年掃過億磚頭王祖藍為阿媽買發跡公屋

Dec 20 2017

近年在內地爆紅的王祖藍，越搵越有，去年更開埋「手工藝創作有限公司」，拓展做埋生意人；撈到風生水起，祖藍亦唔會只顧自己，除咗係「愛妻號」，更加侍母至孝，年掃過億磚頭的他，除了買樓送畀老婆，去年更一掟3700萬買入逸瓏灣一個連花園特色戶送畀阿媽，讓媽媽享清福。王祖藍更非常細心，知道媽媽掛住一班恆安邨舊街坊，還買下昔日全家人同住的發跡公屋，方便媽媽同街坊敘舊都有落腳地，王祖藍絕對係超級孝順仔！

撰文：東方新地

圖片來源：新傳媒圖片庫、王祖藍微博

王祖藍想家人住埋一齊

即使內地工作不停飛撲埋身，賺錢能力高企，但為陪老婆李亞男，王祖藍決定減產留港，已經推掉多個內地真人騷，完成《奔跑吧！兄弟》第二季，就暫停接要長時間留內地的工作，放假同亞男旅行努力造人。據知情者透露：「祖藍明白錢係搵唔晒，最重要係家人健康同開心，佢唔想因為搵錢，成日留低亞男一個人喺香港，寧願賺少啲都要放假！」自從爆出李亞男患上抑鬱，王祖藍唔敢掉以輕心，決定為老婆減產留港；日前就同老婆及阮兆祥到九龍城打邊爐，雖然搵埋唔少，但祖藍卻非常有衣食，食淨嘢打包攞走唔會浪費！

念舊的王祖藍，當日約咗幾位無綫舊夥伴，同阮兆祥一齊打邊爐，上車前，仲同友人傾到唔捨得走。

為阿媽買發跡公屋

唔只係「愛妻號」，王祖藍對家人亦同樣照顧周到，更加侍母至孝，上年就以3700萬買入自己寓所同屋苑連花園特色戶畀阿媽住。據知情者透露：「因為爸爸一早過咗身，祖藍成日話媽媽好辛苦湊大佢哋，佢真係好錫媽媽，雖然結婚之後，都想有自己私人空間，但亦希望一家人可以住埋一齊，所以佢就喺自己住嘅逸瓏灣屋苑，買多個連花園有三千幾呎嘅特色單位送畀媽媽，又買多層樓畀細妹住，等大家方便照應。」

方便阿媽探街坊

屋村仔出身的王祖藍，細個全家住在沙田恆安村，發跡後亦非常念舊，知道媽媽唔捨得一班舊街坊，祖藍就買下發跡公屋畀阿媽。據知情者透露：「祖藍媽同恆安邨一班舊街坊感情好好，一得閒就會返去同佢哋飲茶吹水，祖藍咪買埋間公屋，等阿媽幾時返去住吓都得，探完街坊亦可以有地方休息吓！」