官恩娜晒8個月大囡囡精靈可愛相 網民勁讚：愈大愈靚女！
撰文：東方新地｜圖片：Instagram
官恩娜晒8個月大囡囡精靈可愛相
39歲官恩娜婚後專心做靚靚人妻，停工兼只湊一對寶貝仔女，囝囝Gabriel話咁快已經兩歲，而囡囡Aurelie前日亦已經8個月大啦！不過，有鑑於日前颱風山竹襲港，Ella喺個人社交網留言大爆自己嚇到抱着囡囡匿喺走廊！
Ella上載出兩張囡囡8個月大嘅相，以囡囡口脗留言指：「「噚日真係好驚險！個風吹到間屋搖下搖下，啲窗嘭嘭聲！嚇到媽媽攬實我呢（匿）埋喺走廊唔敢入房唔敢出廳！好彩最後都冇爆玻璃！希望大家都平安！因為太驚媽媽都冇幫我影8個月大嘅相，今日幫我影返。我尋（噚）日8個月啦！」
另一張相見到Aurelie已經識企定定喺BB床上俾媽咪任影相！而且，睇到擘大個口笑嘅Aurelie依然相當有肉地，手仔腳仔好多肉，肥嘟嘟咁，勁可愛！
另外，Ella仲上載咗呀囡午餐嘅相上限時動態，見到有栗米、燈籠椒、紅蘿蔔三款食物，認真健康！
萌爆起勢刨栗米
Ella梗係唔少得上載埋囡囡食午餐嘅片同大家分享啦！見到Aurelie眼仔睩睩好精靈咁兩隻手拎住栗米起勢咁食，睇落真係愈大愈靚女呀！
雖然Aurelie已經有8個月大，但見Aurelie好似愈食愈落力咁咬條栗米，唔知係咪啲牙仔未出得哂，所以食落有啲困難呢？
之後，Ella更留言指原先自己以為個女會好似呀哥咁鍾意食燈籠椒，不過最後先發現囡囡原來咩都啱食，皆因三款食物都俾佢食過！其實咁都係件好事嚟嘅，證明咗Ella囡囡細細個就已經唔會揀飲擇食！叻女！
官恩娜為愛女做廚娘
官恩娜（Ella）今年一月誕下囡囡Aurélie，話咁快就4個月大，近日Ella就親自為Aurélie下廚煮粥，Ella仲開心分享多張呀囡近照。相中見到Aurélie戴上桃紅色蝴蝶結頭箍，仲識用手拎住個碗食粥仔，相當叻叻！
唔少網友見到Ella囡囡都表示Aurélie愈嚟愈似媽咪，唔知大家點睇呢？
雖然Aurélie得4個月大，但佢好似非常有捕捉鏡頭的觸覺，不時望鏡影相，果然遺傳到媽咪的藝人DNA！
不過，唔知Aurélie係咪太鐘意食媽咪親手煲的粥，就連匙都唔想放過，認真可愛！
見到愛囡食得咁開心又咁知味，Ella則留言表示：「十倍粥，人生第一口食物 。」
囡囡食完即病
點知，其後Ella於個人社交網表示呀囡病咗，仲話係因為食咗佢煮嘅粥，希望Aurélie快啲冇事啦！
官恩娜細女三個月大 大晒可愛造型照
時間過得好快，噚日BéBé A已經三個月大喇！Ella就喺ig度貼咗 BéBé A 嘅靚相，留言話：「I’m 3 months old today! 」，見到眼大大嘅BéBé A穿上粉紅色衫仔加埋頭頂蝴蝶結，真係好可愛！有網民就留言大讚囡囡超可愛又靚女，似足靚媽咪。
Ella臨生細女前，同老公、大仔影咗一輯全家福，唔知幾時同細女一齊影張一家四口全家福呢？！
囡囡出世BéBé A滿月時，Ella晒咗幾張相，有紅雞蛋砌成嘅心形，好有愛呀！
官恩娜晒囡囡沙龍照
官恩娜在女兒19日大時，都影咗一輯造型照，BéBé A閉著眼微微笑，配上托頭Pose同夢幻嘅背景，可愛又療癒。Ella還以BéBé A的口吻留言：「Hello everyone！I’m 19 days old today！」。
係立春之際，Ella不忘祝福大家新一年健健康康、快快樂樂。
結婚三週年PO舊照放閃
Ella在結婚三週年時，上傳同老公舊時合照，並留言感謝老公。佢話：「All these years you have been amazing. As a dad to our kids and as my lover my best friend, I have been happy in your arms and I could see that we’ll be happier for the rest of our days. Thank you for everything! No one else in the world would understand me the way you do! Je t’aime pour toujours! Happy 3rd anniversary BéBé D!」
BéBé G餵妹妹飲奶
囝囝BéBé G人仔細細就學識喂妹妹飲奶，抱BB個姿勢都幾穩陣。
官恩娜 半夜泵完奶倒瀉晒
日前，Ella在社交網站分享了佢餵人奶的慘狀。片中可以看見，Ella呢段心酸經歷，佢話：「半夜泵完奶諗住畀個女食，點知入口之前全部倒瀉晒……終於知道咩叫做欲哭無淚……」「喊都冇用，只好埋身再餵，阿女終於瞓咗，等我食啲榴槤，陣間再努力過！」
儘管Ella倒瀉奶之後感到欲哭無淚，不過見囡囡吃飽飽樣子咁可愛都忍唔住幫佢影翻張相。
