50歲宣萱被Bobby笑微波身材 玲瓏出巡銅鑼灣大平反
廣告
已經入行廿八年的宣萱，不但人氣keep住旺，更駐顏有術完全唔識老，靚足五十年令唔少人羨慕！不過早前宣萱與好友歐陽震華（Bobby）一同上節目《諸朋好友》， 卻自爆多年前已被Bobby封 她Microwave，取笑她身材似男人，就算Bobby只係講笑，愈Keep愈fit的她，擺明要為自己公開平反；無聲勝有聲，日前宣萱單飛出巡到家品店掃貨，雖然口罩Cap帽眼鏡密封凍齡靚樣，但簡單一件Tee已玲瓏身材現形，睇嚟Bobby真係同宣萱太熟，完全唔敢正視女方身材，先會唔知好友咁有料！
撰文、圖片：東方新地
宣萱被幕後諷刺又肥又老
要數圈中凍齡魔女， 50歲宣萱肯定當之無愧，99年已經憑《刑事偵緝檔案IV 》封視后的她，17年重返無綫拍《不懂撒嬌的女人》事業再起飛，演技超班個樣亦keep住超班！但原來經常被讚凍齡保養得宜的她，亦曾經試過失手暴肥。16年同意大利型男男友分手，無心戀戰的宣萱亦遇上中年危機，一度暴肥二十磅，但人生最低處總有出路，正如宣萱所言：「人生沒有絕路，這條路不通，就行第二條路。」據知情者透露：「入行冇耐已經走紅，其實宣萱搵落唔少，手上已經有兩層樓揸手，根本冇生活壓力，幾年前佢離開TVB，自己做埋自己經理人，就係想自己可以控制工作，做自己鍾意嘅嘢！嗰時失戀放肆飲食，突然間肥咗二十磅，本來佢都唔太在意，點知有次佢想再返無綫拍劇，就畀個幕後諷刺佢，話佢又肥又老應該退休，就係呢句說話令佢發憤圖強，努力減肥重新出發，事實證明佢係得嘅！」
保持最佳狀態
現時宣萱每接新工作，開工前都會跟營養餐進食，又會做gym、跑步及行山keep fit，保持最佳狀態演出，努力加實力為自己爭贏一口氣，三年前宣萱簽約古天樂旗下，工作做到冇停手，去年拍完電影《尋秦記》、《 G風暴》，計埋近日無綫播出劇集《陀槍師姐2021 》，影視同樣當旺，相信宣萱最大遺憾，是以往多段感情都未能開花結果，16年同意國男友分手至今感情仍冇著落，不過性格女神卻有她一套自在的單身理論：「兩個人一齊一定要夾和舒服，如果唔係，單身反而更自在！」早前宣萱一個人到銅鑼灣平民家品店掃貨，一早有備而來的她，先去揀儲物膠箱及防水被套，之後再轉去擺放盆栽區域揀花盆，為家居添置家品親力親為，就連助手、外傭亦未有同行，50歲宣萱完美演繹女人當自強，單身一樣精彩！
