一支公無女陪 吳浩康 事業至上
撰文：東方新地｜圖片：新傳媒圖片庫、吳浩康FB&IG、蔡卓妍IG
Deep吳浩康做低頭族
幾時都係嗰句，男人事業有成有上進心，使乜怕搵唔到個好女仔呢？所以阿Deep大個仔，呢個時候都係專心事業最緊要。早兩日見到佢一個人去中環坐地鐵，冇咗女朋友喺身邊，似乎已經重新振作冇再受情傷困擾，不過全程心不在焉掛住篤電話。可能真係工作緊要趕住回覆，不過下下做低頭族，錯過咗好多風景，分分鐘仲會錯過好女仔㖭㗎！
事業漸上軌道、愛情就未有起色，日前吳浩康一支公搭地鐵，全程低頭望電話。
同李昭南公布分手兩個月，分手時話「心裡依然愛她」的吳浩康，睇落情傷已經愎元。
步行入站頭、搭地鐵全程好似好貼地好熟路咁，不過唔知點解會冇八達通，要現場買張車飛。
除咗買飛時抬起頭，Deep一直帶住耳筒又篤住手機，似乎一心享受一個人寧靜。
「哥哥」突離世
Deep日前突然在IG留言「當我擁有好多機會嘅時候，偏偏失去咗你！#哥哥 #再見了 #沙煲兄弟 #我愛你 #忙碌令我忘卻痛楚」原來係佢表哥突然離世，令佢非常難過，據Deep講對方大佢兩、三歲，兩人感情非常好，阿Deep當佢親阿哥一樣。
其舊愛鍾舒漫亦有留言安慰阿Deep：「佢要你快樂啊！！！」
好友周國賢亦留言：「stay strong my brother」為阿Deep打氣。
蔡卓妍自爆已「結婚」新郎卻非現任男友？
早前阿Sa突然上載一張穿起婚紗並披上頭紗的相於個人社交網，同時留言：「說時遲那時快#多謝阿嬌 」，唔通阿Sa咁快低調出嫁？
正當各位網友及粉絲都想留言恭喜她之時，望真啲，卻發現新郞不是其麻雀館太子爺男友石恆聰，而是吳浩康！大家唔使驚訝，皆因阿Sa上載的原來只是劇照，而非她真的結婚了！
吳浩康感激師姐容祖兒 封佢做翻版陳奕迅
35歲吳浩康(Deep)入行十六年，由Facebook live唱到去九展開音樂會，一切得來不易。他曾接受本刊訪問，大談事業高山低谷，由參加新秀、出道及未來的路，提到初入行被指係翻版陳奕迅，Deep話好多謝容祖兒，點解？睇吓佢點講……
感激師姐容祖兒
問到演唱會反應好好，感覺如何，吳浩康直言僅喺台上有不一樣的感受：「喺個台上面，我先知道原來連上面嘅座位都full咗，呢個係我冇諗過嘅，嗰刻我都呆一呆，真係覺得自己好好彩，無論係個騷又好，Facebook Live大家嘅反應，冇諗過做Fb Live一路儲咗啲人，有啲朋友喺Fb寫「我哋細個成班同學約，如果你開演唱會我哋去睇，點知一等就十幾年。」我都好surprise會有一班人等自己。喺呢段時間裡面有啲日子好啲，有啲日子差啲，喺差嘅日子裡面已經唔敢諗仲有冇人聽我唱歌，好多事唔係理所當然發生。」
參加新秀 想簽公司
問到當初新秀勝出，有冇覺得事業一條直路？吳浩康指當年冇諗過贏唔贏：「我睇呢件事係好現實，我係想簽公司，當然你問我恨唔恨個獎，嗰時細路仔一 定好想贏到人，但我都好知道，嗰晚攞咗個獎當中有好多因素，唔代表你真係叻過人，大家嘅事業發展都唔係基於嗰晚，啱啱先喺個BB池度游完，未談論到心雄。」
吳浩康：樣同性格似陳奕迅
好多人話佢似陳奕迅，咁佢自己又點睇呢？ 吳浩康：「其實係個樣似，同埋鍾意講嘢嘅性格似，唱歌我未夠班，冇得同人相提並論，聲同唱腔似就發達啦！哈！似樣係（容）祖兒講先，好多謝呢個師姐，幫我諗一啲稱呼等人哋記得我，第一隻合唱歌係佢帶住我唱，我唱到坨屎咁佢都冇嫌棄，每次LiveShow仲同我練吓、溝通吓。」
自我價值低
當年一出道，有好多首hit歌，問到佢有冇覺得迷失同飄飄然時，吳浩康直言有迷失過：「唔係飄飄然，亦都因為行得好順，嗰時自我價值好低，因為我錄嘅〈先入為主〉、〈洗剪吹〉製成品好好，但喺錄嘅時候，錄一隻歌錄一百七十幾個鐘頭，當其時有資源去做，可以畀我喺錄音室慢慢成長，但我就諗自己都係不外如是啫，自己唔係唱得叻，但隻歌整出嚟又OK，即係監製功勞啦，覺得個功勞唔喺自己度，覺得無論嗰個係咪我都可以有人鍾意呢啲歌㗎，開始自我價值低。」
