屋邨仔脫貧 坤哥秘搬風水屋
廣告
曾經一度被無綫安排在台慶扮棋嘅吳業坤( 坤哥 )，上年初以爆冷姿態橫掃各大頒獎禮，更奪得《叱咤樂壇流行榜頒獎典禮》「我最喜愛男歌手」獎，成功彈起。毒男殺出血路勵志形象吸引廣告商垂青，代言廣告湧至，一年間勁吸幾百萬。近日，脫貧坤哥買車之餘，更由公屋秘搬到私人屋苑風水屋，真箇是兒子生性，母倍感安慰！
升呢做車主
昔日坤哥多以巴士或港鐵代步，非常慳家，參加過《超級巨聲2》出名後，被途人影咗唔少地鐵相。不過佢去年憑〈原來她不夠愛我〉等大熱K歌橫掃各大頒獎禮，人氣急升，工作接不停。所以漸漸開始改搭的士，今年再進一步，升呢做車主！
公屋搬風水屋
坤哥本與家人同住樂富橫頭磡邨公屋多年，最近租住新居大圍恆豐花園，20年樓齡，單位採三房兩廳間隔，800多呎，另有工人房及士多房，仲有埋會所，月租兩萬算好抵住。曾有人目睹坤哥母親及胞妹在上址出入，估計孝順坤哥遷居後繼續與家人同住。居所背靠山巒，居住密度不算高，環境清幽，啱晒坤哥宅喺屋企寫歌！
墳景旺星途
恆峰花園背山面向城門河，不過大部分單位望到墳景，令不少人敬而遠之！但根據玄學家吳佩孚師傅指，其實墳景對藝人星途有幫助！由於娛樂圈屬偏門行業，墳景雖然會加重陰氣，不過陰氣即係財氣，帶來財運的同時，更可幫助吸納女性粉絲，相信新居將更有助坤哥吸金！
