53歲姜皓文捱足33年苦盡甘來坎坷身世兼曾欠債財困！

姜皓文被激讚勁好戲

近年幾乎套套港產片皆有姜皓文其影，而最近播出的新劇《鐵探》他亦有份擔演，首次為TVB拍劇的黑仔於劇中演技大爆發，尤以於監獄中Bingo（姜皓文飾）與患有腦退化症的嫻姐（盧宛茵飾）相認一幕最為深刻，亦感動不少觀眾！

由電視圈跳到去電影圈，再由電影圈首拍TVB電視劇，多年於演藝圈的浸淫，實力當然無可置疑，難怪黑仔都被網民大讚該幕對手戲非常好戲，令人催淚！而且，有網民指黑仔的內心戲、感情戲比同劇演員，甚至同樣飾演過警隊臥底的謝天華（《潛行狙擊》的Laughing哥）更動人！

面對網民讚賞，黑仔謙虛澄清《鐵探》的Bingo與《潛行狙擊》的Laughing哥是兩個不同的卧底角色，並解釋獄中相認一幕之所以如此入戲，原來是想起過往與婆婆相處的畫面，皆因其婆婆都同樣患有腦退化症，曾試過食飯途中突然不認得黑仔。

因身同感受而更容易投入劇情，黑仔於訪問中更坦言自己睇劇本時已經不禁眼濕濕！事實上，黑仔的童年及青少年時期亦並不過得如意，他一出世後不久爸爸便拋棄家庭，只好與媽媽及弟妹過活。後來，媽媽患病，無可奈何之下惟有把弟妹都送到兒童院，減輕負擔。

14歲時，媽媽過身，黑仔被送到由香港學生輔助會營運、位於觀塘的少年宿舍，自始自己照顧自己。雖然如此，黑仔仍正面面對生活，初中時他與宿友到酒樓賣點心、做裝修、表演雜技，靠自己賺錢維持生計。

其後，因當時的女朋友於特約演員公司工作，因緣際會下成為人人口中的「茄喱啡」，更膽粗粗下參加亞視第一屆香港電視先生選舉，奪得亞軍兼誤打誤撞加入亞視，正式入行！

不過當時未有人氣的黑仔曾被認錯是莫少聰，而且出鏡機會極少，打開銀包只有幾元，可說是窮到燶。試過被包租婆追屋租，鎖門，被稅局追交稅等。財困情況下，黑仔最後用所剩的錢買六合彩，博中獎有錢交租，最後沒有中獎的他幸好有朋友願意借錢，才令他捱過那段黑暗日子！

人生浮沉，黑仔反自嘲自己只得沉，幸好最終他亦捱到出頭天，片約不斷，而近年黑仔最爆嘅角色相信是電影《翠絲》中演變性人，黑仔透露：「拍《翠絲》嗰陣情緒好波動！個個都成日催我睇醫生，係難抽離！」

反觀《鐵探》，黑仔拍同惠英紅(紅姐)拍劇都好有壓力，「話晒影后，好彩紅姐好人啫，紅姐真係好到不得了，佢真係超級偉大，拍之前佢會幫你暖場，等你對住佢唔會好大壓力，我依家發覺原來惠英紅係一個小妹妹嚟，佢真係少女到不得了，同我講吓食嘢、買嘢、減肥，好開心嘅!」

雖然人生經歷不少低潮，但如今回頭一看，也許一切皆是上天給姜皓文的考驗。人生崎嶇不平，亦正因如此，一切的經歷更有助他代入角色演戲！值得一提的，是今個星期日的金像獎中，姜皓文憑《翠絲》有份角逐最佳男主角，希望他今年能再下一城勇獲影帝！

關鍵詞