王晶翻拍《唐伯虎點秋香》新晶女郎登場……

星爺經典《唐伯虎點秋香》

1993年周星馳的《唐伯虎點秋香》，不經不覺已經面世25年，唔少觀眾同小編一樣翻看又翻看，電影啲經典對白幾乎識背晒！

日前王晶大導就喺網上發布多張《唐伯虎點秋香2019》劇照，不過新片竟然冇唐伯虎同秋香呢兩個角色，演員方面有陳浩民、林子聰、陳百祥、鄭佩佩、苑瓊丹及邱意濃。相中見到陳百祥、鄭佩佩和苑瓊丹，似乎都係繼續扮演祝枝山、華夫人和石榴姐。

不過最重要都係，王大導重點介紹最新「晶女郎」─ 雲千千，佢留言話：「《唐伯虎點秋香2019》中美女如雲，晶女郎空羣而出，包括最年輕晶女郎雲千千，飾演東香。」大家點睇？

呢位雲千千今年23歲，同以往晶女郎一樣身材玲瓏浮凸，早在14歲就參與了處女劇《仙劍奇俠傳三》，之後都有參與不同電影及劇集，經驗不少。但好多網民都覺得雲千千係一般「網紅樣」、「有啲膠」，加上星爺電影太經典，所以都冇咩期望……

星爺近年已退居幕後，觀眾已多年未有機會在大銀幕上看到其演出，不過星爺多部經典作品早已深深留在觀眾心中，翻睇又翻睇不在話下，甚至連啲對白都背熟晒！而《喜劇之王》，亦是唔少香港人的集體回憶！

日前《新喜劇之王》決定於2019年大年初一上映，搶攻賀歲檔檔期，官方發布了首張電影海報，海報上見到主角身穿白雪公主服飾及手持摺櫈，與前作一樣以夕陽為背景，不過演員名單及故事內容依然保密。

今年星爺全力趕拍《美人魚2》，不過該片需要用上大量特技，後期製作需時，所以未能趕及2019年賀歲檔上映。故今年10月開始有開拍新一集《喜劇之王》的消息。星爺自己當然唔會再演主角，班底亦都唔可能再見到莫文蔚、張栢芝，所以據知會搵來三位內地演員擔綱主演，男主角王寶強更是星爺親自邀請！

至於女主角本來盛傳係內地女星姚晨，不過佢已否認了有關傳聞，有指角色會由近年甚得星爺重用的「星女郎」林允演出。由於時間緊迫，星爺只負責《喜劇之王2》監製，並由邱禮濤導演執導。邱導喺行內出晒名係「目標王」，拍電影極少超支或超時，快靚正！

關鍵詞