吳若希爆老公睇鹹網 頒獎禮捧蛋照搶fo
撰文：東方新地 ｜圖片：吳若希IG、菊梓喬IG、東星圖片
吳若希借阿女把口爆料
吳若希預告以湊仔為由已向公司請假缺席《勁歌金曲頒獎典禮2020》，更暗指明白人唔到會冇獎的潛規則，果然頒獎禮當晚，吳若希捧蛋，半個獎都冇，死敵菊梓喬不但三度奪「最受歡迎女歌手」獎，當晚更一人擸了5.5個獎，成為大贏家，而同樣缺席頒獎禮的林峯，則與菊梓喬合唱《使徒行者3》插曲〈低谷天堂〉奪得「最佳合唱歌曲銀獎」。吳若希雖未有出席頒獎禮，隔空仍能成功搶去焦點，吳若希當晚在IG即時動態出文，今次唔止老公成為目標，更借埋阿女把口，將囡囡同佢嘅對話跟大家分享：
食飯時
女：妳瞓覺嘅時候，我攞爸B電話，有好多女仔Pat Pat，要畀錢果D
我：（內心）（望住女）係呀﹗咩嚟㗎？（擰轉頭望住佢爸爸）
爸爸：佢睇YOUTUBE果D公仔嚟㗎﹗
女：（望到爸爸嘅求生指數飆高）唔係真係嫁～係假㗎
拒做阿二預告缺席頒獎禮
全世界都知吳若希Jinny與菊梓喬Hana是死敵，過去因為爭做星夢「一姐」屢傳不和，吳若希於16年奉子成婚後復出亦難以收復失地，菊梓喬力壓她連續兩年奪得《勁歌金曲頒獎典禮》「最受歡迎女歌星」後，地位更加穩如泰山，令雙方牙齒印更深。三年前為生女缺席頒獎禮的吳若希，今年再次公告缺席《勁歌金曲2020》，揚言為照顧初生兩個月的囝囝一早向無綫請假，暗指潛規則唔到就預咗會冇獎，祝其他人在《勁歌金曲頒獎典禮2020》攞到好成績，過氣一姐自動棄權，不屑做阿二淪為陪襯，費事眼冤！
《勁歌金曲2020》吳若希為生仔放棄爭獎
吳若希於16年生大女Giselle前正值事業高峰期，她毅然放棄上位機會，到產後復出時，星夢一姐之位已被新寵菊梓喬取代，吳若希葡萄到出面，講嘢句句有骨衝住菊梓喬而來，前年菊梓喬首次攞「勁歌金曲頒獎典禮」「最受歡迎女歌星」，吳若希一句「造畀佢都應該」，令不和升級。
吳若希預先聲明再度缺席
《勁歌金曲2020》即將舉行，吳若希作為星夢大師姐，在本年度勁歌頒獎禮入圍名單中共有4首候選歌，亦有份角逐「最受歡迎女歌星」，不過吳若希去年11月誕下兒子Kylian，囝囝得兩個月大，為照顧兒子仍未想復出，吳若希決定再度缺席《勁歌金曲2020》，更一早向公司請假，她聲言為湊仔不會去頒獎禮，對於多年來的潛規則，缺席者將不會獲獎，吳若希亦做好捧蛋準備，笑言冇辦法，產後身體要緊，仲預祝其他歌手攞到好成績。
《勁歌金曲2020》菊梓喬一人獨大
吳若希放軟手腳，據了解是心知無人能阻菊梓喬三度蟬聯《勁歌金曲2020》「最受歡迎女歌星」，唔想做陪襯陪笑又要現場做戲扮恭喜對方，缺席《勁歌金曲2020》放棄攞變反而更好。事實上，菊梓喬的入圍成績確實拋離一眾歌手，她有7首候選歌曲，而去年中才加盟星夢的JW王灝兒的首支劇集歌曲〈誰人在身邊〉早前才剛推出，未成氣候，對菊梓喬「一姐」之位並未構成威脅，在零對手之下，菊梓喬幾乎攞硬女歌手獎。今年冇吳若希在《勁歌金曲2020》現場助慶，娛樂性與話題性都大大減弱囉！
