【延禧攻略】清朝妃嬪化妝服飾神還原！于正：這不是咬唇妝

《延禧攻略》妃嬪化妝三大特點

細心睇就會留意到，《延禧攻略》中一眾妃嬪嘅妝容都有三大特點，就係每隻耳上都有三隻耳環、柳葉眉，同疑似「咬唇妝」嘅唇妝。

原來根據滿族嘅習俗，女兒自出生後就要喺每邊耳朵要穿三個耳孔，並戴上三隻耳環，為「一耳三鉗」，即兩隻耳合共有六個耳洞。

出身富貴嘅女子會用金、銀、翠、玉為耳環，或在每個耳環串兩顆珍珠，而窮家女則只會用銅圈替代。

一眾妃嬪清一色嘅幼細柳葉眉，則是清代女性嘅傳統妝容，凸顯出女性嘅優雅美態。

而佢哋嘅唇妝雖然望落好似韓國幾年前流行嘅「咬唇妝」，但清朝時原來係叫「絳唇妝」！

「絳唇妝」喺清朝非常流行，重點係上唇幾乎唔上色，或只塗內側唇色，下唇亦只畫上一半色調，令雙唇睇落更加小巧，似足「櫻桃小嘴」。

而韓國數年前流行嘅「咬唇妝」，則是由中間漸次暈開，上色面積較大。

連劇集嘅金牌監製于正都特別聲明：「這不是咬唇妝，是歷史啊～」並指佢哋嘅妝容都係考究咗清朝宮廷畫師繪畫嘅《玫貴妃春貴人行樂圖》後所定。

不過女主角魏瓔珞 (吳謹言飾) 初出場時唇妝塗滿唇，並非「絳唇妝」，原來係因為佢當時只係入宮做宮女，冇必要化當時嘅流行妝爭寵！

及後升為「令妃」，身份高貴咗，妝容亦有所升級。

另外一般清朝宮廷劇有嘅「大拉翅」髮型，原來係到咗慈禧年代先會出現，所以喺《延禧攻略》中，各妃嬪都只係梳盤髻。

而服裝方面，于正亦考究過歷史資料，並採用咗大量非物質文化遺產，包括絨花、緙絲、點翠等各種傳統工藝面料，都係劇組前往蘇州、揚州等各地採購，使用喺妃嬪嘅服裝同扇面上。

佘詩曼成為皇后後嘅服飾同妝容，更加係神還原！

佘詩曼劇中飾演嫻妃，同富察皇后 (秦嵐飾)、高貴妃 (譚卓飾) 及女主角魏瓔珞 (吳謹言飾) 等在後宮鬥個你死我活，但原來佢哋通通都唔係皇上嘅最愛！

原來乾隆皇帝最寵愛嘅妃子係以歷史上嘅「容妃」為原形嘅順妃 (張嘉倪飾)，在野史上佢被稱為「香妃」，亦即金庸筆下《書劍恩仇錄》中嘅「香香公主」！

容妃和卓氏出身回族，係新疆維吾爾貴族和卓木家，為宮中唯一回族妃子，初入宮約25歲即被封為貴人，三年後奉皇太后旨被封為容嬪，六年後再被封為容妃。

據指容妃身上所散發嘅香氣並非小說所指嘅花香，而是由於香妃自幼飲羊奶，所以身上帶有奶羶味。

容妃深得乾隆寵愛，多次跟隨乾隆南巡，由於容妃信奉「伊斯蘭教」，當其它隨駕妃嬪獲賜食野豬肉時，容妃則獲另賜一盤「狍肉」(鹿肉)。平日佢喺宮中嘅飲食，亦由專門嘅回族廚師烹煮。

容妃一生未有介入后妃之爭，在55歲時病逝，被葬於清東陵，1979年墓穴被發掘，發現容妃疑因宗教信仰，棺木有槨無棺，上書有「以真主名義」等阿拉伯文字，表明墓主信奉伊斯蘭教。

《延禧攻略》以「容妃」為原形所作嘅「順妃」由內地女星張嘉倪飾演，劇中佢先為「順嬪」，後獲封為「順妃」，受家族指使與眾妃相鬥，心腸狠毒。

現實中31歲嘅張嘉倪出身四川，畢業自北京電影學院表演系，07年透過選角贏得由瓊瑤小說改編嘅電視劇《又見一簾幽夢》女主角出道，當時劇中男主角為方中信，女二正是今次飾演皇后嘅秦嵐。

《延禧攻略》進入主題前的劇情，與無綫劇《宮心計》大致相約，女主角魏瓔珞為自己姐姐之死困惑不已，為了尋求真相而決定入宮成為宮女。

其後於宮中靠著自己的勇敢態度和聰明，最終成為乾隆皇帝的皇后。

早前，佘詩曼於劇中的正面照首度曝光，一身淡雅素服被網友指她不似一位妃子，反而更似一位姑姑，而且顯老不少，對她的一身造型頗有不滿。

但另一邊廂，亦有網友認為冇所謂，皆因她一直是以演技取勝，而非造型，未知大家又點睇呢？

關鍵詞