演員大爆四大拍《大帥哥》血淚史 徐榮:要簽生死狀！
撰文：東方新地｜圖片來源：TVB、劇照、電視截圖、微博
演員大爆四大拍《大帥哥》血淚史
1. 跟上張衞健即興式表演
張衞健出名創意的即興發揮，讓很多的拍擋在事前都要做很多準備功夫。古明華指跟他演對手戲時是很大的挑戰：「同佢拍劇係個大挑戰，佢反應好快，預計唔到佢會臨時做啲咩，但拍嗰陣唔係好多時間俾演員準備一場戲，所以要喺屋企適應好個角色，否則拍嗰陣唔單止跟唔上，同埋會冇咗自己。」
不過古明華也說這是拍劇有趣的地方：「我從來唔擔心對手有咩勁嘢爆出嚟，因為我投入到角色嗰陣會自自然然即興交流到，唔使特登去諗，如果再演就會好假。」
‘
Eddie非常同意，對手是張衞健的緣故，所以自己的本分要做足之餘，還要更好：「每次返到嚟都會早啲少少入錄影廠，但佢已經坐咗喺度寫緊好多嘢度稿。雖然自己喺屋企都有做功課，不過一埋位佢又同劇本表達方式唔同，除咗自己編排一啲對白接返你，亦會再執一執你嘅對白，令到成場戲多咗笑位。」
至於徐榮就表示學到唔少嘢：「張衞健又會問我哋諗住點演，最記得有一句我自己度：『喂大哥嘅嘢你都好信嘅，佢聽3成，作3成，3成睇心情』，佢聽完之後一開拍就即場作對白接落去：『我聽3成，作3成，我依家冇9成都估到8成啦』，接得好靚！」，不禁佩服對方轉算快！
2. 犧牲自己的第一次
在劇中，徐榮要勾引愛好男人的古明華，其中一幕二人更要互咀，但因為當時他們二人同樣留了鬍鬚，所以親熱場面變得更重口味：「都幾刺激，好重口味！要簽生死狀！」
3. 夏天拍劇熱到光頭龜裂
因為劇集於夏季拍攝，又有不少場景是在戶外進行，徐榮笑稱Eddie的光頭被曬到龜裂，甚至有中暑徵兆，對白也說不出來，更要日日飲正氣水死頂。
當時天氣非常酷熱，高達40多度，Eddie、徐榮憶述當時大伙拍完一幕就會脫衣：「由底衫到面衫都濕晒，出面乾咗，又由裡面濕返出嚟，連外面的磚曬到冒熱氣，即使著住軍鞋都感到地面很燙。」不過幕後工作人員一整日不能休息其實更是慘烈，他們比台前的演員更為辛苦。
4. 一幕有七頁半劇本
導演在某一幕採用了一鏡到底的拍攝手法，其劇本更達七頁半，演員排練用上了3小時，而真正拍攝更用上了5小時。Eddie說那一幕可以將角色一次過發揮出來，不過一旦出差錯就會連累大家要重新再拍，所以壓力好大！
延伸閱讀：
細數《大帥哥》4大成功之處內地點擊率比《跳躍生命線》高一億
1. 張衞健係八、九十後集體回憶
張衞健自1996年拍攝《西遊記》後就無再喺TVB拍過劇，2002年再拍《齊天大聖孫悟空》，《大帥哥》係佢同TVB重歸於好後相隔十幾年嘅「復出劇」。當年《西遊記》播出，相當受大眾歡迎，張衞健扮孫悟空嘅風頭一時無兩。直至到廿幾年後嘅今日，一班8、90後依然覺得佢就係孫悟空，孫悟空就係佢。張衞健可以話係8、90後嘅童年集體回憶。
但近日就有傳《大帥哥》其實亦都係佢拍劇嘅收山之作。
2. 張衞健內地粉絲多
有次張衞健同TVB因為片酬出現分歧，高層對佢講：「你無毛唔值錢㗎！」張衞健心灰意冷離開TVB返內地發展。喺哩個機緣之下，張衞健喺內地相繼接拍咗幾部大熱電視劇，令佢喺內地打響知名度。例如有《少年英雄方世玉》、《小寶與康熙》同《小魚兒與花無缺》等等都廣受內地觀眾歡迎。
闊別咗港劇廿年嘅張衞健，其實儲儲埋埋都有唔少中港fans好期待佢再同TVB合體，一解童年回憶相思之苦。張衞健亦對內地觀眾好貼心，《大帥哥》嘅主題曲同片尾曲都分別有普通話版本，迎合內地市場。
3. 張衞健式表演台詞
誇張嘅肢體動作表演亦係張衞健特色，再加上佢獨有嘅急口令式對白，就變成佢尊屬嘅演出方式。由以前最早嘅「如來佛祖玉皇大帝觀音菩薩指定取西經特派使者花果山水帘洞美猴王齊天大聖孫悟空呀！型到跌渣！」到依家《大帥哥》拎返出嚟講依然未覺娘嘅「凉風有信，秋月無邊，虧我思嬌嘅情緒，好比度日如年，雖則我唔係玉樹臨風，瀟灑倜儻，但我有廣闊嘅胸襟，加強勁嘅臂彎。」實屬經典中嘅經典。
佢曾經就喺一個內地節目入面接受挑戰16秒講116個字，講野嘅速度實在令人歎為觀止。張衛健講對白嘅速度同腔調，簡直就帶領住成套劇嘅節奏。據悉張衛健喺《大帥哥》製作過程中有親自修改劇本同演員對白，務求將一切做到最好。
4. 《跳躍生命線》港味太濃
剛奪最佳劇集獎嘅《跳躍生命線》同而家熱播嘅《大帥哥》雖然同樣喺香港牽起煲劇熱潮，但前者嘅內地點擊率就無咁好，表面原因係《跳》嘅香港本土味較重，因為劇中有唔少意外以香港真實發生過嘅事件為藍本，所以內地觀眾未必會有共鳴。
《跳躍生命線》係屬於TVB經典嘅職業劇類別，所以內地網民或會覺得劇集香港味濃。而且，劇集情節頗為沈重，不同於《大帥哥》適合一定大細一齊睇一齊笑。再者，《大帥哥》背景係民初年代，內地觀眾唔會陌生同有太多距離感，但《跳躍生命線》背景就係香港現代情況，所以內地觀眾的投入感同興趣度都會相對無咁大。
