【山竹襲港】超蓮組義工團到杏花邨清理垃圾 JW：發泡膠多如雪山！
幸好有唔少熱心嘅市民自發性主動幫手清理垃圾，何超蓮、歌手JW、盧巧音(Candy)同老公蘇浩才(Sammy)都有份幫手，好有愛呀！
撰文：東方新地 │ 圖片：無綫電視截圖、新傳媒圖片、盧巧音IG、何超蓮IG、JW IG
山竹襲港藝人自發清理垃圾
盧巧音(Candy)同老公蘇浩才自發性到沙灘清理垃圾，佢哋呼籲大家都出一分力：「面對這麼多的垃圾，我們真的手足無措，盡量吧盡力吧！#山竹善後 」唔少網民都讚二人無私的表現。
另外賭王何鴻燊三房千金何超蓮嘅慈善團體就喺網上召集義工，分別到杏花邨、將軍澳及沙田區清潔道路垃圾！
身為好友嘅JW王灝兒有響應呼籲，佢喺社交平台留言話：「我頭先係完全相信唔到眼前有咁多發泡膠！！ 係好似雪山咁多！！！！！ 執極都好似仲有！！好開心一班義工一齊幫手！好多住喺杏花邨嘅居民都一齊落嚟執垃圾！This is what we should do! Complain less, do more!❤️do it by ourselves! Do what we can!❣️AND STOP USING 發泡膠！！！！ 」
歌手陳美詩（Macy）話山竹影響，令天台幾乎水浸，變成大泳池，幸好玻璃窗穩固頂得住，佢留言：「我家天台整天都是大游泳池。#附送瀑布和天然浪 #感恩玻璃還頂得住 #但願所有人和動物都平安 #山竹快快消失」
超強颱風山竹襲港，全港各區受到嚴重破壞，市民為安全都留在家中，不過部分行業都要在十號波下緊守崗位，好似消防員、救護員、警察、保安員、新聞從業員等。
而唔少網民喺打風日子都會諗起無綫新聞主播潘蔚林，09年颱風「莫拉菲」襲港，主播潘蔚林喺尖沙咀天星碼頭直播市面情況時，因為被強風吹到企唔穩，佢紮行馬45度傾斜絕技，如Michael Jackson上身，此幕成為經典，他被網友封為「MJ潘」、「颱風之子」！
事隔9年「颱風之子」潘蔚林在山竹襲港下重返尖沙咀天星碼頭做直播，由朝做到晚，雖然冇當年咁狼狽，但同樣被風吹雨打！
但那邊廂，昨日「駐守」杏花邨做直播嘅主播張家灝，喺海旁描述現場情況時受盡狂風暴雨吹襲！
話口未完一個大浪冚埋嚟，張家灝企唔穩差啲跌低，大家都戥佢膽戰心驚！
好彩佢未有跌低，企穩後繼續頂硬上完成報道，網民一致激讚佢專業，真係要向佢哋致敬，仲有網民話潘蔚林有接班人，封佢係「颱風之子」！
山竹襲港 森美雪櫃被吹冧
超強颱風山竹襲港，即使在家也遭受強風破壞，一班藝人都分享颱風期間嘅情況。好似森美都受「山竹」影響，原定晚上接咗婚禮司儀騷嘅佢當然唔敢出街，佢話同主人家講咗除非安全情況下，否則唔會去，咁又真係冇辦法，命仔要緊！最慘仲係佢屋企外嘅走廊玻璃都爆咗，而放在露台的小雪櫃也被吹跌，幸未有撞爆露台玻璃，算不幸中之大幸！
森美趁風勢稍弱時，急急將雪櫃移回室內，佢話會喺電台節目再作分享，仲叮囑大家要小心！
佢又分享掛十號波期間，窗外嘅情況，淨係聽到好勁嘅風聲同雨聲！
「城嫂」方媛 影冧樹
而「城嫂」方媛（Moka）寫咗條微博，留言話：「希望山竹快點離去，大家一切小心，平安！」Moka條微博張附圖中見到，窗外幾棵樹都已經吹到斷枝，風勢真係好大。
蔡卓妍 唔夠膠紙用
