跟媽咪見識大場面 張慧儀 帶養子去生日P
張慧儀 帶養子去生日P
張慧儀、寶珮如和楊玉梅日前好友應邀請出席的生日派對暨公司周年宴會，活動上慧儀遇見很多舊朋友，包括近年甚少在港露面的尹揚明和吳毅將，仲有早前在無綫劇《宮心計2深宮計》而成為閨蜜的章尚宮謝雪心。
原來當晚慧儀不是單拖赴宴, 而是帶同她的養子Hanson出席，Hanson乖巧地跟在媽媽身邊見識大場面。
張慧儀：崩潰都要撐住!
當年戀上拉丁舞王霍紹裘，更一度訂婚，點知慘被未婚夫毒打婚事告吹又鬧上頭條，跌入人生低潮的張慧儀一度失落避走北京。機緣巧合之下，在孤兒院聽到兩歲的Hanson一聲「媽媽」，張慧儀的生命從此改寫，認為小生命是上天派來的天使，決定領養做單親媽媽，還為他改名跟自己姓叫做張晃維。不過Hanson出世後被親生父母遺棄是因為有先天性心臟病、又因為一度腦缺氧影響其小肌肉發展及說話能力，十三年來讓張慧儀用了不少金錢和心神撫養照顧。
手術後定居香港
為湊仔又為撲醫藥費，張慧儀接戲登台又經營參茸生意，十年來為方便搵食接連搬屋，分別在廣西、廣州、大馬、北京定居過。今年八月囝囝要再施手術在心臟動脈放入導管，一邊為仔撲過百萬手術費，張慧儀亦決定手術後與兒子定居香港，她接受本刊訪問時話：「四年前拍《M Club》時囝囝喺香港讀過書，佢鍾意香港，不過我呢兩年要拍戲搵錢，成日唔喺佢身邊又唔想靠晒工人，所以去年擺咗佢喺大馬畀婆婆照顧。」
張慧儀續說：「囝囝八月個手術費用超過七位數字，所以我呢兩年都鋪排緊不停接戲賺錢，啱啱接咗套電影要拍到七月至返香港，跟住希望做完手術同個仔喺香港搵學校定居，一嚟方便佢療養，二嚟都想留佢喺身邊，一路搵錢一路睇住佢成長。雖然係辛苦，但幾崩潰都要撐住，佢就係我心肝椗。」廿四孝媽媽張慧儀當之無愧！
昔日尤物
93年代表大馬選華姐入行，張慧儀係一代性感尤物，在電視台備受力捧，闖影圈亦有不少性感代表作。
今日慈母
直至06年收養Hanson，張慧儀為照顧養子改變自己一生，無私慈母形象深入民心，更為了囝囝放棄不少富商追求。
母子檔出鏡
Hanson因為有先天心臟病需要長期接受治療，勤撲水養仔的張慧儀最近更帶埋囝囝參與拍攝宣傳銀行保險產品。
四年前拍完《M Club》人氣回升，又一早知今年15歲的Hanson需要七位數字費用動手術，張慧儀近年因此食住人氣不斷接拍網劇及網絡電影。
為撲水，十年來開過貿易公司亦賣過參茸海味，張慧儀更為了做生意帶住囝囝先後搬過去北京、廣西、廣州、大馬居住。
三月尾才在內地完成劇集《丫鬟大聯盟》，一心以為可以陪囝囝放暑假施手術，不過為撲水，又臨時北上拍電影到七月。
經常走南闖北搵食，張慧儀去年被迫把囝囝留在大馬由媽媽照顧，剛過去的母親節，就發文讚Hanson親手完成砌圖送給外婆做禮物。
視養子Hanson為己出、瞓身工作賺醫藥費，張慧儀去年因為無私母愛獲得內地頒獎禮頒發愛心媽媽大獎。
情路坎坷
有樣有身材，張慧儀入行多年來情史多多，不過卻沒有一個開花結果。早年入行同林偉、盧慶輝拍過拖，都係因為男方花心怒斬情絲，02年戀上拉丁舞王霍紹裘，又因為被打搞到婚事告吹；近年營商本來遇上富商拍過拖，可惜都係因為男方無法接受養子Hanson，最後又係分手收場。
張慧儀、羅霖《深宮計》再結戲緣
張慧儀在《深宮計》中飾演四司之一嘅陸司製，與羅霖飾演的徐司珍是表姊妹關係！看到這個組合，大家有冇想起當年嘅處境劇《真情》？其時張慧儀飾演彩瑤、雙雙(羅霖飾)同阿海(黃智賢飾)大玩三角戀，好經典！
張慧儀 華姐入八強
92年，張慧儀參加馬來西亞怡保區華裔小姐獲得冠軍，之後在93年代表馬來西亞怡保參選國際華裔小姐，打入最後八強，雖然未能奪冠，但獲得無綫賞識簽佢成為旗下藝員。同年拍第一部處境劇《開心華之里》戲份好重，之後演出不斷，演過的劇集包括：《廉政行動1994》、《新重案傳真》、《阿Sir早晨》、《刑事偵緝檔案》、《壹號皇庭V》、《陀槍師姐IV》等，但最經典都係真情入面，一人分演兩個角色「李彩瑤」同「吳芳貴」啦！
