【延禧攻略】再演奸角獲激讚 細數佘詩曼10套超經典古裝劇

撰文：東方新地｜圖片：新傳媒圖片庫、劇照及截圖、佘詩曼微博

佘詩曼 相隔13年再演宮廷劇

今次是佘詩曼自2004年拍攝《金枝慾孽》後，相隔13年（《延禧攻略》於2017年拍攝）再次拍攝宮廷劇，因此令一眾劇迷十分期待同興奮！

《延禧攻略》中佘詩曼原本溫婉善良，但因家人被逐一害死，令她由忠變奸，在雨中一幕講到：「欺負我的、虧欠我的，我一個都不會放過。」氣勢盡現！

佘詩曼於劇中最聰明的就是借刀殺人，因望再次得恩寵，而被女主角質疑她殺了人。

當中她說出一句「殺的是誰」，其冷靜的態度及奸詐的眼神，似非而是的回應，不禁令人佩服其演技。

一舉一動、每一個眼神都盡現著強大的攝人氣場！

歷史上嫻妃本是乾隆皇帝登基前的側福晉，後被封為嫻妃及嫻貴妃，由於端莊嫻淑深得皇太后歡心，所以孝賢皇后死後，皇太后勸乾隆改立嫻貴妃為皇后。

但乾隆有感孝賢皇后屍骨未寒，所以只封嫻貴妃為皇貴妃，統領六宮，直至孝賢皇后喪期屆滿，才封其為繼皇后，其後為乾隆先後誕下兩子一女，曾經寵極一時。

但在一次陪皇上南巡後，繼皇后忽然被遣返皇宮，繼而被下令收回手中四份冊寶，即皇后一份、皇貴妃一份、嫻貴妃一份、嫻妃一份，等同被廢，身邊更只准留下兩名宮女。

隨後她在翌年逝世，終年只得49歲，喪禮更被乾隆帝下令僅以皇貴妃制度舉行。

有傳繼皇后忽然被廢，是因在南巡期間精神失常，並犯禁剪下自己頭髮，因皇后只能在皇帝或皇太后駕崩後才能剪髮，繼皇后此舉有如詛咒皇上和皇太后，因而觸怒龍顏。

佘詩曼 10套經典古裝劇重溫

其實除咗《延禧攻略》之外，一向好戲嘅阿佘仲拍過唔少古裝劇，包括《金枝慾孽》、《宮心計》等，都成為劇迷心目中嘅經典之作！

1. 99年《雪山飛狐》

97年奪得港姐季軍後，佘詩曼在99年處女拍劇即擔正做女一，飾演由金庸武俠小說改編嘅《雪山飛狐》女主角苗若蘭，當年嘅青澀樣貌竟同近日佢飾演嘅廿幾歲嫻妃相差不遠。

2. 00年《碧血劍》

拍完《雪山飛狐》，翌年佘詩曼再演金庸名著《碧血劍》，飾演女主角阿九 (長平公主)，與林家棟有感情線。

3. 01年《倚天屠龍記》

吳啟華版嘅《倚天屠龍記》，由佘詩曼飾演周芷若，黎姿演趙敏，原來兩人喺《金枝慾孽》前已演過情敵。

4. 03年《帝女花》

與陳豪、馬浚偉主嘅古裝劇，當年嘅佘詩曼仍有包包面，女二有郭羨妮。

5. 04年《金枝慾孽》

04年《金枝慾孽》可說係佘詩曼嘅代表作，亦成為宮鬥劇中嘅經典，當中佢飾演嘅爾淳為達目的機關算盡，最後卻同侍衛陳豪終成眷屬，happy ending。

6. 06年《覆雨翻雲》

同林峯主演黃易武俠小說改編電視劇《覆雨翻雲》，飾演慈航靜齋嘅秦夢瑤，打扮仙氣十足！

7. 06年《鳳凰四重奏》

《鳳凰四重奏》中佘詩曼一人分飾四角，憑精湛演技首奪最佳女主角獎，升呢視后。

8. 07年《鐵咀銀牙》

飾演牙尖咀利女狀師，與陳小春及謝天華大玩三角戀。

9. 09年《宮心計》

劇中飾演「做好事、說好話、存好心」嘅「劉三好」，至今仍為觀眾所熟識，亦是其代表作之一。

10. 10年《公主嫁到》

《公主嫁到》係佘詩曼喺無綫最後一部古裝劇，劇中佢飾演氣勢凌厲嘅公主，同陳豪繼做一對鬥氣夫妻，大受好評！