外地中獎急返港 王祖藍貼身盯實李亞男
出名愛妻號的祖藍，七月初完成最後一集內地真人騷《奔跑吧兄弟6》後，已決定減少長時間返內地工作留港照顧大肚老婆，稍後更會接埋居於加拿大的岳母來港及交託母親大人全天候睇實亞男，實行人盯人小心護住王家金叵羅！
李亞男陀B 王祖藍好緊張
今年情人節結婚三周年，早於去年底王祖藍已表示會同老婆李亞男開行turbo造人，想不到努力僅數個月便造人成功！
上周五(13日)李亞男就在個人社交網大晒BB超聲波照片，選擇在二人拍拖九周年大日子公布大肚喜訊。但原來李亞男發現陀B時，正身處外地陪老公祖藍開騷，得知陀B一刻既驚喜亦特別緊張。據知情人士透露：「自從祖藍喺內地爆紅，工作接到冇停手，又唔想成日留低老婆一個人喺香港，加上亞男坐唔定，近呢一年嚟，亞男都經常做跟得夫人，陪老公周圍飛工作，四月佢同祖藍去加拿大做完騷，接住再去咗新加坡做兩場演唱會，就喺當地知道有咗，因為好突然，又驚啱啱有咗嘅亞男太操勞，當時祖藍真係好緊張，演出嗰陣全程好小心睇住老婆，做完騷第二日即刻改機票急急飛返香港安胎。」
溫哥華探嘉欣
已經陀B四個月過咗穩定期，七月初亞男飛溫哥華探家人，此行還順道向正在陀第二胎的好姊妹鍾嘉欣取經，日前亞男就晒出同嘉欣在溫哥華公園，兩人互摸對方個肚的溫馨照片，已經陀B四個月的亞男，著住One Piece牛仔裙亦可見個肚已經有番咁上下份量，據亞男身邊好友透露：「其實上年亞男已經Ready準備生小朋友，最想生一仔一女，班好姊妹一路都知佢好想快啲做媽媽，知道佢陀B個個都好戥佢開心，尤其係嘉欣，佢生第一胎嗰時，已經成日叫亞男快啲生BB，又傳授好多陀B心得畀佢，當亞男知道有喜，好想第一時間就通知好姊妹，但祖藍依足傳統要亞男除咗屋企人，要滿三個月先通知班姊妹。依家亞男同嘉欣兩個日日都通電話傾媽媽經，有咗之後亞男心情好好，陀B又陀得好舒服，冇乜孕婦嘔吐不適，身邊又有咁多人錫佢同照顧佢，亞男孕B心情好輕鬆！」
減少內地工作
王祖藍除咗興奮更加超級緊張，7月6日拍罷《奔跑吧兄弟6》的嘉年華版，他已決定減Job留港陪老婆安胎。據知情者透露：「亞男啱啱有咗嗰陣，因為祖藍仲拍緊《奔跑吧兄弟6》，之前又接咗唔少工作，佢一路都唔放心，就派屋企人日日去佢屋企睇住老婆，雖然細佬已經有個女，但祖藍媽一路好恨再抱孫，知道新抱有咗，不知幾開心，就算祖藍唔叫，祖藍媽都日日煲靚湯畀新抱仔飲！話晒大肚婆要食多啲有營養嘅嘢，祖藍最緊張要老婆重點補鈣，要亞男每日飲奶谷胎，要亞男戒甜同戒咖啡！」
而養胎中的李亞男近日準備為自己烹飪書到書展宣傳，周三(18日)更出關到灣仔會展中心出席宣傳活動。據知情者透露：「祖藍呢個廿四孝老公，已經下令要亞男停晒工作專心養胎，不過佢知道老婆花好多心血喺本書度，都放寬畀老婆出關，但話晒書展人多，佢都好緊張，落order要大家小心睇住亞男！」
母愛氾濫
早前，本刊就拍到即將做媽媽的李亞男，陪同祖藍及親友外出晚飯，當日所見，亞男慈母上身全程對姪女非常照顧，食飯前還帶姪女去商場買玩具及零食，吃飯期間，又唔揀同祖藍一齊坐等老公服侍，反而黐實姪女細心夾餸畀對方，對住姪女已經愛心爆棚，亞男將來肯定是個超級好媽媽。
重點補鈣
當日吃完晚飯，祖藍再去買了兩包脫脂高鈣奶上車畀老婆飲，雖然係新任爸爸，祖藍亦知道鈣質對肚裡BB成長非常重要，實行重點補鈣狂谷，希望生個似足老婆李亞男的靚B。
愛心爆棚
祖藍同細佬及親友食飯期間傾個不停，老婆李亞男就全程掛住照顧姪女，兩個黐住坐好好傾外，亞男更全程細心夾餸給對方，似足慈母愛心爆棚！
湯水進補
老婆掛住氹小朋友，袓藍就全程盯實老婆，又特別叫滋補靚湯畀老婆進補，非常體貼！
做埋司機
食完飯，兩公婆分頭行，亞男同部分親友行返寓所，而同細佬手足情深的祖藍，就揸車先送細佬回家，自己再外出工作。
興奮報喜
7月13日，李亞男在個人社交網晒出BB超聲波照片公布有喜，留言分享懷孕喜悅！
今天是我們拍拖9周年紀念日😍 很興奮感恩可以在這個特別的日子 宣布我和祖藍將迎接一個新生命嘅來臨 💕 so blessed to have a new life in our family ❤Happy 9th anniversary !
