張學友233場巡唱終落幕 大女張瑤華成頭號鐵粉
撰文：東方新地 圖片：新傳媒圖片
大女張瑤華 現身巡唱尾場
學友舉行巡唱兩年多以來，走遍全球97個城市，以香港作為巡迴終結，完騷後接受訪問，他透露尾場全家人有捧場，太太羅美薇坐在控制台上面，而大女張瑤華睇咗十幾場，細女因為要返學只能睇5、6場，學友又笑言有失業的感覺：「第一件事諗聽日點，下個禮拜又點，都冇嘢做喎。有啲唔知做乜好嘅感覺，因為過去兩年都好機械式，好規律。」但學友依然以家人為重，他指是時候將自己交回給家人，嚟緊陪妻女過新年。
完成233場巡唱的張學友又稱：「唔敢說下次有冇咁好表現，不過今次係我覺得最滿意嘅演唱會，所以自己叫停，希望可以挑戰自己，做啲唔同嘅嘢俾樂迷睇。」學友又說一直好想做的音樂劇：「講咗好耐，但唔係話做就做到，演唱會就可以自己決定一手一腳去搞，但音樂劇要搵人寫古仔、寫歌，呢個唔係自己範疇，一靠人嘅嘢就好難，盡快啦。」問巡迴是否賺了過億歌酬，他即笑說：「講錢失感情啦。(有記者笑言這都是辛苦賺來的血汗錢？)你哋都睇得出呢！」
花籃變善款
張學友每次開騷都作出愛心呼籲，希望捧場的好友們將花籃變善款，今次也不例外，捐款將撥捐快樂港仁慈善機構，據知已捐助的有容祖兒、陳慧琳、鍾楚紅、譚詠麟、張家輝、鄭少秋、張智霖、袁詠儀及吳婉芳等。
之前一度有傳張學友完成今次尾站演出後會「封咪」退休，不過學友在台上表示會一直唱跳下去，也會積極籌備下次巡迴演唱會，向歌迷大派定心丸。
個唱舞台燈光效果好靚，仲有唔少煙火效果，真係極盡視聽之餘！
學友於最後一場傾情演出，唱跳冇留力。
一眾好友劉嘉玲、舒淇、吳婉芳、許瑋甯、楊謹華、梁家輝、鍾鎮濤夫婦、杜德偉夫婦、蔡一智夫婦、狄波拉、胡楓也有捧場等。
之前已經睇咗十多場嘅大女張瑤華(Zoe)，呢晚繼續現身支持爸爸，坐頭排嘅佢邊唱邊揮螢光棒打氣，學友與觀眾握手時，瑤華亦握埋一份。
學友在尾聲致謝時，特別指向女兒張瑤華的位置說：「多謝屋企人，過去兩年對我包容同支持。」講到巡唱結束，學友雙眼通紅哽咽說：「我唔捨得，但亦是自己叫停嘅。唱歌係我呢生人最鍾意，叫停，係因為想進步，唔想停喺呢階段。其實我好想同團隊一直表演下去，但我已57歲，過幾年60歲，不知仲可以有幾多進步，我答應大家在不久將來，帶出更好演出。」encore時學友同樣送上一連串經典歌曲，以《如果·愛》為第233場劃上完美句號。
瑤華睇得相當投入，學友受訪時笑言自從演唱會後，大女成為他歌迷之一，她睇過好多場，也是他的強心針。不過學友斬釘截鐵說囡囡不會上台表演。
張瑤華坐喺嘉賓席聽爸爸唱歌唱得如癡如醉，睇到興奮又會揮動打氣棒。
瑤華好低調，多年來鮮有跟父母現身公開活動，不過學友巡唱尾聲她睇足十多場，相信學友都好開心！睇真啲，瑤華都好似媽咪㗎！
張學友MayMay和朝偉嘉玲兩對夫婦都是好朋友，早年偉仔50大壽，MayMay也有出席！
歌神張學友係四大天王中最早結婚嘅一個，老婆羅美薇(MayMay)是張學友唯一個緋聞兼真正女友，MayMay在學友未走紅時相戀，二人在96年註冊結婚，MayMay先後在01年、05年誕下兩名女兒。而MayMay婚後一直好低調，二人也不想女兒活在鎂光燈下，故一直對她們十分保護！
回顧張學友出道早期俊秀相
回顧張學友出道早期俊秀相
｜85年 可愛單眼皮
張學友84年贏得《 十八區業餘歌唱大賽 》冠軍後，85年首張大碟《 Smile 》大賣20萬張 ( 四白金 )，瞬間成炙手可熱新晉歌手，當年24歲嘅學友一臉稚氣係個可愛單眼皮男孩。
