《多功能老婆》拍5個月至煞科！楊千嬅 自爆對唔住一個人⋯
撰文：東方新地 圖片：新傳媒圖片、楊千嬅IG
楊千嬅 《多功能老婆》拍5個月至煞科
千嬅接受傳媒訪問時表示，《多功能老婆》5月7日開機，未試過拍5個月咁耐，煞科有少少唔捨得，她又形容過程辛苦但開心，因為佢都好少拍以女性為題材的劇集，佢又話：「有一日要拍好多慘戲，喊足4個鐘，喊到唔知自己做乜，眼都腫晒，做唔到戲！」
周柏豪透露拍攝期間氣氛都好開心，至於在劇中要錫千嬅，佢笑言：「係唔小心咁錫咗一啖，要演不小心錫到，好難拍，要拍好多次」但佢話拍呢場戲都幾開心。
新劇明年至有得睇，但劇中千嬅原來同許紹雄再合作，令小編即刻諗起《新紮師妹》方麗娟同「方鍾Sir」！
大家仲記得《新紮師妹》呢一幕嘛？周驄睇到個Sir字，還謙遜地說：「真是活到老學到老！」
千嬅話自己在暑假冇機會陪兒子丁進諾(Torres)：「阿仔好失落咁開咗學，佢話以後佢拍戲，我留喺屋企，我諗咗陣就同佢講Sorry。」話雖如此，她認為正好話畀兒子知道每人都有工作，他將來也會有工作！
感激丁子高
她又感激老公丁子高照顧兒子及屋企：「佢做唔到其他嘢，淨係可以陪我同陪個仔，依家開咗學好多家長活動。」千嬅話所以拍攝辛苦，但好有滿足感。
還好，剛過去的中秋千嬅能和兒子返上海老家過節，共享天倫之樂！
楊千嬅 押後追B
今次楊千嬅再拍TVB劇，拍檔有周柏豪、黃錦燊、陳煒、黃浩然、袁文傑、洪永城、朱晨麗等，佢話：「舊年12月中我開演唱會嗰陣，Sandy姐(余詠珊)打畀丁生，話陳寶華 (《多功能老婆》監製) 想搵我拍劇，仲話覺得個角色好似我！」
楊千嬅仲話為咗今次拍劇要押後追B嘅大計：「不過套劇喺暑假先開工，基本上對家庭冇咁大影響，中間都有時間休息，唔會好似以前咁chur！」
多演活潑角色
楊千嬅入行23年，拍過唔少無綫劇，包括97年嘅《隱形怪傑》、《美味天王》，以及98年嘅《外父唔怕做》等，當年活潑又青澀嘅模樣，令觀眾留下深刻印象。
1997年《隱形怪傑》
楊千嬅飾演區珊珊，性格佻皮活潑，精靈可愛，口甜舌滑，最擅長向父兄撒嬌，為人數口精明，賺錢至上，頗有生意頭腦，懂得把握時機，是進取型的少女。同劇仲有林家棟、林保怡、陳妙瑛等。
1997年《美味天王》
《美味天王》主角係歐陽震華、關詠荷、宣萱、古天樂同張可頤，楊千嬅演古天樂前女友，戲份不多。
1998年《外父唔怕做》
由楊千嬅、張家輝、秦沛、苑瓊丹主演，最高收視有成38點，有成187萬睇㗎！成為1999年無線電視劇集收視第8位(當年《狀王宋世傑−貳》排首位有42點 )！千嬅仲唱埋主題曲〈讓我飛〉！
2001年《美味情緣》
由陳慧珊、吳啟華、林峯、楊千嬅主演，千嬅仲包辦唱主題曲〈美味情緣〉同插曲〈快樂與哀愁〉，最高收視有43點，有203萬人睇！
2007年《森之愛情》
楊千嬅話自己對上一次拍無綫劇已經係01年同林峯拍嘅《美味情緣》，但其實之後楊千嬅都有拍過TVB劇㗎！不過就係單元劇同客串演出。好似在《森之愛情》曾經同森美、小儀合作，喺第10集「天使夢」中千嬅飾演Nicole，套劇係改編自商台同名廣播劇的青春偶像單元劇，逢星期日晚出街。
2006年《老馮日記》(客串) 、2009年《廉政行動》(客串)
06年楊千嬅客串過馮德倫自編自導自演嘅處境喜劇《老馮日記》，之後tvb同廉政公署合作拍攝嘅《廉政行動2009》，千嬅也有份客串演出，扮演廉政公署總調查主任。