蔡卓妍（阿Sa）在社交網貼屋企露台「災情」短片，見落地玻璃窗貼咗「X」型膠紙頂強風，放喺露台嘅盆栽幾乎吹冧晒，客廳地下攝晒毛巾防浸水。阿Sa留言：「好大風呀媽咪！隻窗不停Bom bom聲，窗縫不停foo foo聲，令我諗起『咆哮山莊』，大家記得留喺室內呀！安全安全！山竹快啲走
，真係勁過天鴿，上次啲植物都冇事，唔係唔想痴（黐）多兩條膠紙，冇時間去買，全屋膠紙用晒，10號風球！」吳日言留言：「張膠紙好似弱咗啲！」洪卓立就叫阿Sa：「用保鮮紙呀！」
李治廷玻璃窗框吹爛
李治廷留言話：「感覺山竹正在離開香港，但威力還是好強。玻璃門的門檻已經被吹破了。不撐着感覺隨時會塌陷…..大家一定要注意安全，做好安全措施！我怎麼感覺這畫面似曾相識！」
龔嘉欣屋企水浸好鄰居守望相助
而龔嘉欣都有在社交網留言：「屋企失守啦！向東南，完全食正風，由10點到而家5個幾鐘，終於暫時止住水浸，一起身見到客廳全部都係水，真係徬徨到一個點！」
好在嘉欣有好鄰居守望相助：「好彩隔離屋即刻過嚟幫手，如果唔係，我都唔敢想像！好鄰居係好重要，佢地平時已經成日煲湯買生果畀我食，今次仲喺危急嘅情況救我，感動同感恩，慶幸我有咁好咁錫我嘅鄰居朋友，大家放心我冇事，有事我都會即刻call我啲鄰居。」
蝦頭 花園反枱
蝦頭楊詩敏屋企出面有個花園，話放咗張好重嘅枱都畀強風吹起，成張撞埋牆塊玻璃枱面碎晒，好彩人就冇事，佢留言話：「山竹你真係猛料！祈求仍在前線工作的朋友一切小心！」
陳茵媺 豪宅勁搖
同老公陳豪住喺南灣豪宅嘅陳茵媺（Aimee）喺ig貼出屋企內搖緊嘅吊燈，寫住「Our chandelier and building is swaying… Getting dizzy. Stay safe everyone!!!」（我們的樓宇跟吊燈一直在搖晃，有點暈，大家要注意安全。）影片中佢屋企盞吊燈係咁搖，似乎Aimee屋企都真係搖得幾犀利。
隔咗一個鐘後，Aimee又再出post，佢影住浴缸內同樣「搖」住嘅水，表示個颱風好勁，感覺到屋企搖晃，而佢仲問大家係咪應該俾小朋友喺呢缸搖住嘅水度沖涼：「The wind is so strong our building is swaying… Look at that supposedly still water. Should I still give kids a bath in swaying water?」(風真的超強，我們家還在搖晃，看看那本來應該靜止的水，我應該在這水中幫孩子洗澡嗎？)。
梁麗翹 屋企搖到頭暈
前東張主持梁麗翹喺社交網發咗條片，影住屋企天花板盞燈喺度不斷左搖右擺，佢留言話：「全屋人搖到暈浪，Nanette（梁麗翹囡囡）被搖到乜都嘔晒出嚟。。。」佢仲話BB女已經嘔咗三次，佢自己都好暈浪！
李珊珊 搖到想嘔
李珊珊都喺社交網甫咗條片，一樣係見到屋企盞燈不停搖晃：「搖呀搖～ 搖到外婆橋～～ 坐車不會暈車浪的我，也作嘔！」據知佢家住鴨脷洲一豪宅向海高層單位，食正強風！
熊黛林 吊燈搖到暈
熊黛林（Lynn）都有分享家中「戰況」，見風勢強到連佢屋企嘅吊燈都係咁搖，佢就搞笑咁話啲吊燈搞到佢好暈，佢表示：「好暈吖！以後有了一個新名詞叫『暈颱風』！」
