回到三國|回顧歷年TVB十部經典穿越劇 收視最高都唔係《尋秦記》
廣告
TVB安排深夜重播《回到三國》,原來係林峯在TVB最後一套古裝劇,故事由馬國明由頭帶到尾,2012年首播時都曾引起不少討論,但一講無綫穿越劇,人人以為最經典、最受歡迎係《尋秦記 》,其實01年首播嘅《 尋秦記 》雖然大受歡迎歷久不衰,不過論收視,原來不如《 九五至尊 》。收視爆冷跑出,平均收視34點,大結局最高收視更達到46點。
史上最強穿越劇《九五至尊》
2003年《九五至尊》首播成熱話,熱潮到年尾都未退,男主角江華成為當年台慶頒獎禮「 我最喜愛的電視角色 」,而張可頤就同年撼贏宣萱、佘詩曼,成為雙料視后,絕對係師奶殺手江華同當家花旦張可頤嘅事業巔峰。
![回到三國 九五至尊 江華 《 尋秦記 》為無綫34周年台慶劇,係古天樂喺 TVB 演出嘅最後一部電視劇。](https://imgs.orientalsunday.hk/wp-content/uploads/2020/07/2_1180a_aunt_p8_9_11976314115f0eb56e930ce-714x1024.jpg)
點解爆大冷跑出變全年收視冠軍?男女主角出色演繹居功至偉,故事講述張可頤飾演嘅呂四娘喺行刺江華飾演嘅雍正皇帝之際,兩人遇上水龍捲,意外地由清朝穿越時空到21世紀嘅香港。故事圍繞兩位古代人喺現代展開新生活,江華文謅謅又咬文嚼字搞到笑料百出,而張可頤就剛烈又硬倔,同江華處處作對到漸生好感過程極具喜感,笑點絕對唔比項少龍去秦朝鬧嘅笑話少!
![回到三國 九五至尊 江華 轉行賣保險之前,師奶殺手江華最耍家係扮劉華同埋扮皇帝,03年喺穿越劇《 九五至尊 》中就係飾演由清朝飛到落現代香港嘅雍正皇帝。](https://imgs.orientalsunday.hk/wp-content/uploads/2020/07/1_1180a_aunt_p8_9_19838421365f0eb56c8999e-685x1024.jpg)
![回到三國 九五至尊 江華 《九五至尊》當年放喺過年後炮灰檔播出,點知爆冷成為最高收視劇集,張可頤做咗雙料視后,江華得最喜愛男角色獎,之唔係因為同年仲有另一個收視經典《戇夫成龍》囉。](https://imgs.orientalsunday.hk/wp-content/uploads/2020/07/4_1180a_aunt_p8_9_11493767595f0eb571e5d30.jpg)
無綫多年來拍過唔少穿越劇,而且收視亦屢創新高,證明呢條橋使得,難怪長拍長有。
![回到三國 九五至尊 江華 2012年首播、由馬國明、林峯同楊怡等主演嘅《 回到三國 》,收視高達30點,亦對得住強勁卡士,而馬明喺劇中所創嘅「 港男十八式 」,抵死又搞鬼!](https://imgs.orientalsunday.hk/wp-content/uploads/2020/07/8_1180a_aunt_p8_9_14353094655f0eb5763d434.jpg)
伍詠薇鬧爆某男藝人言行難頂
同場順手又爆番個秘聞先,話說伍詠薇近日就爆大鑊,鬧爆曾經合作過嘅當家小生級男藝人言行難頂,三宗罪包括恰新人、遲到早退、同埋開工 no show 扮大牌。至於呢位難頂男藝人冇開名,不過就畀咗幾個 tips,姓名得兩個字、亞視出身、好鍾意學五虎其中一位,大家有興趣不如煲劇之餘又玩吓猜謎語啦,反正抗疫大把時間!
![回到三國 九五至尊 江華 伍詠薇爆大鑊講到七情上面,更即席扮難頂男藝人喜歡扮chok個樣。](https://imgs.orientalsunday.hk/wp-content/uploads/2020/07/f1_18276053985f0eb57c1995c.jpg)