吳若希28歲陀仔勁嗌辛苦 巴弊寸老公：「仲想要就搵個二奶幫你生！」
廣告
乜嘢叫把口唔收，由吳若希真人示範！同老公Alex（何兆鴻）結婚三年，經常糟質老公唔使本，近日陀住慈姑椗更成家中女皇，不時在社交網狂呻陀仔辛苦，又嫌老公服侍不周，只掛住打機與及玩電話，臨盆在即依然把口唔收！呢日又留言發功，講明生完呢胎就封肚，更巴弊寸老公：「仲想要就搵個二奶幫你生！」他日老公真係搵二奶，真係唔知可以怪邊個？
撰文：東方新地
吳若希陀慈姑椗全面閉關
遇啱新冠肺炎疫情，陀住慈姑椗的吳若希，近月便全面閉關，早就在家如同女皇一樣，老公就到出晒面仍然唔知足，吳若希大女人心態更隨住個肚愈來愈大一發不可收拾，在社交網經常出PO晒大肚生活之餘，仲不忘踩老公一腳，又經常呻陀仔辛苦，腰骨痛到瞓唔到云云！
吳若希眼突突呻陀仔辛苦
呢日佢Po出一張眼突突照片，繼續勁呻 陀仔辛苦，她表示現時肚裡BB已經有八磅重，再落去生時隨時有九磅，講到壓力好大！真係非一般媽咪！相信要吳若希為仔女任勞任怨真係冇可能！
講到陀仔咁慘，吳若希還揚言唔會再生，仲口響響話：「仲想要就搵個二奶幫你生！」把口繼續唔收！
28歲陀第二胎，都狂嗌辛苦，真係難為嗰啲高齡產婦，母愛偉大！吳若希幾時先真正感受到？
唯有講句：「辛苦晒！」幫佢老公打下氣！
