張振朗 陳芷尤 IG同步講分訊 三年情告終
張振朗：唔涉及第三者
張振朗同陳芷尤拍拖三年幾，經常甜蜜外遊，為保密戀情，每次打卡都會分開影單人照，今次宣告「分訊」，兩人就分別上載過去在同一地點外遊時影的單人背影照，並貼上同一段留言表示：「多謝這幾年來的美好回憶，所有事情就像昨天發生一樣，依舊溫暖。我們當中並沒有涉及第三者。雖然現在關係有所改變，但我們都會在遠方繼續支持大家。感謝這幾年來對我們的關心。」
陳芷尤：分開咗一段時間
宣布「分訊」後，張振朗唔肯回應分手嘅原因，只係話好多謝對方呢幾年嘅關懷同支持：「要作出呢個決定，其實雙方都好難，但希望日後大家都可以開開心心生活，行出自己人生新一頁，我哋會繼續喺遠處默默互相支持，多謝大家關心！」而陳芷尤就指大家仲係朋友，只係各有各忙、觀念唔同，仲話兩人已經分開咗一段時間：「選擇公開因為唔想外人繼續懷疑同問，希望大家會畀番啲私人空間我哋！」
曾秘飛星見家長兼過生日
雖然忙於拍劇，但七月二十日是張振朗生日，去年他就揀咗秘密陪女友Apple返新加坡見家長。「咪睇Owen外表好似好花弗，佢對女友其實好專一，佢一有時間就會陪女友，果次因為Apple在當地拍緊嘢，佢專登去探班，一齊過生日！其實拍拖都三年，佢一早見晒家長，呢次都順便去探下Apple屋企人！」但近日成為珍姐頭寵的他，被要求將戀情低調。「話晒上緊位，唔想俾人覺得佢只係掛住拍拖，公司講明要佢低調啲，最好少提拍拖嘅嘢！」知情者說。
當時張振朗接受本刊記者訪問，問到佢係咪去咗新加坡？佢話：「咁都search到！(係咪陪女朋友陳芷尤返鄉下？)好朋友……去行吓咁！(有冇見到佢屋企人同朋友？)食飯一定有，都有見過嘅！其實因為佢喺嗰邊拍緊戲，我去探佢班，睇吓佢拍成點！」問公司有冇叫二人戀情低調？佢話：「公司唔會阻礙我拍拖，係畀好多自由我嘅！我哋係有共識低調戀情，我哋永遠覺得工作係行先，因為好怕出親嚟都被問拍拖嘅嘢，反而忽略工作嘅嘢，所以依家一定以工作行先！公司真係畀好多機會我，所以更加唔想人覺得我掛住拍拖！所以我哋成日都話大家係好朋友來囉！」
秘遊法國荷蘭
其實早在去年五月，二人已經秘密同遊法國同荷蘭，一樣唔敢公開，可惜因為分別在lG打卡，就算只係放單人相，仍然被眼利網民踼爆！雖然拍拖避忌唔敢張揚，但好明顯34D咪神已經箍到張振朗實一實！男方就算同一班索女拍劇都成絕緣體！
14年仲係新人的張振朗 ，同一齊在25屆藝員訓練班畢業的陳芷尤，就因同拍《愛回家》朝夕相對好快撻着，更極速在深井同居，但當時二人仍是新人，怕拍拖影響事業，當時被本刊斷正，二人亦只以大家住同一屋苑來解畫！咁又係，話晒畀珍姐點名力捧，一劇接一劇，張振朗點都要事業行先！
