【嫁到這世界邊端2】癡情韓國Oppa娶重病港女上演「韓式生死戀」

好多人睇韓劇時同小編一樣，都經常取笑情節老套，通常啲女主角唔係失憶就係患絕症，之後就突顯出男主角幾咁癡情乜乜乜。但估唔到呢啲老套劇情原來現實中真係會發生 — 就係《嫁到這世界邊端2》第一集的主角秋仔。

平凡港女秋仔早年讀完書後，加入電視台成為導演，誰知七年前佢發現自己患有急性腎衰竭，最嚴重試過一年入三次ICU，長期都要靠儀器及藥身維生，徘徊在生死之間。治療期間，秋仔偶爾喺一個討論韓劇的網站，認識了識普通話的韓國Oppa暢勇，一段動人故事就此展開！

兩個人傾吓傾吓，暢勇更主動來港與秋仔見面，秋仔都feel到對方有更進一步的意思！所以即使秋仔再唔舒服，都堅持外出同暢勇喺香港遊玩一日。兩人經過呢一日後感情大增，對秋仔病情一無所知的暢勇回韓國後即主動表白！「可唔可以做我女朋友？」

呢個時候秋仔亦向暢勇坦白道出病情，表示自己身患重病，隨時有機會離開。喺秋仔坦白後，暢勇突然失去聯絡一段時間，但佢並唔係被嚇怕走佬，而係花時間四出搵資料，嘗試對秋仔的病情了解更多……

暢勇並沒有輕易呢段感情，更主動提出讓秋仔去韓國醫病，甚至係求婚！聽到呢度，主持陳貝兒都不禁話，究竟要有幾情深，先會令人男人接受一個可能隨時喪命的女子，甚至唔介意時日長短去求婚？

雖然秋仔未有答應求婚，但都下定決心接受手術，雖然手術風險相當高，失敗的話係隨時會冇命…… 手術前暢勇對秋仔講：「手術好返之後，我哋就結婚啦。」秋仔亦隨即答應！

經歷一場大手術後，秋仔與暢勇決定搵埋天窗，但此時又遇到另一大難題，就係暢勇的父母反對二人婚事！其實又難怪人哋咁諗，因為秋仔的身體始終存在很多變數，將來又可能較難生兒育女。不過暢勇始終如一，不斷努力說服父母答應，表明係非卿不娶！

暢勇的父母最終答應二人的婚事，當時奶奶發短訊問秋仔想要咩結婚禮物，秋仔回覆「其實唔使送禮物俾我啦，你答應俾我哋結婚，已經係一個最大嘅禮物。」重溫呢段往事時，奶奶已經喊到收唔到聲！

暢勇始終認為100歲係一個最好的夢想，去到節目末段，佢再次提出兩人已經約好了，就算去到100歲都要一齊住、100歲都仲要一齊去旅行！

關鍵詞

【嫁到這世界邊端2】癡情韓國Oppa娶重病港女 上演「韓式生死戀」