圈中模範夫妻 豹哥豹嫂恩愛祕訣
廣告
娛樂圈中愛侶一對對，大家經常都會見到佢哋在社交網站大放閃光彈，網民紛紛邊被閃邊俾like！婚前甜蜜幸福少不了，但婚後保持恩愛亦有難度，而圈中就有唔少婚後都長期「放閃」嘅模範夫妻， 單立文 同胡蓓蔚（豹哥及豹嫂）就係圈中公認嘅一對！依家一齊睇睇豹哥豹嫂相戀多年，究竟係點樣保持恩愛如昔呢？
豹哥及豹嫂自從1996年年底開始相戀，經過11年嘅愛情長跑，終於喺2008年拉埋天窗。豹哥曾經喺傳媒面前表示，拍拖時間長了就一定要結婚，因為結婚唔單止係兩個人嘅事，仲關乎家人及朋友。結婚，可以令豹嫂遠在上海嘅家人知道，女兒有一個安穩嘅男人可依靠。平時給俾感覺不羈嘅豹哥，原來心思相當細密，好man呀！
婚後8年，兩人依舊恩愛，大家一向都以為女生會比男生愛放恩愛照放閃，不過豹哥豹嫂就剛剛相反，豹哥經常大晒兩人嘅甜蜜合照，又會互相喺對方IG留下搞笑留言，旁人睇見都非常羨慕！豹哥表示大家相愛近21年，好似老夫老妻咁一樣，生活簡簡單單，冇咩特別。但為對方製造驚喜就一定要，例如雙方生日一定會為對方慶祝，可能平淡生活中的一絲絲驚喜，就係佢哋可以維持多年感情嘅要訣。
