入行超過60年 《逆緣》演活廢老｜70歲姜大衛 逆齡半世紀
71年24歲一臉稚氣
77年30歲浪蕩不羈
30歲嘅John哥，一身白色綁帶開胸衫，為佢平添一份瀟洒又浪蕩不羈感覺。
70年《報仇》封亞太影帝
電影《報仇》中John哥ending直搗黃龍一個殺幾十個，最後手刃殺兄（狄龍）仇人後，一身白色中山裝染滿鮮血死去，痛快悲壯嘅演出為佢贏得第16屆《亞洲影展》（後改名亞太影展）「最佳男主角」，成香港首位亞洲影帝。
73年《叛逆》奪性格演員獎
有時笑起嚟有種邪魅feel嘅John哥，演同陳美齡相愛嘅富家子，兩人同為理想、愛情離家出走，充滿叛逆感嘅演出為佢獲頒第19屆《亞洲影展》「最具性格演員」獎。
銀幕最佳拍檔狄龍
姜大衛同狄龍自69年《死角》首次合作後，俾邵氏打造成兄弟檔，一個狂傲叛逆、一個老實正直，呢對炙手可熱當紅巨星CP合作無間，見證邵氏電影黃金年代，兩人同住一宿舍生活整整六年，戲內戲外都形影不離。
《刺馬》最經典合作
73年電影《刺馬》中，狄龍因勾義嫂加上沉迷功名利祿同結拜兄弟姜大衛、陳觀泰反目，John為報殺義兄同奪妻之仇，混入軍中將已官拜兩江總督嘅狄龍擊殺，場面蒼涼悲壯俾奉為經典，07年重拍成《投名狀》。
78年照顧弟弟爾冬陞
爾冬陞係秦沛同姜大衛嘅同母異父弟弟，77年入行第三部電影《三少爺的劍》就做男一，同公司John哥對當年19歲嘅弟弟爾冬陞照顧有加，盡做哥哥嘅責任。
撐弟客串《三少爺的劍》
姜大衛為撐弟客串楚原執導嘅《三少爺的劍》演慕容金龍一角，片中俾妹妹利用去殺演三少爺謝曉峰嘅爾冬陞、同凌雲演嘅燕十三。
＊電視代表作*
80年麗的《大內群英》
80年姜大衛首拍電視劇，喺麗的電視（亞視前身）清裝武俠劇《大內群英》（獲選馬來西亞傳媒界二十世紀華語電視劇集100強第11名），演文武雙全、足智多謀、重情重義嘅曾靜，演得光芒四射，喺98年無綫劇集《乾隆大帝》再演曾靜。
94年無綫《再見亦是老婆》
93年姜大衛加盟無綫，翌年劇集《再見亦是老婆》做男一，演嘅于禮和因美艶女星投懷送抱搞婚外情而抛棄家庭，後嚟浪子回頭氹番肥師奶老婆陳秀雯，劇集大受歡迎，令兩人人氣急升。
姜大衛 李琳琳結婚44年
姜大衛同李琳琳自1974年結婚，育有兩女一仔，大女姜依蘭07年嫁曹永廉，二女姜依文亦已組織家庭，現居溫哥華，細仔姜卓文是李琳琳於1996年以48歲高齡誕下，現年僅22歲。2011年中李琳琳被爆患上大腸癌，手術後卻因癌細胞擴散至淋巴位置，要進行化療，被傳媒影到激瘦如同紙版人，不過經過老公姜大衛悉心照料，兩年後李琳琳終於戰勝病魔，兩公婆感情更勝從前，John哥早年接受傳媒訪問時表示：「嗰段時間我的確係好擔心，唯一可以做嘅就係共同面對。四十幾年感情，其實唔需要講出聲都知，大家都係冇咗對方唔得嘅！」
婚姻之道 互相包容
講到44年婚姻相處之道，姜大衛認為最重要係互相包容，佢話自己年輕時好多事情都會堅持己見，睇唔順眼就會出聲，但隨住年長的看法也有所不同：「之後會明白其實好多執拗都冇乜大不了，總之唔傷害到自己同別人就得啦。兩公婆嗌交，都係因為睇法唔同。後生時，我哋總係想改變對方，但慢慢就會知道，有啲嘢係冇得迫嘅！」
對女婿讚不絕口
近年姜大衛同女婿曹永廉喺《公公出宮》同《超時空男臣》密密合作，《公公出宮》中曹永廉更同現實一樣，都係扮演John哥嘅女婿角色，成就曹永廉攞到最佳男配角獎。John哥對女婿大讚話：「佢個角色唔容易演，但佢演得到！」至於拍戲時，廉記又會點樣稱呼John哥？John哥笑指以前會同佢講喺錄影廠要叫John哥，唔好叫外父！但廉記就笑言依家叫咩都冇所謂啦！
姜大衛 演藝世家出身
姜大衛係演藝世家出身，與大哥秦沛及同母異父弟弟爾冬升三兄弟感情勁好，John哥自4歲開始做童星，66年加入邵氏做武師，得到大導演張徹賞識，擔正《游俠兒》主角。70年更憑《報仇》一片成為香港首位獲得亞洲影展最佳男主角嘅演員。73 年，John哥再憑電影《叛逆》獲得亞洲影展最具性格演員獎。
姜大衛曾表示最鍾意演武俠片，除此之外就係喜劇，而喺新劇《逆緣》以三爺孫的故事為軸心，年僅30歲的陳家樂在劇中成為姜大衛嘅爸爸，黎耀祥就係陳家樂個孫，配搭新鮮！
陳家樂飾演嘅二戰時期冷凍人士兵陳家樂在2018年甦醒後，驚覺兒子姜大衛及孫兒黎耀祥早已年紀漸老，他決心重拾父子關係，掀起連串奇幻逆緣。
愛拍搞笑武俠劇
佢喺較早前播出的《翻生武林》中，就集合晒John哥最鍾意嘅兩種類型，劇中John哥一人飾演「慈悲老人任我飛」和「武林盟主慕容風」兩個角色，戲份勁重。
