周麗淇割價撐馬偉豪 新戲拍吳卓羲

撰文：東方新地｜圖片：新傳媒圖片庫

周麗淇 推內地劇賺少千萬

模特兒出身，周麗淇01年轉型做演員，第一個經理人就係馬偉豪。雖然Niki當時仲係新人、馬偉豪就已經呼風喚雨成為港產愛情片票房保證，不過次次開戲，一定照顧自家新人，《百份百感覺II》、《玉女添丁》、《下一站⋯天后》套套戲都預埋Niki一份，角色更十分搶眼。

雖然今時唔同往日，Niki已躋身一線女星、內地劇酬勞一集過廿萬，仍一直保持與一手帶自己出道的馬偉豪聯絡，相隔七年馬偉豪回流再拍港產片，Niki寧願賺少啲都要報恩。

北上賺人仔是王道，馬偉豪2010年起北上發展，今年被美亞影視重金召回港再拍港式愛情喜劇，日前就宣布新作《火拼男女》將會起用愛將Niki同吳卓羲拍檔做歡喜冤家。

當年箍住牙已經係馬偉豪電影御用配角，今時今日Niki身價十級跳、去年一套全國點擊50億的《那年花開月正圓》人氣再上一層樓，電影拍檔係宇宙最強甄子丹同劉德華，一早就重質不重量，控制工作量享受生活為上。

據知情人士透露，今次唔止肯拍住未成火候吳卓羲更甘願自減片酬：「Niki啱啱至拍完TVB套《再創世紀》，本來係諗住抖吓先，呢幾年亦都保持一年最多一套劇。不過馬偉豪帶佢出道，關係亦師亦友，出到聲當然唔同。其實拍完《那年花開月正圓》，Niki人氣同片酬又升一截，同期又有套內地長劇搵佢做女一，為咗恩師推咗套新劇，賺少成千萬！」

本刊向周麗淇求証割價接拍馬偉豪新戲一事，Niki坦言同對方亦師亦友，接拍未傾價錢：「其實馬偉豪係我恩師，冇佢帶我入行，亦冇今日嘅我，佢搵我時我已經答應，根本未傾到價錢同劇本，但我對佢好有信心！」

打造情侶經典

八十年代入行做編劇，九十年代開始做導演同監製，經馬偉豪一手捧紅的港產片愛情男女多不勝數，幾乎百發百中，電影叫好叫座、女主角亦個個因此上晒位！

鄭秀文 鄭伊健

比大導杜琪峯更獨具慧眼，馬偉豪早於96年已經搵Sammi主演電影《百分百感覺》， 同鄭伊健分飾男女主角Jerry及Cherie，大賺二千萬票房。

梁詠琪 陳曉東

97年《初戀無限touch》再造經典，識搵同陳曉東撞樣的梁詠琪做一對，笑中有淚初戀故事至今都係港人集體回憶。

楊千嬅 吳彥祖

馬偉豪為另一愛將楊千嬅度身訂造《玉女添丁》和《新紮師妹》劇本，成功將當年樂壇被Sammi騎住的千嬅捧上天，成為新一代大笑姑婆女笑匠。