盤點圈中10個爆肌猛男 肥仔激減34磅變筋肉人！
撰文：東方新地｜圖片：Instagram、新傳媒圖片庫、電視截圖
盤點圈中10個爆肌猛男
｜張繼聰
日前，張繼聰喺IG晒出自己赤裸上半身嘅自拍，見佢胸肌脹卜卜、腹肌格格分明之餘，仲有男人最性感部位之一嘅人魚線通通晒冷，更留言：「一個星期之嘛，即刻瘦番哂（晒）喀（咯）#我係絕對唔會變番咁樣 #因為一定會超越以前」，相當有決心要擁弗爆身材！
呢張爆肌相一出，隨即引嚟唔少人留言，當中更有老友森美指：「呢個身型都已經夠曬」，但張繼聰則表示自己唔甘心只係咁樣，原來呢張相係以前嘅舊照，唔知依家心裡面係想操成自己點嘅樣呢？
睇返之前啲相，由唔知幾時開始，張繼聰下定決心要操肌，而且仲要係爆晒肌嗰款！最弗時期嘅佢更鍾意不時自拍晒肌同人魚線，睇到女嘅就心跳加速，男嘅就表示羨慕，小編亦都只係得個恨字！
｜彭于晏
大家唔好以為台灣男神彭于晏自細都係綱條身型，佢喺2015年於個人社交網放上細個時嘅肥仔相，當年小學生嘅佢體重已達150磅！
直到大學時愛上打籃球，有了運動才減磅漸瘦。不過，近年男神好似比較鍾意踩單車。
相信大家都仲記得彭于晏於電影《激戰》中，一身爆肌嘅身型，加埋佢靚仔嘅樣，真係迷死唔少人！
最諷刺嘅係，男神已經練到自己咁大隻，但佢都會話自己肥，究竟肥喺邊呢？
｜張家輝
提起電影《激戰》，除咗台灣男神彭于晏有份演出外，相信最令人難忘嘅仲有電影中嘅主角張家輝！其時已經49歲嘅張家輝為拍該戲而操得一身超強肌肉，令人印象非常深刻！
大家睇下，即使張家輝同彭于晏拍埋一齊，雙方身型都唔輸蝕俾對方！
｜丁子朗
2016香港先生亞軍丁子朗咪睇佢平時好似瘦底冇肌肉，原來佢平日都會密密操肌，衣服下係一身健實肌肉！
小鮮肉丁子朗曾經喺《森美旅行團2》及《歎得好健康》中大方展露完美身材，見其胸肌、腹肌，以及勁凸起嘅側腹肌，認真估佢唔到咁大隻！
｜劉浩龍
呢這個笑到對眼都變成一條綫嘅人就係師兄劉浩龍，細個時嘅師兄都係一個不折不扣嘅cute cute肥仔。大個咗嘅師兄都經歷過一段肥仔時期，佢之前就騷咗一段瘦身過程嘅短片，片中組合咗師兄由肥仔進化成「肌佬」嘅照片。
師兄當時為咗演唱會，出盡全力減肥，由一舊大拖肥糖，逐漸演變成一排六舊嘅腹肌，前後足足減咗34磅！事實再次證明，只要有決心同恆心，肥仔都可以變大隻仔！
食得清淡就一定係每個減練出正面嘅意志同體魄肥人士嘅指定動作，師兄一樣冇例外！雖然完咗演唱會，但師兄一樣冇偷懶，依然不斷繼續操fit自己，只為練出正面嘅意志同強健體魄！
｜森美
呢個戴眼鏡兼帶點Baby Fat嘅小學生係邊個？佢咪係森美囉！原來小學時期嘅森美都好有baby fat！初入街嘅森美望落塊面其實都有啲baby fat，但笑嘅時候依然可見其尖下巴。
直至近年，森美終於勤於運動，練得一身好身材，同昔日肥肥地嘅自己講拜拜！佢仲練到自己成身肌肉，名副其實變咗個「肌佬」，唔講仲以為森美都有份拍電影《激戰》！
幾經辛苦至練到咁大隻，森美當然都要趁機晒一晒肌，話俾大家知佢係有肌男！
｜陳智燊
陳智燊（Jason）之前被老婆宋熙年出賣童年照，驚爆向來斯斯文文兼官仔骨骨嘅陳智燊，原來童年時都係個微胖小子！不過，可能大個長高時，令Jason由一個微胖小子變成一個瘦身型嘅男仔。
另一方面，其實Jason都會做下運動，練下肌肉，大家睇佢舉啞鈴舉到老鼠仔都走哂出嚟！
大家睇，呢張相中嘅Jason眼神係何其堅定！
｜黃宗澤
唔好睇一向身型高挑嘅黃宗澤似係個瘦底之人，原來佢中學時期係個肥仔，真係佢唔自爆都真係睇唔出！
不過之前Bosco為拍《飛虎之潛行極戰》，就特登健身keep fit塑身操肌，更操出42吋健碩胸肌！唔好睇Bosco平日做gym好似好唔認真咁，其實唔落力做，又點可以有咁fit嘅身型？
｜林子善
回憶起林子善入行初期，由一名排骨仔變到今時今日嘅大隻佬，似乎身型嘅變化亦都非常大，睇嚟圈中嘅男士們一般都係會對自己身型有所要求！
林子善平日閒時都會晒下自己努力練成嘅肌肉，仲會擺出非常有自信嘅甫士，同老婆企埋一齊時，男人味出晒嚟！
｜陳奐仁
陳奐仁向來都實力派，賣歌藝唔賣樣。而陳奐仁決心減肥的原因，好有可能係同佢曾經將椅子坐「陷」有關！話說陳奐仁2017年喺馬來西亞接受訪問時曾講過，佢喺當地一個音樂比賽中任導師，點知將導師椅子坐「陷」，但其他人的椅子無事…
如今，相信佢唔會再坐「陷」椅子，皆因通過嚴格飲食控制加上狂做gym，而家佢已由由180磅肥仔減磅成功，激減22磅塑身成158磅肌肉男！
陳奐仁仲會經常上載做gym短片上網，分享自己努力運動嘅成果！