｜86年 擘髀型坐凳
張學友著上吊帶牛仔褲到球場影相，左手撐腰擘髀坐凳，坐姿有型，而佢件闊到衣不稱身嘅 上衣，打扮受日本八十年代潮服影響。
｜86年 生日會獻唱
86年張學友喺某 disco 舉行25歲生日會，除經理人陳自強、成龍、張國榮、張衞健等圈中人出席外，仲有近六百位歌迷，場面墟冚，難怪獻唱時特別興奮開心。
｜86年 單手拉彈弓
86年張學友登上某音樂雜誌封面，喺跨頁海報人物中著運動褲坐喺地單手玩拉彈弓，學友歌聲雄渾，原來亦大力到暈。
｜86年 情定羅美薇
張學友86年參演第二部電影《痴心的我》擔任男主角之一，同另一女主角羅美薇戲假情真撻著成為情侶，兩年拍拖十年喺倫敦註冊結婚。
｜87年 罕著潛水衣
張學友除咗係樂壇天王，亦係運動健 將，尤其網球最精，87年罕有全副潛水裝上陣，展現無限活力。
｜88年 突變雙眼皮
呢張攝於88年嘅相，發現未滿27歲嘅張學友由以往單眼皮突然變成雙眼皮，隨即惹嚟做割皮手術傳聞，據學友解釋話係慢慢自然變成。
｜89年 騎呢笠雀籠
89年張學友替某音樂雜誌影相，應攝影師要求，滿頸圍住多個雀籠，騎呢程度媲美 譚小環 CD 封面頭笠雀籠。
｜89年 最佳男配角
張學友電影代表作係88年嘅《旺角卡 門 》，片中演劉德華條𡃁烏蠅，衝動又惹人煩厭，「 寧願做一日英雄，都唔要做一世烏蠅 」成金句，翌年憑烏蠅一角奪第8屆香港電影金像獎「 最佳男配角 」。
｜92年 孖梅姐致敬
92年「初代歌神」許冠傑宣布退休，無綫舉行《 許冠傑光榮引退匯群星 》，全港當紅歌手同影星出席，場面史無前例，有份上台獻唱致敬嘅天王張學友同天后梅艶芳喺席上合照留念。
｜93年 穿粵紅線女
93年香港電台同廣東電台為「 希望工程 」 籌款製作《 萬千希望在人間 》，天王張學友夥拍粵劇名伶紅線女合演折子戲〈 初遇訴情 〉，一個係樂壇歌神，一個係粵劇泰斗，破天荒跨界合作成一時佳話。
延伸閱讀：
張學友演唱會永遠預留某位置
傳聞指有位歌迷幾經辛苦買到「第8行26號」的位置，但卻在演唱會前不幸離世。而學友得悉後十分難過，於是決定每場演唱會的第8行26號位置永久保留，以紀念這位忠實歌迷，並感謝他與病魔對抗時仍不忘對自己的喜愛，用生命去支持自己。對於此傳聞，學友並無作出回應，但其所屬唱片公司環球解釋無此安排，但不清楚會否是歌迷的自發行為。
但有網友指出，其實每場演唱會預留特定位置的是內地歌手。原因是早年唱片公司為周筆暢舉行首埸個人演唱會，但其好友卻在前夕因交通意外去世。而周筆暢為紀念好友，特意將與自己生日7月26日同數字的「第7行26號」坐位永久不賣，並在該位放上鮮花。
學友雖無預留位置，但他每次演唱會都會叫好友以米代花籃，又或將心意轉化做善款，幫助有需要的老弱長者，讓他們可以得到免費的中醫診療服務。而下月的香港站，學友便鼓勵大家將心意轉化做善款，每100元可以幫助一位病人獲得一次免費的中醫診療和3日內服藥。
「逃犯剋星」張學友合肥個唱九名逃犯落網
歌神張學友最近榮升「逃犯剋星」，在十月二十一號，於安徽合肥舉辦演唱會後，合肥警方就在微博宣布，共捕獲九名逃犯，其中有四名是在演唱會前一天被捕。據不完全統計，今年以來有約四十名罪犯因「學友演唱會」而自投羅網。睇睇個timetable：
歌神張學友在4月起在內地舉行巡迴演唱會，當時不到3個月時間已有4人落網被捕，因此被網民封為「逃犯剋星」。張學友曾對此回應道，「無論甚麼人，我想都需要娛樂的」，又稱「做賊的」無論去哪裏都會被抓，「你不在我的演唱會上被抓，你去便利店買東西也會被抓的」。張學友的回應非常謙虛。