李亞男Leanne（@therivergirl）分享的貼文 於 張貼
趕返港安胎
今年四月亞男陪祖藍去完加拿大再去新加坡工作，就在外地得知有喜，令兩公婆既興奮又緊張！更急改行程趕返港安胎。
Had a great time in Toronto 💕 memorable 2 nights!
李亞男Leanne（@therivergirl）分享的貼文 於 張貼
奶奶狂喜
唔單止對小朋友有愛心，李亞男亦識得尊重長輩，同祖藍媽一直相處融洽，奶奶得知好快抱孫，開心到第一時間買定補品畀新抱進補，全天候照顧亞男！
做足保密功夫
五月李亞男同岑麗香為王君馨慶生，當時已經有咗BB的亞男，因為陀B未足三個月，怕小器未敢將好消息公開！
自從陀B後，每到人多地方，亞男都戴口罩護胎。
李亞男近年將時間放去研究烹飪，煮得一手好菜的她，經常煮好嘢食餵飽老公，日前(7月18日)，更為其烹飪書出關到書展宣傳，大肚後首現身同大家分享將做媽媽的喜悅。
向嘉欣取經
陀B四個月的李亞男，日前一個人飛溫哥華探家人，順道探同樣留加安胎的好姊妹鍾嘉欣，同好姊妹同時間陀B，兩人更興奮到一齊挺肚影相大晒母愛，嘉欣還調皮指住亞男個肚量度BB size，十分搞笑。
比李亞男遲婚的鍾嘉欣，一直鼓勵亞男快些生BB，得知好姊妹有咗，自然喜上加喜，快將做第二任媽媽的嘉欣，更不停將自己陀B經驗同好姊妹分享。
李亞男：婚姻就是各有犧牲
李亞男早前接受本刊專訪，大談婚姻之道。
從拍拖到結婚，王祖藍固然爬得快，而他和李亞男這一對也讓不少人跌眼鏡。不過恩愛之餘，去年底還是傳出祖藍太忙、亞男太依賴，於是亞男因為驚恐症入院，亦疑似患上抑鬱：「驚恐症係真嘅，不過抑鬱係假嘅，係結婚冇耐我因為腸胃有事入咗院，當時祖藍喺內地拍緊電視劇《哪吒》，實在請唔到假返唔到嚟陪我，我就真係覺得好down。外界話佢為咗事業忽略我，我想話其實係佢為咗我犧牲咗好多至真。嗰次以後，佢真係除咗綜藝節目再唔會接內地電視劇、永遠出trip都一定唔會超過三個月。我覺得婚姻就係要互相珍惜互相犧牲，佢講得出做得到，所以我本來想去日本九個月考個藍帶章，依家都暫時放低咗呢個目標，冇可能淨係佢一個為咗呢段婚姻努力。」
李亞男 爹哋鼓勵19歲選美
33歲的李亞男在上海出世，9歲舉家移民加拿大溫哥華，她說自己小時候被外公外婆湊大，長大則學校、教會、屋企三點連線，從來不出門、從來沒有自己的社交圈，21歲認識祖藍之前，也只交過一個男朋友：「其實拍得兩個散拖，咩都冇做過，我都唔知算唔算正式一段感情。」
愛在祖藍未紅時
一坐下來，其實李亞男一直高呼，要幫她澄清一下和祖藍拍拖的時間線：「好多人以為佢開始紅我至同佢一齊，其實05年我哋對大家有feel嗰陣，佢仲係兒童節目主持、仲未幫《東方之珠》郭晉安代唱、仲未演《同事三分親》個樓華。」李亞男和王祖藍的初邂逅，就是在藝人之家。「當時大家對大家都冇感覺，淨係覺得佢細細粒幾得意。識佢以前，我鍾意嘅明星都係王力宏、黎明嗰啲⋯⋯」簡單嚟講，即是一概白馬王子型，並且高度一定要在李亞男之上，那些年，有排都未輪到王祖藍。
藍媽媽 推波助瀾
當時李亞男沒有考慮過王祖藍，連王祖藍後來也對李亞男承認，選美冠軍是自己能力與想像範圍之外，兩個人的關係開始起了微妙變化，多得祖藍媽媽推波助瀾。「我記得有一次藝人之家燒嘢食，祖藍媽媽第一眼見到我就讚我靚，跟住燒完隻雞翼又講『李小姐你好靚！』、燒完條腸又講『李小姐你好有氣質！』成晚讚完我十次八次之後，夜晚又返去同祖藍講。祖藍都話嗰晚開始留意我，然後有一次發現我個手袋隨身袋住本聖經，至真正刮目相看，覺得呢個女仔唔同其他選美出身嘅人，都幾虔誠唔係淨係追逐名利。」
