周柏豪扮胡迪冧女失敗 輸畀另一人氣高企卡通偶像

文：東方新地｜圖：Facebook@周柏豪 Pakho Chau、IG@punkhippie、新傳媒照片庫

周柏豪自作多情受冷落

周柏豪為了冧個女，不惜打扮成《反斗奇兵》中的牛仔胡迪，不過2歲大的囡囡周芯悅（Sonya）似乎就唔多領情，周柏豪著住胡迪套衫，點知個女只顧睇電視，眼尾都唔睄佢一眼，可憐周柏豪冇晒表情，非常無癮。

胡迪輸畀JJ好啱數

周柏豪在社交網po相並留言：「小女孩的心事真難捉摸。昨天還被寵幸的胡迪，今天中午再次被點燈穿上衣服，最後還是被冷落😩」其實周柏豪被個女冷落都好正路，因為囡囡好專心咁睇緊的Cocomelon卡通，主角JJ是不少小朋友心中的人氣偶像。其系列兒歌在幼兒界無人不識，是全球訂閱人數最多的兒童頻道和世界上訂閱人數第二多的頻道，在Netfilx更是連續62日長踞排行榜首10位，打破Netfilx的全球記錄。

周柏豪 被指十年前已發現玻璃心的美

周柏豪的「玻璃杯」潮文發於2012年1月30日，今年正好是10周年，有不少網民都湧到這篇文章下「朝聖」，並留言說：「咁就十年」、「玻璃心碎了一地」、「十周年到此一遊」、「真係佩服柏豪，10年前已發現玻璃心的美」、「揣摩咗十年都係唔明」等等。

當年發潮文被狂抽水

周柏豪這段文字當年曾多次被翻炒和抽水，成爲網絡潮文。有網友提議柏豪：「下次貼條底褲出嚟，講吓啲漬形容吓陣味，應該仲多人Like。」亦有人翻文揶揄，如「今天不小心把心愛的木椅打碎了」等，連家具品牌宜家傢俬當年都抽埋一份，話有多款水杯發售，打爛咗可換過隻新嘅咁話。

「紅」到上C1：係我嘅運

不過這件事當年令周柏豪「紅」到上C1（娛樂頭條），他曾感慨說：「我覺得呢個係我嘅運，我搬屋嘅時候啱啱入行冇乜錢，屋企好多嘢，杯杯碟碟枱枱櫈櫈都係我阿婆畀錢我買，我係好珍惜，嗰日我婆婆入咗醫院，我咁啱打爛咗隻杯，射燈下睇閃令令，好似mirrorball咁，我攞相機影，影完成個過程，原來我唔係好記得我阿婆係入咗醫院，人生原來好糟糕嘅事，可以變成令你抽離、治療你嘅事，所以寫咗段嘢。」

發現原來呢一行咁得意

周柏豪續說：「我post咗段嘢之後，公司打畀我、記者朋友打畀我，facebook係咁彈嘢出嚟，做嘢啲記者個個都問、狗仔隊係咁跟，我覺得原來呢一行咁得意，以前我做完event冇記者搵我接受訪問，冇人會想訪問我，直到呢件事，我冇做錯嘢，但係畀狗仔隊跟、變C1、變封面，我覺得都係一個話題令到人記得我。」