城堡工心計！ 方媛霸女隔絕奶奶 磨心城城壓力爆煲
要努力搵奶粉錢照顧妻女及養方媛全家，城城近年戲接戲已經忙爆，據悉孝順仔去年趕結婚生B，無非想年邁母親有孫抱，可惜方媛率領由大陸來港的父母日日霸住個女，令郭母未能享受嫲孫樂，兩面夾擊城城變磨心，壓力爆煲自然人變躁。方媛生女已經母憑女貴，有埋慈姑椗咪更加氣燄？
撰文：東方新地｜圖片：新傳媒圖片、Instagram、微博
城城 角色沉重壓力大
入行逾30年的郭富城，一直為事業打拼，直至去年4月變有腳雀仔娶方媛，同年女兒出世做埋「四大岳父」後，幸福笑容經常掛在嘴邊，感覺比以前更開心，他坦言以往愛參與朋友聚會，如今則經常留在家中，想多抽時間陪伴愛女。不過早前有傳城城再做老竇，其中一次面對傳媒追訪，他竟反常態表現甚不友善，並喝止傳媒不要再採訪。對於一時躁底，城城事後表示因為太入戲：「我好少講家庭事，不過同大家分享吓，有小朋友係好開心嘅事。但係好多時候小朋友係上天畀自己嘅恩賜，我都想保護屋企人。無論將來有幾多個小朋友，都係好開心，老實講我係鍾意一個多人嘅家庭，開心嘅家庭，不過暫時唔可以講太多。」原來早前城城拍攝由鄭保瑞監製、黃慶勳執導的《麥路人》，他表示為演活戲中三餐不繼的低下層人物，對身邊的事，反應會好大。
最近城城忙宣傳新片《無雙》，在戲中一人分飾兩角的他坦言最難是拿捏情緒：「我最忟係喺泰國拍外景時，其中一日要飛去第二度表演，返到嚟嗰朝早我要拍一場重頭戲，點知失準，我即刻同導演要求重拍，前後拍咗三次先得，好彩布景未拆。」面對不同角色的挑選，城城一旦投入情緒便很難抽離，他表示剛拍完電影《麥路人》比《無雙》更沉重：「《無》呢套戲個角色某程度上係個天才，有錢到可以周圍遊歷，但《麥》片係講緊個冇錢、冇家嘅人，情緒上好辛苦，可能有時發咗脾氣都唔知。加上我太投入角色，個人變得容易忟憎，希望大家體諒。」
為體驗做露宿者，城城的造型十分潦倒，因為留鬚搞到個女認唔到爸爸，除了要拍攝去摷垃圾的戲份，城城更刻意捱餓令自己代入角色，拍到入晒戲，回家便不多出聲，亦因為情緒低落有時會在片場失控，甚至發脾氣鬧人。
隔絕奶奶親孫
令城城鬧情緒又點止工作咁簡單，據知方媛自從坐正做城嫂後水鬼升城隍，恃住為郭家生了女兒開始坐大，再加上其父母去年開始長期留港湊孫，人多勢力大，相對城城母親 勢孤力弱，與孫女見面時間少之又少，知情者透露：「城城知道阿媽想抱孫，所以先趕生B，之前亦安排阿媽同住，希望佢成日都可以見到個孫，點知方媛父母落嚟話幫手湊B，最後喺城城樓下租住單位，B女就長期交由婆婆負責照顧，方媛全家日日霸住個女，嫲嫲有時想同個孫女玩吓都唔得。城城真係左右做人難，但佢又成日唔喺香港，根本控制唔到屋企情況，夾喺中間做晒磨心，最慘就係佢仲要冧個老婆幫佢繼續生，又要靠岳父岳母幫佢睇頭睇尾，所以城城一方面安撫阿媽，話遲啲會再生多幾個孫畀佢玩，另一方面就氹方媛叫佢專心留喺屋企湊女，同埋準備好迎接第二胎，唔好成日掛住佢盤網上時裝生意。」城堡上演宮心計，分分鐘好睇過做戲，方嫂手持生仔免死金牌，絕對一人獨大！
事實上，自城城女兒Chantelle出世後，本刊記者只在其大坑城堡的低層空中花園見過岳母抱B現身，卻從未見過城城母親與孫女同框出現的歡樂畫面。日前方媛與父母及外傭帶同女兒外出，眾人由司機接載出發到海洋公園，其時下午2時烈日當空，方媛一行五人到達海洋公園後在門口擾攘一輪，只見Chantelle扭眼瞓捽晒眼，一直由婆婆抱實的她更一度撲向母親懷抱，城城岳父又曬到面容扭曲，最後方媛決定放棄入園，急召司機打道回府。當日所見，方媛雖未明顯見肚，但她避忌抱女，上車落車都由婆婆負責，她只在女兒扭計時抱了五分鐘左右便過手。
天王變愛妻號
城城被細22年的方媛降服，由不覊天王變愛妻號兼慈父，不過湊女幾緊要都好，他亦不會冷待老婆，一有時間就製造機會冧妻，早前就被本刊影到撇甩囡囡，同老婆外出二人世界歎辣蟹，離開時仲十指緊扣拖到老婆實一實行去攞車，另一隻手就拎住大袋外賣，同一晚城城還充當攝影師幫老婆街拍，放下天王身份冧妻，可見城嫂地位幾咁超然。妻女係重要，不過城城都唔可以忘記初心，當日同方媛奉女成婚就是想阿媽有孫抱開心，要兩面兼顧做個好老公同孝順仔，難免承受一定的壓力，唔想爆煲失控，城城都要識得減壓，得閒搵番班老友篤波打邊爐啦！
上落車唔抱女
由出發上車到落車，囡囡都由婆婆全程抱住，到達海洋公園時婆孫與外傭先落車，方媛與父親尾隨。
短短15分鐘車程，阿女在車內換了一件米色左胸有隻大蝴蝶的裙仔，一歲人仔非常精靈，皮膚白滑愈來愈似媽咪。
到此一遊
在大門口企咗五分鐘，抱住女的方媛最後決定放棄入園，眾人又行番去停車場搵司機上番車，然後打道回城堡，歷時唔夠一個鐘的自由行結束。
😘好认真弹琴的样子👏
@mokafy分享的貼文 於張貼
片場暴怒
因為演露宿者令城城情緒受到影響，據知他曾在片場發火而不自知，對任何事反應都過大，情緒一度失控。
電影#麥路人# 正式啟動。😊🎉🎬鄭保瑞監製，支持導演黃慶勲苦研兩年的首部劇情片。每個角色都是一個故事，希望集合所有演員的演繹，為現實生活于貧窮缐下的人發一下聲音。故事細膩，值得期待。。😊🎉🎬💪🏻#麥路人 #郭富城 #楊千嬅 #萬梓良 #張達明 #鮑起靜 #劉雅瑟 #顧定軒 #吳嘉星
Aaron（@aaronkwokxx）分享的貼文 於張貼
煞科鬆口氣
雖然《麥路人》只拍了25日，但城城已陷入不能自拔的情感中，日前電影煞科，城城難得展現久違了的笑容，成個人鬆晒，與劇組開香檳慶祝。
故弄玄虛
近月被傳懷第二胎的方媛，被指因安胎沒有更新社交網，日前她上載半身近照上謂：「好久不見，聽說有人在等我更新哦！」未有提及是否已懷孕。
母憑女貴
幾時都話生女好，方媛與母親同樣都是母憑女貴，一個係「城嫂」，一個係「城城岳母」，閒時high tea行名店，母女齊升呢！
方媛產後復工出席活動，城城更派出經理人小美全程傍實老婆。