想做一個有延續性嘅project
提到過往一年做Fb Live真係儲番返嚟，當初個idea係邊個諗出嚟㗎呢，吳浩康指當初係自己想做：「喺我計劃緊開FbLive，公司搵我話見到我之前做咗一個音樂嘅電視節目，覺得有啲人都想聽番我唱歌，不如傾吓有咩可以做，會唔會出新作品？我覺得出新作品都係得一粒子彈，機會未必好多，點解我哋唔做一個有延續性嘅project，起碼我今個禮拜做得差啲，下個禮拜可以修正，總好過出一隻歌，得就得，唔得又要再諗點算。」
下站紅館見？
提到在演唱會尾聲時，吳浩康話「下站紅館見！」，有指紅館起碼要入六次紙，相信歌迷都好緊張究竟吳浩康入咗紙未，佢話仲未：「依家同公司睇緊個空間。」
經濟困難 受盡白眼 吳浩康：感激家人不離不棄
提到2004年因藏毒出事，當時驚唔驚就此玩完，吳浩康直言：「絕對有擔心從此就冇，其實情理上係會冇㗎嘛，同埋件事真係大件事，外國係點係外國嘅事，香港就係香港，所以絕對有擔心。」當年有指鄺美雲幫佢同老闆楊生講好說話，問到係咪同鄺美雲好熟，佢話：「嗰陣啱啱識，所以係好感激Cally姐姐(鄺美雲)，我只不過有次受佢邀請為佛誕唱歌，佢覺得呢個新人好似幾有禮貌，佢有個姪女都幾鍾意我，出事之後，佢覺得呢個後生仔都值得幫，就打畀老闆求情。」
經過呢件事後，不但生活受盡白眼，連經濟上有頗大壓力，吳浩康：「經濟上有捱過嘅，喺我組Closer夾Band嘅時候，我一個人就算喺演藝工作唔多，我都會做其他嘢去穩定住，因為我都要養屋企，但唯獨夾Band嗰陣，我哋係新嘅樂隊，一份糧四個人分，工作機會少，嗰段時間每一日都要計住點搭車，因為我住觀塘，Band 房喺荃灣，淨係搭車都係好攰嘅事，我一個禮拜最少返去四日，日頭夾到夜晚，仲未計其他生活開支。我追夢啫，但我唔能夠要爸爸同我一齊過飄泊嘅生活，所以早三、四年開始，我做其他兩樣嘅生意，唱歌學校同籃、足球嘅青訓。」
吳浩康：從來冇諗過放棄音樂夢
工作機會少，收入低，咁有冇諗過放棄唔做呢行，吳浩康：「冇，除非我行完晒條路，我應承過自己要有始有終，我仲有好多嘢未做，我想試吓盡力盡情做一次，可唔可以做到啲嘢。」
與父親的約定
吳浩康繼續道：「我爸爸同我有個約定，佢有癌症諗住唔睇醫生，我就同佢講：『留番條命睇我行番上個台度。』佢又真係好乖頂住。我爸爸好想見到我返番個台唱歌，因為佢覺得喺嗰度我係最開心。」
癌父每日煮早餐畀佢
問到低潮嘅時候，屋企同前女朋友點支持佢，吳浩康指最大的支持的確係來自屋企：「我屋企嘅支持好大，尤其係我爸爸，佢直情唔過問關於我嘅經濟、諗住點發展，零壓力，每日一定會煮好早餐畀我，夜晚會等我門，見到我唔開心，會揀啱時間先問咩事，呢個空間、呢種支持、陪伴，女朋友最大都係信任同陪伴，屋企人係長期嘅擔心、長期嘅不離不棄，好難能可貴。」
公司無條件支持
除了家人，公司的支持亦係佢堅持的動力，吳浩康話：「公司都係另外一班屋企人，我聽到好多說法，講到公司好條件交換，講到『阿Deep夠多人撐，佢哋咪會理番佢。』其實根本就唔係咁，根本由決定做Fb Live開始，大家一路喺背後support我，只不過好難話畀大家聽我啲同事又做緊嘢嘞！ 老闆楊生冇計算過我值唔值得幫，佢一個咁聰明嘅人只要計，就知唔值得。Mani我試過搞出大頭佛，記者問回應，我呃佢我冇去過嗰個地方，佢都係照樣幫我，我媽媽離開，佢好落力去幫，連私事、家事都咁support。」
未有時間表結婚
工作慢慢穩定，咁又有冇諗過幾時結婚呢，吳浩康指好想生細路仔：「好想成個屋企多啲新嘅成員，但係我諗未係呢刻做到或者急得嚟嘅事，如果搵到啱嘅人嘅話，可能係隨時。」