張慧儀都拍過好多電影，不過最為人記得就是接拍了王晶的電影《強姦3OL誘惑》及《原始武器》，她因而獲得「性感女神」的稱號！
叫一聲媽媽 決意領養
不過直至06年，慧儀遇上了養子Hanson後，生活和生命也有了重大的轉變！
那一年，慧儀到北京「平安之家」做義工帶Hanson去食雪糕，他突然叫了一聲：「媽媽」！激發了她的母性，決心要領養他，慧儀接受專訪娓娓道來：「一聽到佢叫我媽媽，我啲血就向上沖，我好喜歡佢，好合眼緣，一定要抱佢番去！」為了兒子，她戒掉爛蒲爛玩的壞習慣，勤力做生意賺錢供書教學、醫療、交租等等，每月開支最少五萬，「所有開支我一手一腳包辦， 背後冇朋友、男朋友資助，所以我要勤力啲！」
女神頓變慈母，放下名牌手袋，提起環保袋出街湊仔，這12年來慧儀犧牲了愛情、青春，花盡精神和金錢給兒子，換來一份珍貴的母子情。轉眼間Hanson已是15歲的男孩⋯⋯
隨時心臟病發離開
Hanson的病情非輕，不能根治，隨時會病發離開，慧儀解釋只能不斷做手術拖延，「佢四個月大時做咗一次手術，嗰次手術解決到當時面對嘅問題，隨住年齡成長，佢需要第二次手術，但手術有風險，同醫生商量後，我決定唔做住。手術係要做，但佢幾時唔得冇人知，所謂嘅唔得係指狀態下滑，好容易、唔係咁active，我哋決定等佢狀態下滑先進行手術，大家唔知距離狀態下滑仲有幾耐，如果仲有一年，萬一依家做手術唔成功，就會即刻……而佢狀態下滑都一定要做手術，咁不如到時先博。」
「好珍惜每一日的相處」
慧儀早已做好心理準備，小天使會隨時離開，「生命嘅長短我不能控制，我只能俾到佢質量，我好珍惜我哋每日一齊嘅時光，同埋對佢好好，坦白講，如果有一日有咩唔開心嘅事情發生，我一定會好傷心，但我做咗思想工作，掛念佢、懷念佢都有多種方式，我唔會日日好down，可能只係一陣子，如果呢日真係來臨，係因為上帝覺得我嘅壞習慣改好晒，所以要收番佢上天，我會用更多時間去照顧其他小朋友。」
冥冥中注定
Hanson成為慧儀的兒子，似乎冥冥中早已注定！06年慧儀申請領養，但因為當時有對美國夫婦已入紙申請領養他，申請過程需時八個月至一年，所以她只可以暫時寄養，一年後他就要被領走。但不知何來的感應，她覺得該對夫婦最終會放棄，結果，真的應驗！「當時Hanson唔識講嘢，第一次手術後，佢昏迷咗八星期，嗰間醫院亦好簡陋，佢嘅肝、腎全部腫晒，醫生估呢個細路冇㗎喇，奇蹟佢又醒番！但因為佢昏迷期間腦部缺氧，所以佢唔識講嘢，對方諗諗下覺得太多問題，放棄咗，做咗我個仔。」
慧儀與Hanson曾討論親生媽媽，他覺得親生媽媽的形象是超人變身前的女仔，有日他夢見親生媽媽，慧儀問他：「你係咪好掛住你親生媽媽？」他大哭，慧儀安撫他，「我哋唔好追究，反而要多謝佢，如果唔係佢，我哋唔會喺埋一齊。」
「所有人都問點解唔㨂健全⋯⋯」
很多人問為什麼張慧儀偏偏要選擇領養一個有錢都未必換到健康的小朋友。她說：「所有人都問我點解唔揀個健全嘅，我只係知當時感覺好強烈，我要抱佢返去。相處後覺得佢好可愛，我好鐘意就係咁囉！喺實質生活上，咁多年嚟都係辛苦，帶住佢穿州過省搵食。點解我有呢種力量而又唔覺得攰？真係好奧妙。如果當年我諗深啲會好驚，可能會縮沙，負擔咁重真係唔係講笑，但我當時完全冇呢個諗法。Hanson教識咗我好多嘢，以前我唔信神，至今亦未受浸，但我覺得阿仔係上天俾我嘅生活體驗。」
一代性感女神 收起性感