在本月二十一號，合肥舉辦演唱會後，警方在微博公布，演唱會結束後，經點算共有九名網上逃犯被捕，他們承認並非為看演唱會而到合肥。
北京公安都喺微博公開讚揚，並鼓勵學友多舉辦演唱會。
有網民質疑是警隊內部大型行動，演唱會只是煙幕。
張學友唔單止唱得，拍過嘅好電影都多不勝數。有網民仲話佢除咗有把靚聲之外，仲有影帝級演技。我哋即刻盤點吓張學友嘅10大好戲！
盤點歌神10大好電影
「歌神」張學友嘅好歌係唔少人心目中嘅經典，但其實佢都演過唔少經典電影，有啲仲拎過獎添呀！
1.《旺角卡門》
張學友喺拍攝《旺角卡門》前已經拍過唔少電影，好似《痴心的我》、《天賜良緣》、《猛鬼差館》等等，不過呢啲都比不上呢部咁經典！因為張學友喺戲中一句：「食屎啦你！」成為神級Cap圖，時至今日都仍然有唔少網民拎出黎講笑㗎。
2.《笑傲江湖》
張學友都有份演嘅《笑傲江湖》，亦即係許冠傑扮演令狐沖嘅版本。雖然一班80、90後都未必睇過，不過有首歌都肯定聽過啦！因為主題曲係黃霑有份唱嘅〈滄海一聲笑〉！張學友仲憑角色「歐陽全榮」獲第27屆金馬獎最佳男配角添。
3.《倩女幽魂2之人間道》
唔知係咪張學友演古裝片演上癮呢？拍完《笑傲江湖》後隔咗排，張學友又演古裝片啦，而且仲係由張國榮、王祖賢及李嘉欣等一齊主演，真係粒粒皆星呀！戲中扮演知秋一葉嘅張學友，仲連埋《笑傲江湖》雙料入圍第10屆香港電影金像獎最佳男配角添！
4.《阿飛正傳》
好多人對《阿飛正傳》嘅印象幾乎都喺哂男主角張國榮身上，但其實張學友都有份演㗎！佢就係扮演暗戀劉嘉玲嘅歪仔。張學友嘅呢套戲嘅戲份肯定冇張國榮咁多㗎啦，所以大家對佢印象冇咁深都正常嘅。
5.《喋血街頭》
《喋血街頭》係張學友首次入圍金像獎最佳男主角嘅電影，但可惜同屆嘅對手實在太強勁，有《阿飛正傳》嘅張國榮、《愛在他鄉的季節》嘅梁家輝，同埋《賭聖》嘅周星馳。張學友雖然喺《喋血街頭》嘅演技有超水準發揮，但強敵當前始終無辦法成功封帝。
6.《黃飛鴻》
作為《黃飛鴻》系列嘅首部電影，呢套《黃飛鴻》當然係經典中嘅經典！而張學友喺戲中就係扮演牙擦蘇，戴住副哨牙嘅佢睇落都幾搞笑㗎。佢仲憑住呢個角色再度入圍金像獎最佳男配角。
7.《射鵰英雄傳之東成西就》
唔知張學友係咪因為睇見自己喺《黃飛鴻》嘅表現咁好，所以諗住拍多啲笑片呢？好似呢套經典港產喜劇《射鵰英雄傳之東成西就》張學友亦有份參演，佢仲要面對變咗雙潤腸嘅梁朝偉演戲添，都好考驗忍笑功力㗎。
8. 《超級學校霸王》
相信有睇過呢套戲嘅巴絲，第一個即刻諗到嘅可能劉華扮鐵面、或者扮「春美」嘅索爆邱淑貞，不過張學友扮演嘅軍佬都一樣好好笑㗎！剩係個髮型已經冇得輸。雖然扮得似唔似就見人見智，不過呢套電影喺一班80後相信都有返咁上下地位。
9.《東邪西毒》
呢套經典文藝片中，幾乎個個角色都被寂寞所困，唯一有得出呢個困境嘅，就只有由張學友扮演嘅洪七。如此與眾不同，難怪個個有睇過呢套戲嘅影迷，對張學友個角色都難以忘記。另外請留意返，雖然張學友喺《射鵰英雄傳之東成西就》都係扮演洪七，不過《東邪西毒》同《射鵰英雄傳之東成西就》係兩套唔同嘅電影，咪搞錯呀。
10. 《男人四十》
電影講述由張學友扮演嘅男教師同林嘉欣飾演嘅女學生發生咗師生戀，同時與結婚多年嘅太太出現問題，故事中張學友感情錯綜覆雜，而喺事業上亦苦無突破，張學友喺現實中當然冇經歷過啦，但佢亦能夠將呢種男人四十嘅演出嚟，所以當年佢憑電影入圍金像獎影帝，呼聲極高，但最後都係失落呢個獎項，真係好可惜呀！
