持J2台 《Go! Yama Girl》及 《山系女行Yama Girl》而受注目，被封為「翻版唐詩詠」。

《天命》曾演貼身宮女

在TVB期間CC曾演出不少閒角，近年最為人認識的角色，是在2018年劇集《天命》中，飾演皇貴妃的貼身宮女秋月。2019年CC離巢無綫，轉投王晶的星王朝旗下，計劃殺入內地拍攝網絡電影，同時又與友人合資五位數搞泳衣網店，並親自做生招牌Model吸客，同年她卻爆出為曾在一起八年的舊愛欠下630萬債務的醜聞，當時她更曾發起「眾籌」，以解燃眉之急，當時也獲得不少人伸出援手。

曹思詩：「我建議佢俾人包好過。」

2017年CC推出寫真集《Sexy on the Beach》，同期有位𡃁模麥紫莉（Chili）宣布要去日本拍AV，CC當時指自己係sell健康性感、陽光，寫真最激只會有半裸同T-back。又直言不會效法Chili去拍AV，因為會畀全世界睇晒，而且有機會染病：「我建議佢畀人包好過。」

CC最愛在IG上派福利，水著火辣「晒臀」照任睇唔嬲。當年CC初入TVB，就有「翻版唐詩詠」之稱，充滿陽光氣息，常曬出一身小麥膚色，曾被網友列為「十大最應該拍《3日2夜》女星」之一，有追蹤她社交網的人都應該知道她喜歡外遊，熟識不同國家的她來擔當主持人最好不過。