後巷放閃 陳柏宇激咀爆奶孕妻
陳柏宇 見紅大驚
已經出道12年的「隱世歌手」陳柏宇(Jason)，近年事業順利愛情又得意，同模特兒老婆Leanne上年結婚唔夠半年就宣布造人成功，老婆預產期在十月，不過，由於老婆懷孕初期曾經試過流血，令Jason非常擔心，緊張到要全面監管老婆。據知Leanne四月陪Jason去澳門做演唱會，搭船返香港時發現下體流血，落船即刻去睇醫生，原來係因為唔小心抱小朋友時用力拉親，加上唔夠瞓身體弱，好彩冇大礙，但都要食一輪安胎藥。好友透露：「雖然冇事！但Jason已經畀老婆嚇親，原本兩個計劃去韓國旅行都取消埋，要老婆乖乖留喺屋企安胎，屋企啲粗重嘢完全唔畀老婆掂，就算七月頭Jason同衛蘭開show，佢一早講明唔畀老婆去睇，怕佢操勞，不過Leanne幾個月冇出街，係咁呻悶又話好想睇個show堅持要去，最後Jason就搵咗媽咪同朋友睇實先放心！」
陀女好開心
因為鍾意小朋友，婚後火速造人成功，兩公婆都好興奮。據知情者透露：「之前照超聲波知道係女，Jason同老婆不知幾開心，因為Leanne好鍾意女，一路都想第一胎就生女，依家如願以償，佢兩個開心到不停買好多BB衫同埋玩具返屋企，準備迎接屋企新成員！」
甜蜜咀嘴
近日兩公婆就爭取時間胎教，日前甜蜜拍拖出巡教定肚裡BB咩叫幸福，冇見一排，已經陀B七個月的陳太，個肚已經相當大，加上開始谷奶，Leanne變得圓潤不少。可能做慣Model，就算挺住巨肚行路仲係好瀟灑，兩公婆在銅鑼灣怡和街撐完枱腳，由於Jason要趕去工作，臨同老婆分開前仲要同老婆錫錫先走，閃爆途人！
表現友善
錫完老婆陳柏宇轉身發現記者，仲友善同記者打招呼。
Jason發現記者即通知老婆，Leanne等過馬路期間就不停睇手機。
神釆飛揚
早前Leanne在IG自嘲照鏡似「肥豬王」，呢日所見，有老公錫到燶的她，就算因陀B身材走樣，早就開心到照單全收，連過馬路都神釆飛揚。
晒愛心蛋糕
7月20日剛度過34歲生日的陳柏宇，有老婆親手做生日蛋糕同佢慶祝，因為知道老公愛操肌，Leanne仲專登整隻大隻手臂喺蛋糕上面，難怪Jason未食都甜入心。
夫妻檔搵錢
11年因拍《喜愛夜蒲》認識老婆符曉薇，拍拖6年上年七月拉埋天窗，因為出名夠恩愛，陳柏宇夫婦就吸引不少廣告客垂青，經常夫妻檔拍住出活動賺錢！
大晒身材
16歲已經做兼職Model的陳太，蜜月期間就著了多套性感泳衣大晒fit爆身材，瘦底嘅佢，相信產後好快修到身。
陳柏宇符曉薇結婚紀念日 晒恩愛：每天愛佢多一些！
陳柏宇與符曉薇去年7月2日結婚，早前是他們的結婚週年紀念日，二人都有於instagram發佈合照。符曉薇於instagram留下愛的宣言，表示：「萬眾期待嘅日子，今日陳生終於放假。我地終於可以拍下拖、行下街、食下飯，慶祝埋我地第一個結婚週年，同第七個拍拖週年。一齊左七年一啲癢都無，仲每天愛佢多一些，有時仲難捨難離，希望呢個感覺到永遠！」真係好sweet！
囡囡10月出世
陳柏宇4月時公布太太符曉薇懷孕，囡囡將於10月出世。懷孕中的符曉薇身形有少許發福，但依然咁靚！但係符曉薇就話自己好似家有囍事嘅吳君如！
陳柏宇：變得有攻擊性
