夾阿仔應酬老細 馬德鐘扮馬場大亨
廣告
由「馬神」 馬德鐘 、陳玉蓮及幾位友人所購嘅團體馬「快樂實在」上月初首次出賽跑第五，上星期「快樂實在」再度出賽，馬神孖住老婆張筱蘭、18歲囝囝馬在驤入場為愛駒打氣，結果「快樂實在」跑第二，攞到18萬獎金！期間化身馬場大亨嘅馬神周圍同一班名流好友寒暄，滿場飛不停應酬，不過馬在驤就悶到嘔，全程冇笑過！
馬場大亨
呢日愛駒「快樂實在」出戰，馬神就同太太及囝囝入場打氣，見到佢喺貴賓席滿場飛，四圍同名流好友寒暄，成個馬場大亨咁！
馬仔悶爆
不過對賽馬零興趣又不善交際應酬嘅馬在驤，就悶到抽筋，見佢全程零表情冇笑過，仲不時行到離行離列。期間馬神見到BMA老闆羅傑承及太太梁芷珊，見機不可失，即時想介紹囝囝俾對方認識，點知阿仔行到老遠，馬神夫婦惟有急急召佢返嚟！早前高調宣布囝囝會入娛樂圈嘅馬神，雖然努力為其打開人脈，但都係時候要教吓馬仔點樣social至得啦！
