【BB來了】育有一子一女 拒再追多個 徐榮：等我中咗六合彩先⋯
不過呢啲都係戲內故事，現實中徐榮有個美滿嘅家庭，同太太結婚11年育有一仔一女，對於會否再追多個BB，徐榮話中六合彩先至會考慮⋯⋯
編輯:東方新地 | 原文：東方新地、Sundaykiss |圖片：新傳媒圖片、徐陳之家嘩哈哈＠FB、徐陳之家IG
《BB來了》徐榮演不育失婚男
《BB來了》播出以來，大家只知徐榮劇中飾演黎諾懿的哥哥，離過婚，性格獨僻又愛錢，仲有個挑剔又麻煩嘅阿媽盧宛茵。不過在昨晚播出的第11集，交代徐榮離婚嘅原因！楊卓娜飾演的金牌陪月王佳妙接咗個新客人，正是徐榮嘅前妻阿May，對方已改嫁及生咗一個囝囝，依家陀緊BB！
徐榮接載楊卓娜去開工時，點知撞啱阿May穿羊水要生得，徐榮二話不說幫手車佢入醫院，阿May平子平安，多謝徐榮送佢入院，仲叮囑佢找到佢愛嘅女人時唔好放手，搞到徐榮悲從中來走咗去⋯
楊卓娜之後追出去搵徐榮，徐榮話前妻早在結婚前已經好恨生BB做媽咪，可惜婚後徐榮做檢查至知自己不育，佢對此秘而不宣，但麻煩阿媽盧宛茵恨抱孫係咁迫前妻生BB，結果徐榮選擇離婚。
徐榮同太太離婚後性情大變，看似好惡死又愛錢，但骨子裡都好顧家，一個孭起頭家，搵錢供養大使嘅阿媽，而且佢仲好錫細佬黎諾懿。話時話，今次係佢同黎諾懿第二次飾演兄弟喇！對上一次係《愛．回家》嘅馬強同馬壯！
徐榮 結婚11週年放閃
徐榮 在11年前跟太太Kathy共諧連理，囝囝徐朗(Karson)在2007年出世，今年11歲；而細女「包包」徐心怡（Kerry）則在前年出生。太太在徐家Facebook Page寫道：「本以為平淡一生。。但有了大徐後一切都變得不平凡！先有徐小B。。。之後再有了徐包包」，11年來一家生活幸福滿瀉呢！
下月19是徐榮 跟太太的結婚12週年紀念，現實中同樣是好老公、好爸爸的他，當然不忘在自己家庭專頁晒幸福！
徐榮生日時在外地工作，太太甜蜜出post同老公講生日快樂，並留言：「全家人都好掛住你」！
「包包」《愛．回家》爆紅 徐榮父憑女貴
徐榮近年演出不少劇集，人氣急升，而徐榮於無綫處境劇《愛．回家》中，飾演顧家好老公馬強深入民心，之後密密接job，徐榮囡囡「包包」徐心怡曾經在《愛．回家》中同爸爸拍住上，客串小B女馬家好，當時只有兩個月大的她毫不怯場，眼仔碌碌人見人愛，成為觀眾的寵兒！之後包包受廣告商爭相邀拍廣告，連帶爸爸徐榮也受惠，繼續父女檔上陣。
「馬家好」深得觀眾喜愛
包包在《愛．回家》飾演「馬家好」後人氣急升，更獲得不少廣告商垂青接拍了不少廣告，觀眾緣非常好。
長大了點嘅包包變身可愛小美女，深受網民喜愛！
細女包包上學去
唔經唔覺，兩歲細女「包包」徐心怡正式上學，徐榮於Facebook張貼愛女校服照，更發表感言：「話咁快阿包返學啦！明明昨天仲係個BB，大得太快！」包包第一天上學去，徐榮與太太當然要親自接送，包包伸出雙手拖實爸爸媽媽，場面十分溫馨。
徐榮與太太陪伴愛女踏出重要的一步，三個人一起上學去。穿上校服的包包成熟了不少，看來準備好做學生啦！
包包背起書包後比平時更可愛，希望她展開美好的校園生活！
包包有個比他大八年幾的哥哥徐朗，一家四口非常幸福。原來徐榮和太太之所以當年決定生多個，全因囝囝鍥而不捨地哀求！徐榮話：「兩三年前阿仔已不斷要求生多個妹妹，一度拒絕過嘅，但佢神都出埋，我哋就圓佢心願啦。」終於有妹妹陪，徐朗當然將包包錫到燶！
細女包包 強吻哥哥面珠
囡囡徐心怡「包包」轉眼間大個女，徐榮之前於insatgram發佈數張照片，並留言：「妹妹kiss kiss 哥哥好Happy💕#其實係檢查哥哥個嘴乾唔乾淨#情深的一吻 #哥哥你要抹嘴」
哥哥抱著包包，跟住比包包肉緊強吻面珠，睇得出哥哥個樣非常受落，仲笑晒口，兩兄妹感情真好！
有個星級爸爸，囝囝徐朗都是名靚仔哥兒，雖然還未試過在劇集演出，但他其實是足球界的明日之星！徐朗現為本地球隊傑志U10青年軍成員，曾獲派至西班牙比賽，立志成為職業足球員，香港足球靠你啦Karson！
哥哥徐朗亦好錫細妹，當年 徐榮 想生多個女，都係因為Karson想要多個妹妹！
早前徐榮一家四口亮相綜藝節目《爸爸的告白》，徐榮提及囝囝在小時候因扭計，自己一時無心快語話：「你再扭計，我唔再理你啦！」當時年紀小的徐朗也回應說：「你唔理我，到你老左我，都唔會理你。」當時兒子說完這番話，自覺傷了爸爸的心，即場放聲痛哭。
徐榮 一家四口幸福快樂，生咗囡囡包包後，帶旺事業。有無諗過生多個呢？ 徐榮笑言：「夠喇，等我中咗六合彩先諗啦，哈哈！」現時有好老婆有子女，事業順利， 徐榮想必已經很滿足了！
天天都是父親節
今年父親節，徐榮發佈數張同仔女嘅合照，仲留言話：「日日都係父親節」！果然係有仔女就萬事足！