陳柏宇屋企養有一隻鬆獅狗VV同老虎狗Bessie，佢早前出席活動，講到兩狗近日經常打大交，令佢非常煩惱：「屋企嗰兩隻狗唔知點解慢慢變得好有攻擊性，好鍾意打交，以前都唔會，尤其係食完飯嘅時候就會開始打。我太太同媽媽又唔識處理，平時有我喺度我就會一手抽起佢哋，問題係我唔係成日喺屋企，所以依家要快啲約狗隻訓練師睇睇可以點搞。」
陳柏宇續說：「當然有諗過到最後最壞嘅情況係將佢交畀我個朋友，隻狗同嗰位朋友都有相處過，如果交畀佢照顧，我可以晚晚去探佢，因為大家住得好近，但係如果真係咁樣會好灰囉！所以希望可以快啲睇吓專家有咩意見，處理咗兩隻狗嘅問題先，如果唔係到BB出世會好麻煩。」
搵Trainer幫手
不過報道一出即引來猛烈抨擊，陳柏宇翌日再接受訪問，強調會搵相熟Trainer幫手：「見到有好多愛狗之人討論，呢個情況有理性嘅討論係最重要，棄養依然都係最壞打算，如果最後解決唔到就焗住一定要行。當然我依家有搵相熟Trainer去教我點樣控制呢件事，唔好惡化，同埋會改變餵飼嘅方法。」
陳柏宇話呢件事入面最嬲係老婆Leanne唔企喺佢角度去諗：「我瞓唔着覺，瞞住老婆諗方法，諗呢個最壞打算我仲心痛，隻狗都養咗10年。但如果控制唔到愛犬，有機會傷害到BB，到時BB受傷、愛犬又有機會人道毁滅。我係為咗屋企先咁諗、咁打算，再講依家未需要做呢決定，搵到Trainer解決到就冇事。」又笑言享受太太氹番佢，所以要嬲太太耐啲。
Leanne則在網上發文強調唔會棄養：「首先我哋係唔會唔要任何一隻動物；第二，啲人話我哋教得唔好，如果成日上嚟我屋企嘅朋友都知，VV同Bessie以前唔係咁，係搬咗嚟新屋呢幾個月先打到咁；第三，我哋冇驚過佢傷害BB，因為一個喺地下，一個喺BB床，唔通佢識飛上嚟咬BB？我哋係驚佢哋打傷。」又指等過幾個月BB安定咗就會攞Bessie返嚟。
Leanne又指VV打交時差啲咬中Bessie眼球，好彩最後只係咬到眉頭。又爆老公陳柏宇最愛Bessie，曾因見到佢嘅老態而爆喊。
陳柏宇宣布做老竇 晒BB超聲波照報喜
陳柏宇(Jason)去年7月2日跟拍拖5年的女友符曉薇（Leanne）結婚，早前陳柏宇在instagram貼上超聲波照報喜，留言：「guess what！」唔使估都知係佢老婆有喜啦，真係恭喜晒！不過當時佢未有透露係仔定女！
之後Jason揭曉答案，將一段短片上載到IG，先拎出一張超聲波圖，然後叫大家估究竟佢係男仔定係女仔，到底係有慈姑椗定冇慈姑椗呢？之後再同老婆一齊切蛋糕，仲話切開之後就知道BB性別，如果係藍色就係仔，粉紅色就係女⋯⋯
之後二無喺大班朋友見證下切開蛋糕係粉紅色，開心到叫咗出嚟，之後大家仲齊齊大叫「IT’S A GIRL」！
揭開蛋糕原來粉紅色，係女仔呀！二人都希望陀B女，如今如願以償，恭喜晒陳生陳太！
《1+1的深情》爆房事
其實之前二人在田蕊妮主持的《1+1的深情》節目中接受訪問，當時Jason被問到對上一次行房他直言兩周前，阿田笑佢哋隔咁疏，阿田再問每周行房多少次？Jason笑說：「我諗最多都係一次，以我嘅能力！」
二人又於節目中畫將來跟小孩一起的一家三口圖畫，估唔到咁快夢想成真。
