【延禧攻略】兩大侍衛顏值激鬥 小鮮肉定成熟型男？
撰文：東方新地｜圖片：Instagram、微博、電視截圖
《延禧攻略》兩大侍衛顏值激鬥
王冠逸擔演侍衛海蘭察
《延禧攻略》中，除咗傅恒呢位小鮮肉吸睛外，另一位同樣受網民觀迎嘅就係傅恒嘅好兄弟海蘭察！今年30歲嘅王冠逸（Lawrence）擔演侍衛海蘭察，不時就會出現係傅恒身邊，唔好睇佢著上古裝戲服唔起眼，但喺現實生活中網民都稱他為「真．寶藏男孩」！
唔講大家可能冇留意，原來飾演海蘭察的王冠逸係個新加坡人！王冠逸在新加坡同馬來西亞都有一定嘅知名度，其實之前就曾經出演過《泡沫之夏》、《潛龍狙擊》等等。
王冠逸星馬男神代表
Lawrence既係男演員、歌手、模特兒外，同時仲係一位主持人，真係名副其實多向發展！Lawrence於2009年出演新加坡電影《向日葵的約定》而一舉成名，提得一提嘅係，原來佢一直都係星馬地區嘅男神代表！
Lawrence擁有精緻深邃嘅五官，而且身高亦有178cm，難怪睇到唔少女生心心眼啦！
Lawrence不時就會post相上個人社交網，身高定外貌都有嘅Lawrence著上古代侍衛服，抑或係現代機師制服都型到爆，眼球直視過耐都會隨時俾佢電親，難怪可以迷倒萬千女生！
王冠逸下個目標
喺圈中打滾多年，Lawrence原來就喺今年獲邀出席康城影展，當時佢仲喺個人社交網留言：「為一個來自小鎮的男孩來說，能夠與這麼多大牌演員走在一起，確是不錯的經驗…我下個目標就是帶我的作品到康城！」可見其事業心之重！
今年30歲嘅Lawrence平日亦愛操肌之餘，亦愛騷肌，見到佢結實嘅肌肉同起格嘅朱古力，仲唔係同女粉絲大派福利！
除咗騷肌，現實生活中嘅Lawrence仲係一個愛貓之人，喺佢個人社交網耐唔耐都會見到佢嘅愛貓出現！
王冠逸「被女圍」
憑《延》劇成功上位嘅Lawrence，之前生日除獲一班女拍檔包括「令妃娘娘」吳謹言為佢送花慶生，仲晒出一張「被女圍」嘅相，可見其異性緣絕不下於好兄弟「富察傅恒」許凱！
據消息指，Lawrence被飾演皇后嘅秦嵐所創立嘅經紀公司簽下，今年即將有多部作品上映，未來喺中國嘅發展絕對令人非常期待呀！
許凱演《延禧攻略》被封「最帥侍衛」
高顏值小鮮肉許凱喺《延禧攻略》中飾演與女主角魏瓔珞（吳謹言 飾）曖昧嘅富察傅恒，因為呢部劇集擄獲唔少各年齡層女性嘅心，仲人氣急升成為一線小生，被封「最帥侍衛」！
其實許凱唔單止有顏值，演技亦都有返咁上下，充份詮釋到傅恆成熟穩重、足智多謀嘅個性，更被《延禧攻略》嘅製作人于正稱讚係「眼技戲骨」！
于正就話佢眼神憂鬱，特別撩人，大家又覺唔覺呢？
劇中嘅傅性大部分時間都Cool到爆，卻有特別嘅魅力！對其他女人都冷若冰霜，唯獨對女主角魏瓔珞會展開笑容，傅恆深情嘅形象令唔少觀眾都好受落啊！
許凱真係可以話係天生為了古裝而生嘅男人！雖然年輕嘅佢今年先23歲，但天生高大有型，加上一雙濃密劍眉、立體深邃嘅五官，令佢就算著起官服、剃咗光頭都份外有英氣！
許凱被網民大讚擁有星眉劍目，絕招係「側臉殺」！
據聞，許凱仲十分敬業，為咗好好詮釋傅恆呢個角色所以決定提前入劇組讀本，就算要剃光頭都毫不在意！
身高181模特兒出身 時裝都咁型
許凱喺2013年參加中國模特兒大賽，18歲仔就身高181公分，勇奪全國平面組軍，理所當然以模特兒身分出道。
平時許凱鍾意行運動潮流風為主，又鍾意健身！
劇內包到實一實，但原來平時許凱除低戲服係爆肌型男！！！
拍攝古裝仙俠劇《招搖》同女演員白鹿戲假情真
2017年，許凱搭檔女演員白鹿主演古裝仙俠劇《招搖》，點知戲假情真，兩人喺現實生活保持情侶關係，一直交往到依家！
被前女友曝黑歷史
人紅是非多，許凱今年二月被前女友、內地網紅「大金」踢爆疑似家暴事件！雖然被指係炒作，但大金都係企硬！
事情愈滾愈大，令許凱嘅經理人公司要出聲明維護返許凱。
但係討論度愈嚟愈高嘅時候，許凱竟然出文承認自己曾經係「壞男生」！
究竟現實中嘅許凱係咪同劇中嘅深情傅恆判若兩人呢？呢啲嘢就好難講啦！小編都係繼續煲劇算啦～
