盤點《美女廚房》7大新地獄廚神！Bob大嗌：行開啦八婆！

撰文：東方新地 ｜ 圖片：TVB節目截圖、影視截圖

地獄廚神第一階段：生㗎！俾太陽曬都熟過佢哋煮！

《美女廚房》地獄廚神嘅一大特色，就係佢哋神乎奇技嘅烹飪方法，會令一切都煮唔熟，令人不禁懷疑佢哋煮咁耐究竟係煮咗啲咩⋯⋯溫馨提示：生嘢，真係唔可以亂食！

1.吳若希 負25分！

吳若希嘅地獄菜式簡單嚟講就係「全生」雞卷伴「生」蠔汁！真係想問吓阿人妻，點解你舊雞煮完都係透明粉紅色嘅？點解嘅？點解完全係生嘅？

難怪阿BOB會直接攞垃圾筒出嚟！

2. 朱晨麗 負29分！

朱晨麗嘅地獄菜式就係「液晶體流心瀨尿蝦」！唔好玩啦大佬，唔係所有嘢流心就係好食㗎！！！

連唔怕食生嘢嘅Jacques師傅都頂唔緊啊！

3.劉佩玥 負29分！

見到劉佩玥拎住把刀去煎嘢嘅時候，在座嘅主持人同嘉賓都深知瀨嘢啦今次！原本嘅指定菜式係焗法國鵪鶉伴青豆蓉⋯⋯

阿BOB睇見劉佩玥咁煎法都覺得不安，就叫佢切開隻鵪鶉睇吓，點知⋯⋯

輪到地獄廚神自己試食，睇嚟佢自己都唔敢食！因為曹永廉講得無錯，真係太陽曬都熟過佢煎啊！！

4. 蘇麗珊 負38分！

蘇麗珊要煮嘅指定菜式係「豬網油松露野菌伴薯仔麵糰」，但碟餸點睇都係得層皮熟嘅「全生」雞卷！！阿BOB喺蘇麗珊試食嗰時都忍唔住叫佢搵啲熟少少嘅位試！

啲雞肉，粉紅色、晶瑩剔透咁，真係用水淥一淥都熟過佢煮咁耐⋯⋯

《美女廚房》地獄廚神終極篇：熟嘅唔代表安全！

以為地獄廚神得呢啲斤兩，實在係太天真啦！！！因為煮得熟唔代表擺得落口，咁先係地獄廚神嘅最高境界！

5.湯洛雯 倪晨曦 負45分！

指定菜式原本係「避風塘無骨炸豬手 配 龍蝦湯凍」，而呢對撞樣姊妹花嘅地獄菜式就係「廚餘炸豬手 配 洗潔精龍蝦湯」！

姊妹花人當然靚，煮嘅餸賣相就真係麻麻喇！

而呢杯「龍蝦湯」，不但有洗潔精味，仲成功令所有主持人同嘉賓吐哂出嚟！真係今季第一次啊！

6. 梁嘉琪 負45.9分！

梁嘉琪嘅菜式係「What the 膝」配 地獄洋蔥湯！但睇嚟佢都唔係好明點解自己會係地獄廚神⋯⋯依小編所見，通知呢類人先真係堅．地獄廚神⋯⋯

本來嘅指定菜式係「紅酒燴羊膝 配 法式洋蔥湯」，但梁嘉琪煲嘅湯就真係出哂事，炒完啲洋蔥無味都算，啲湯仲要黑黑地色！

張振朗飲完又嘔完之後，忍唔住大鬧：「真係What the膝 (英文「該死的」嘅諧音)！羊膝個膝啊！」

7. 鄧佩儀 負46分！

估唔到！鄧佩儀煮嘅餸竟然可以逼到阿Bob破口大罵：「行開啦八婆！」但蕭正楠助紂為虐就好開心咁喇！

呢道名為「埋嚟奶埋嚟椰」嘅菜式，鄧佩儀自己試食完都失控喪笑！好恐怖啊真係！！！！

好慘啊阿Bob！！！！

仲要食到喊！

張振朗喺後面食完花生就到佢食地獄料理啦！