唐文龍傳暗撻武打女星 大讚對方是位好女仔！
唐文龍傳暗撻武打女星
近日，48歲的唐文龍被傳與30歲武打女星撻著，事源因有報道指二人相約飯聚時，女方不時掩面兼撥頭髮，意態撩人，食飯時更講唔停，似有講唔完嘅話題。據指，當二人離開時，唐文龍因見到楊柳青穿4吋高踭鞋，於是好man咁傍實女方，雙方似有過從甚密之嫌。
當有傳媒訪問唐文龍時，他表示與楊柳青只是朋友，因拍攝無綫劇集《溏心風暴3》而認識，加上，他最近為其師傅拍攝一條詠春短片，因知道楊柳青是個打得之人，才邀請她一起拍攝，並因而最近見多了對方。
大讚對方是位好女仔
當再被追問同楊柳青會否有發展機會，唐文龍則表示女方是一個幾好的女仔，但現在會做好當前工作先，其他將來的事情則將來才說。
楊柳青回應傳聞
至於楊柳青對於與唐文龍的緋聞，她則稱唐文龍為哥哥，同時表示對方好好，經常照顧及提點自己這個後輩，並因對方知自己想學做武打演員，所以今次好開心對方會找自己一齊拍詠春。
至於被問到與唐文龍有冇發展可能性，楊柳青就話男方好有風度同細心，有機會會於嚟緊雙方合作中再互相了解一下。
二人有共同興趣
模特兒入行的楊柳青現時30歲，與唐文龍因指攝台慶劇《溏心風暴3》才結緣。本身想學做武打演員的楊柳青平時亦有多做運動，不時就會於個人社交網上載做GYM同做運動的相上網，難怪與熱愛武術的唐文龍飯聚時，二人會雞啄唔斷，咁啱傾。
早前，楊柳青收到一大束紅玫瑰，博得佳人一笑，不知是誰人送的呢？
唐文龍傳暗撻咪神黃文意
之前，唐文龍與無綫奀星黃文意的貼頭親密相在網上瘋傳，有指有人當日一時「大意」將私相貼上社交網絡，隨即被cap圖大肆報道。但唐文龍與黃文意年紀相差23年，據悉兩人一齊只係兩個月，舊年聖誕前已經正式分手。
對於疑似被人利用上位，唐文龍早前回應本刊稱：「我唔想咁樣猜度別人，黃文意係一個好女仔，好有智慧英文又好，所以我哋好好傾，大家係正常朋友，有約過食飯所以被人影到。(拍拖兩個月分手？)冇話拍拖，又何來分手？總之我現階段唔係擇緊偶，事業為重！」
唐文龍稱冇位俾黃文意上
其後唐文龍出席美容活動，有指黃文意利用緋聞搏上位，唐文龍回應兩人只係朋友關係，希望大家唔好俾壓力對方，何況自己根本都冇能力幫對方上位。另外唐文龍讚黃文意本身已經係宅男女神，又係個好有智慧的大學生，希望大家放過佢！最後文龍強調新一年都係會以工作為重，感情事係其次。
睇片！唐文龍親身回應：「我都無位咯，何來上位呢⋯⋯」
