女女康堤同「嫩版彭宇晏」拍拖徐濠縈：「同我眼光一樣咁好！」

康堤拍拖徐濠縈開綠燈

Eason同阿徐由拍拖到結婚，一齊經歷咗22年，唔覺唔覺，康堤都14歲喇！大個女，最近仲被周刊影到有個男朋友仔，仲成個「嫩版彭于晏」咁款！

噚日（21/11）阿徐出席公開活動被傳媒包圍，問佢對康堤拍拖有咩睇法。阿徐心情勁靚表示，有好多朋友都有send 報導畀佢睇，佢冇嚇親，因為佢一早就知康堤拍拖，仲話傳媒竟然咁叻收到風，因為個女唔畀Daddy Mummy睇佢打波，連喺邊度比賽，佢哋都唔知。

阿徐亦都話，康堤已經讀中三，呢個年紀拍拖，同有鍾意嘅人都好正常。仲讚個女嘅男朋友仔都幾靚仔，康堤同佢一樣咁有眼光。希望傳媒朋友錫住佢哋，始終對方唔係藝人，學生哥都唔習慣上鏡。

做媽咪嘅亦都有為個女着想，所以成日都提醒康堤要小心，唔好着校服去拍拖，喺公眾場合要檢點啲。

阿徐話已經見過康堤個男友幾次，Eason就未見過，不過睇佢個樣咁開放，都應該唔會有咩意見嘅。Eason早前喺節目上透露過，自己嘅初戀係12歲嗰陣，喺英國讀書嗰陣發生嘅，對方係一個來自直布羅陀嘅少女。

阿徐話最搞笑嘅係，反而係啲朋友話接受唔到，因為喺佢哋眼中，康堤仲係個好似「梁浸浸」咁細個嘅小朋友，但係其實康堤已經係個有唔少心事嘅少女啦！

徐濠縈做全職阿媽

邊個話Eason嫂徐濠縈淨係識遊山玩水花錢買衫㗎？十四年來Eason走南闖北忙搵食，康堤順利入女拔又品學兼優，絕對係媽媽徐濠縈功勞。剛過去暑假最後一個周末，本刊就發現廿四孝媽媽親自帶住囡囡去眼鏡舖配眼鏡準備開學。買完眼鏡，兩母女隨意站在街邊雞啄唔斷，眨吓眼就快14歲的康堤已經高過媽媽，兩母女話題多多，好感情到兩姊妹一樣！

康堤徐濠縈 — 臨開學，徐濠縈親自出動陪囡囡康堤配新眼鏡準備新學年。下月四日就滿14歲，康堤已經高過媽媽。

雖然陳家有女初長成，不過在Eason同阿徐心目中，康堤始終年紀細仲需要悉心照顧，日前Eason接受訪問，表示雖然自己在英國留學長大，不過就未捨得送康堤離家；至於阿徐，對女兒的學業生活到交友，一樣緊張管到實，知情者透露：「康堤愈大，阿徐愈係覺得個女有個簡單正常童年最緊要，所以社交網絡一定唔會晒女正面相，偷拍個女彈琴都係得背影。康堤喺學校真係好受歡迎，唔關佢爸爸係邊個事，因為佢讀書叻、性格好、識彈琴唱歌早已係學校風頭躉、唔少師姐師妹都係佢fans。阿徐好緊張康堤交朋友，尤其呢個年紀好易受同輩影響，想佢作風低調啲又怕佢影響學業，所以近年花多咗時間箝實個女，下個月佢間舖執埋，佢就全副精神放番喺個女度，做全職阿媽。」康堤正值少女期，睇實啲都啱嘅！