姜濤上陳志雲節目尷尬認處男 呻維園運動相太樣衰
文：東方新地｜圖：訪問片段截圖、陳志雲FB圖片、姜濤IG圖片及新傳媒圖片庫
姜濤：你重過我
在姜濤現身接受訪問前，陳志雲先亮出姜濤經常被翻炒的肥仔相，原來這張相是在姜濤12、13歲時所拍，他透露在學校做健康檢查時磅過，當時的他大約有二百幾磅，陳志雲隨即指出自己最高峰時有220磅，姜濤立即鬆一口氣話：「咁你重過我！我最高峰時係差唔多205磅。」
之後姜濤透露自己出世時約7、8磅，都係重B，陳志雲又說：「我出世時都重過你，係11磅三個骨，如果你去打保齡球，你可以拎住一個12磅嘅波，想像一下我喺我媽咪個肚入面同個保齡球一樣。」令姜濤嘩出聲，搞笑說：「辛苦晒你媽咪！」
退休後才會醫腳
訪問中陳志雲代粉絲關心姜濤的腳傷，姜濤先解釋他的腳傷是在入行之前打籃球時，在一次比賽中躂傷了十字靭帶，但現在尚未有時間去醫治，他笑言計劃退休後才去治療。
陳志雲問佢唔去醫腳傷，咁跳舞時點算？姜濤話：「照跳囉！睇唔出嘅。醫生梗係話做咗手術會好啲，但我希望遲啲先，因為做完手術後要有差不多半年嘅康復期，會唔係好行到路，所以我唔希望嘥咗嗰段時間。」
曾為慳車錢諗過退出《造星》
被問到當初點解會去參加ViuTV選秀節目《全民造星》？姜濤答：「因為唔使錢！當時純粹係想儲啲經驗，所以見有啲咩唔使錢嘅比賽我都會去參加，當時都只係我第二次參加比賽，所以冇諗過會贏。」
姜濤又提到在內地電視台舉辦的《快樂男聲》才是他第一個參加的選秀節目，參加的原因是因為舉辦方願意「包食包住」，又搞笑指《全民造星》雖然包食（有飯盒），但車費要自掏腰包，他大呻：「啲車費好貴，所以初期我諗過不如算啦！因為當時ViuTV個錄影廠喺調景嶺，雖然我當時返學都喺附近，但都要搭的士去，車費好貴，變咗持久戰。」
不過姜濤話《全民造星》的一百萬獎金好快已收到，陳志雲問佢有冇分畀花姐？姜濤話唔使，因為花姐好有錢，姜濤又搞笑話平日坐花姐順風車時會同佢吹水傾偈，純粹是為了搵個藉口坐佢車，唔使Call Uber，可以慳番筆。
姜濤又笑指自己在入行後都經常會想唔撈：「但冇辦法啦，有個約綁住。」陳志雲話個約冇人迫佢簽，姜濤話：「係呀，所以依家都諗通咗，知道係自己以前後生時唔識諗，太任性。」他又透露自己願望是在港島區買到層實用三、四百呎嘅樓收租，咁就可以提早退休。
第七胎係跳唱歌
姜濤被問到幾時出第七胎（第七隻新歌），他透露如無意外會在二月尾或三月頭，將會是一首跳唱歌，他說：「不過呢首歌可能同大家想像嘅跳唱歌有少少唔同，因為主題比較有深度，所以不會有太熱鬧嘅舞蹈，但都係一首節奏好快嘅歌，係我以往無試過嘅曲風。」
當被問到花姐的優點時，姜濤回答話花姐成日肯車埋佢，而且冇收番隧道費，已經係一個優點：「原先冇咁熟時，我有客氣吓問過佢，話畀番隧道費佢，但佢冇收。」他又大讚花姐有義氣，經常無私幫助好多人，例如肯免費車佢返屋企。
問到覺得花姐有咩地方要改善，姜濤在陳志雲一再追問下才說：「脾氣呢啲嘢好難改，但講嘢有時可以細聲啲，喺外人面前可以畀吓面我，其實都係啲表演、工作嘅嘢，但有時做得唔好，會好大壓力，但呢啲都正常，因為有時愈大聲話你，你先會愈記得住。」
中一為女減肥
姜濤談到幻想中的戀愛感覺，他說是會願意為對方捨棄一些精力、時間，他又憶述自己在中一時曾鍾意過一個女仔，甚至因此為對方減肥，犧牲了自己喜歡吃的食物，那時都覺得是值得的。
姜濤又大呻自己當時好想拍拖，不過無人要：「當時我好直接咁同個女仔講有啲鍾意佢，但佢話佢係外貌協會，自己返上網check先知咩意思，即係佢鍾意靚仔。」但依家兩人已無聯絡，他解釋是因為他以前好曳，被人踢了出校，改為去讀了中專文憑，之後又轉了去讀IVE。
再認係處男
陳志雲提到姜濤當初參加《造星》時，曾被問到是否處男，姜濤坦言當時覺得尷尬是因為怕被人笑，又直言現年21歲的自己仍然是處男，陳志雲即提醒他下次再有人問他時，不需要直接作答，只需婉轉說：「私人嘅嘢可唔可以選擇唔答呀？」令姜濤尷尬傻笑。
姜濤話自己理想對象要長頭髮、瘦瘦哋，年紀則不是問題，又指拍拖未必會話畀粉絲聽，拍影響公司及另一半：「雖然公司冇特別阻止，但就叫我生性，會問我拍拖重要啲定做嘢重要啲，潛在意識即係叫我唔好拍。」
呻維園運動相太樣衰
姜濤又大呻希望傳媒唔好再影他在維園做運動的相：「因為我覺得太樣衰啦！要影嘅話都最好影我做完運動嘅相，唔好影我做緊時嘅相，因為實在太樣衰！」
最後姜濤向粉絲拜年說：「我都唔係識好多成語，希望新嘅一年祝大家身體健康，雖然好老土，但我親身經歷，覺得身體健康係一件非常重要嘅事情，身體係革命嘅本錢，所以希望大家身體健康，同埋實際啲，恭喜發財！」
