姚嘉妮唔恨嫁入豪門 愛林祖輝低調又穩重
撰文：東方新地｜圖片：新傳媒、Facebook、劇照
｜姚嘉妮演長腿MK妹
大熱無綫劇《BB來了》中，講述盧苑茵為Ali請來姚嘉妮飾演的陪月員，點知呢位陪月員一出場，大家都睇到O晒嘴…
啡金長髮、魚網上衣、熱褲、拖鞋…
家中男人叫好
請個咁索的陪月員擺明係玩嘢啦？家中兩位男人對眼即時發晒光，羅樂林同黎諾懿一唱一和，激死兩個老婆！
｜40歲演MK妹冇違和感
過多幾日(8月10日)就40歲的姚嘉妮，今次喺《BB來了》飾演過氣MK妹陪月員朗朗，性格開朗跳脫、外形窈窕亮麗，一身青春打扮完全冇違和感，令人留下深刻形象！
｜姚嘉妮愛林祖輝低調穩重
劇中姚嘉妮的過去不堪回首，而現實中嘉妮有個幸福美滿的家庭，有愛護自己的老公林祖輝及一子一女，林祖輝呢個字近日更因黃子華再次被關注！回到那些年，嘉妮19歲時參加亞洲小姐並獲得季軍，美貌與身材並重，不過佢並唔係一心嫁入豪門，反而選擇了當時同為亞視藝人的林祖輝！
嘉妮接受傳媒訪問時，表示當時喜歡作風相對低調、給人感覺穩重成熟的林祖輝，當時林祖輝三十出頭，比嘉妮年長十幾年，當然能夠俾到呢位小妹妹莫大安全感！
2006年拉埋天窗
姚嘉妮被林祖輝的成熟穩重吸引，而林祖輝據稱當年喺太太選亞姐時已對其一見鍾情，之後力追伊人。嘉妮又大讚老公為人忠直，唔會去呃人，又唔少關係好長久的朋友，就好似黃子華咁。兩人拍拖七年後，於2006年拉埋天窗。
姚嘉妮擁長洲人樂天個性
劇中姚嘉妮飾演的許朗大情大性、直腸直肚，不時以笑遮掩傷心的過去，嘉妮表示現實中的自己都一樣，即使遇到煩惱，都應該嘻嘻哈哈去面對！嘉妮原來年少時住在長洲，當時佢隨便著對拖鞋就出街，周末就瞓喺沙灘上，令從小到大都不重視物質生活，明白到金錢係唔可以買到快樂。
｜黃子華視林祖輝為恩人
林祖輝演藝路上沒有大紅大紫，但算是個高學歷一族，佢中學就讀傳統名校九龍華仁書院，畢業於香港大學文學院，主修經濟及哲學，難怪與同樣哲學系出身的黃子華如此投契！子華喺今次《金盆𠺘口》中，表示當年自己第一次開棟篤笑時，因擔心銷情慘淡而到處貼街招宣傳，當年幸得祖輝仗義幫忙，期間講到哽咽。子華完騷後一入後台，就見到對方原來嚟咗捧場，子華激動到挨喺祖輝肩膀爆喊！
有報道更指出當年係祖輝幫子華去紅館攞表，申請文化中心個場地，佢哋又一齊度棟篤笑個名，而在2003年，子華公演《無炭用》時撞正「沙士」，祖輝仲幫手喺門外派口罩畀觀眾入場，真係好兄弟！
子華同祖輝相識逾30年，1988年二人在商台有份主持節目「咪前7先鋒」，大家認得子華嗎？！
