姜皓文同老婆殷寧甘苦與共 恩愛18年
廣告
「黑仔」姜皓文與亞姐出身的老婆殷寧識於亞視年代，殷寧早年已淡出幕前做黑仔背後的女人，二人曾共患難，現在則共富貴⋯⋯
撰文：東方新地｜圖片：新傳媒圖片庫、姜皓文IG
姜皓文檳城送樓
姜皓文與殷寧(原名金慧英)結婚18年，人前人後表現恩愛，去年結婚周年紀念日，黑仔更送上檳城一層樓給殷寧，揚言要與摰愛「牽手相伴甘苦與共」。黑仔對於老婆多年來的遷就更是感恩，雖然時有嘈交，不過二人很珍惜這段關係。
拍拖行名店
黑仔笑言同老婆結婚十八年嚟成日嗌交：「初初結婚唔識得點去珍惜，唔識點去處理婚姻生活，兩個人生活，唔係咁簡單，唔係話住埋一齊，你就我、我就你，真係有種節奏喺度，大家要配合得好好。我覺得最忌一樣嘢，兩口子點樣發脾氣、點樣惡都好，唔好講啲真係太傷人嘅說話，一次就你、兩次就你，三次就真係唔得㗎嘞，唔可以郁啲話離婚、分開，千祈點嬲都要忍住唔可以講，除非你唔想段婚姻長久落去啦！老土啲講句人氹人係OK嘅，個節奏咪大家盡量去配合囉！」
考慮搬去檳城
問黑仔去年豪花七位數字喺檳城買樓送畀太太，係計劃將來喺當地定居？佢話：「我有諗過搬去檳城，因為有次去檳城旅行，我同太太都好鍾意，咁啱朋友介紹，睇到個樓盤，唔係即刻買，我都計好多數，跑到氣咳，大家都鍾意，咪當係大家嘅一份禮物，第日旅行住又好，過三、五、七年我想放慢工作又好，甚至乎我繼續做嘢都可以喺馬來西亞住㗎嘛，咁近三個鐘頭機。」
愛玩煮飯仔
問佢閒時同太太做咩多？黑仔回答：「我有我，佢有佢，哈！佢鍾意啲花花草草，好鍾意魂遊太虛諗啲佢自己世界裡面嘅嘢，但係每年我哋都會一齊放假去旅行，因為我哋生日同結婚周年連住幾日，平時就一齊煮吓飯，依家我唔鍾意出街，飲酒又唔揸得車，我依家都少飲，因為我好控制唔到自己，我會追酒飲，飲完亂晒籠，又斷片，好恐怖㗎，試過同朋友返內地飲酒，飲到唔見咗我，我去咗第度唔知同邊個飲，瞓醒褲袋一大疊咭片，所以好危險。」