一對一教學
也就是那一晚以後，王祖藍開始給李亞男教廣東話。話說多才多藝的祖藍一直在藝人之家教演技、教唱歌亦教語言，不過人人都是大班教授，唯獨李亞男一個可以特別享受一對一教學：「嗰陣時冇諗太多，依家諗番，係喎？得我一個嘅？又好似係有小小追嘅成分。跟住係佢約我去主題樂園玩，大家喺Space Moutain入面坐過山車，驚驚吓就拖咗手仔⋯⋯不過嗰次之後我哋冇即刻一齊，反而係去咗問牧師意見。」
冷靜期 三年零四十日
李亞男說，祖藍在遇到自己以前情路上有過不少波折，並不敢貿然開始新感情，而自己則是經驗太少，不敢自己做決定：「尤其係身邊有朋友提醒我， 我一個女仔嚟到陌生地方，第一個喺身邊出現嘅任何男性都有機會被我依賴，我都怕對祖藍嘅係感動唔係感情，最後傷害咗佢。所以牧師叫我哋畀自己四十日冷靜期先，四十日之後我哋兩個喺電話分手，大家都講到喊⋯⋯其實咩都未做過、完全未開始過， 咁都一齊喊，諗番轉頭都覺得好cute。」
身高差距
那一年不敢開始的原因，李亞男承認，其中一個顧忌的正是身高差距，兩人衡量過利害關係，始終還是怕惹人話柄。「真心嗰句，如果唔使顧及人眼光，我哋應該會更早一齊。其實自己幸福就得，又唔係犯法，事實證明，之後真係公開戀情，(身高差)都唔係寫咗好耐啫！」
一起傳教重燃愛火
冷靜期一過就是三年，兩人因為一起到美加佈道會傳教而愛火重燃，一回港、李亞男收到第一封Email就是王祖藍徹夜趕工寫成的歌詞《墮入凡間的天使》，然後正式拍拖：「分開嗰三年，我哋真係放低咗，我甚至有睇吓身邊有冇其他人適合⋯⋯我嗰陣時都以為係，我嘅世界可以好大，甚至喺身邊搵吓有冇其他人可以發展，不過慢慢都係發現冇人比祖藍更適合我。」
「我哋價值觀一致、好多嘢都一凹一凸，佢快我慢，佢複雜我簡單， 我鍾意飲紅酒佢鍾意飲朱古力奶。我自細慣咗畀人照顧，而佢係阿哥，爸爸早走十幾歲就要孭起頭家，對住屋企好有責任感，我細個好想要哥哥，佢會教我會幫我揸fit，唔好睇外形，佢內心好強大，從來唔會驚青。仲有佢好有才華，喺藝人之家教得好好，事實上係可以做教授嘅人，畢業咁多年好多嘢依家都仲可以拋書包，同埋我最敬佩佢，係咁叻都可以好謙虛，會放低自己學新嘢，又會聽我意見 ……」講到老公，就讚到冇停口！
被岳父母誤會無禮貌
從被高攀，到如今成為成功男人王祖藍背後的賢內助，李亞男說，眼前的小個子其實沒有變：「人係會成長，我都做唔到以前嘅我，佢表面上變咗，但係本質係一樣，我知佢好多嘢做又做老闆，無時無刻都好多嘢諗好多嘢度，最開頭連我爹哋媽咪都誤會佢無禮貌、點解成日講電話⋯⋯作為佢身邊嘅人，知道佢同一時間處理緊幾多嘢，可以做嘅就係返到屋企時畀佢盡情放空、畀佢落台嘅時候可以做番自己，當佢忽略咗身邊嘅嘢時，提一提醒佢，幫佢去留意見唔到嘅嘢。」
順道一提，李亞男說王祖藍個子雖小，喜歡的東西卻都偏大：「所以佢揀咗我做老婆，又喺大埔買咗依家呢個三千幾呎嘅屋企，喺出邊做嘢辛苦，佢真係好需要一個屬於自己嘅地方好好放鬆。」
記得當時跟剛剛因為代唱冒起頭來的王祖藍第一次做訪問，他就說過要買大屋、要給媽媽最好的生活，十年而已超額完成，這就是為甚麼個子小小的他，為甚麼身影總是很高大。