Hanson直到兩歲，只懂得「媽媽」、幾個數字及少量單字，慧儀首要任務要教他說話，母子才能溝通，「一開始我唔知佢想要乜，問佢食飯、飲水？佢就搖頭搖手， 喺生活上開始教佢。」八年後，Hanson已懂得兩文三語，普通話為母語，廣東話識聽未識講，英文學校教，母子主要以普通話溝通，「一開始佢淨係識聽普通話，佢講嘢唔叻，所以只講一種語言，唔好搞到佢咁亂，依家讀書先學多啲其他語言，進步咗好多喇，其實你留意下，長句子佢理解比較慢。」
昔日性感女神不再性感，每日師奶look湊仔，素顏架起眼鏡，穿上平民衣服，與普通人一樣搭地鐵湊返學放學，她大方任影，也不怕暴露兒子的學校影響讀書，她大讚兒子就讀的培生學校，就是她兩母子留港生活的最大原因。「呢間學校非常好，係陳智思太太（楊碧鈴）開，真係一個辦教育嘅人，好針對性教育。」在學校身上，慧儀也獲益良多，學校教學生亦教家長，真正做到家校合作，「學校教埋家長點同仔女溝通，唔好責備佢，我哋說話係有力量，『你個衰仔』呢啲說話，講得多個仔真係變衰仔，所以要多講鼓勵說話。」
血液缺氧多病痛
兩人前年回流返港，可能Hanson水土不服，經常生病入院請病假，「阿仔血液含氧量得番70%（正常95%至100% ），我帶佢睇醫生唔收，一check就話太低，要call白車去政府醫院，因為含氧量太低會死㗎嘛，好似高山症咁，但佢長期處於呢個水平，已經習慣咗，所以佢個嘴因缺氧發紫。因為醫生唔收，所以有咩頭暈身㷫我唔會帶佢睇醫生，我知點照顧佢，但唔睇醫生冇醫生紙，請病假都請到唔好意思。」
一般學校對家長請假太多會有微言，但老師竟主動安撫，「有次我email請假，學校打嚟話『張小姐，首先你千祈唔好心煩，我哋幫你祈禱先，等你平靜落嚟，唔好擔心，有咩事學校願意幫忙。』我聽完眼水流晒出嚟，我成日請假都唔知講咩好，結果你安慰番我轉頭，呢啲咪愛心學校囉！」
為治病兒 被迫母子分離
由於Hanson患有先天性心臟病，所以領養 Hanson後，張慧儀對兒子的學費及醫療費負擔都非常沉重。多年來 張慧儀為了兒子，拼命工作賺錢，08年跑到廣州打拼，從事過多種產品代理、後來又再親自打電話去許留山甜品店的總公司，幾經遊說下終拿到經營權，在北京、天津、重慶及成都四地引進甜品店、幾年前 張慧儀在廣西經營了一間參茸禮品店、近年又在 深水埗開了一間馬來西亞食品店。
但為了籌過百萬港元醫藥費，給患有心臟病的兒子Hanson做手術，張慧儀 年前更決定與兒子「分離」，到內地拍攝時裝劇。由於Hanson兩歲至今一直與張慧儀 生活，從未分開過，所以是次遠赴內地拍劇令慧儀大感不捨，但她坦言今次的酬勞，足以填補Hanson高昂的醫藥費，所以沒有辦法。看來 Hanson真的成為慧儀生活的原動力。
張慧儀 望男友將養子排第一
現年44歲的慧儀仍是單身，但身邊不乏追求者，其中兩段感情本來到達談婚論嫁的階段，只因慧儀事事以養子為先，雙方在家庭觀念上未能取得平衡，最終慧儀選擇分手。
慧儀的前男友是失婚人士且有子女，是三家公司的董事，絕對養得起張慧儀母子，兩人曾達致談婚論嫁階段，但因為男方始終未能把Hanson放第一位，慧儀寧可犧牲愛情，斬斷情絲，唔想浪費大家時間，她早前接受訪問時謂：「如果對方喺佢家庭、自己嘅仔女，同我呢邊做唔到平衡，咁佢並唔係我要揀嘅人。」
談擇偶條件
幾年前， 張慧儀也因Hanson放棄了另一段與大陸飲食富商的感情，對方難以接受她的養子，導致分手收場。雖然富商絕對能在財政上幫到手，而Hanson隨時需要龐大醫藥費，更有機會隨時離開，但她覺得如果富商男友不重視兒子，寧願獨力支撐家庭。在感情路上跌跌碰碰，今次仍未能開花結果，但她好快收拾心情，並慶幸自己在短時間內認清對方。外形fit爆的她內外兼備，自言條件不錯，目前有不少追求者，但她不急於搵第二春，最重要遇到愛錫她兩母子的Mr. Right！
慧儀肩負起單親媽媽重任，養育了Hanson逾十年，是她拯救了一條小生命嗎？張慧儀卻說不是，而是從前任性妄為的她，在井底遇上有缺陷的小天使，並且令她重生！
